തൊഴിൽവിസ അപേക്ഷക്കൊപ്പം സ്വഭാവ സർട്ടിഫിക്കറ്റ്​ ഇന്ന്​ മുതൽ

അബൂദബി: യു.എ.ഇയിൽ തൊഴിൽവിസക്ക്​ അപേക്ഷിക്കുന്ന വിദേശികൾ സ്വഭാവ സർട്ടിഫിക്കറ്റ്​ സമർപ്പിക്കണമെന്ന നിബന്ധന ഞായറാഴ്​ച മുതൽ പ്രാബല്യത്തിൽ. സ്വന്തം രാജ്യത്തെ പൊലീസിൽനിന്നോ സർക്കാർ അധികൃതരിൽനിന്നോ ആണ്​ സ്വഭാവ സർട്ടിഫിക്കറ്റ്​ ഹാജരാ​ക്കേണ്ടത്​. മറ്റൊരു രാജ്യത്ത്​ അഞ്ച്​ വർഷമായി താമസിക്കുന്നവർ രാജ്യത്തെ അധികൃതരിൽനിന്നുള്ള സർട്ടിഫിക്കറ്റ്​് ഹാജരാക്കണം​. യു.എ.ഇയിൽ ദീർഘകാലമായി താമസിക്കുന്നവർക്ക്​ ദുബൈ പൊലീസിലോ അബൂദബി പൊലീസിലോ അപക്ഷേ നൽകാം.

വിദ്യാഭ്യാസ യോഗ്യത സർട്ടിഫിക്കറ്റ്​, വിവാഹ സർട്ടിഫിക്കറ്റ്​ എന്നിവയെ പോലെ സ്വഭാവ സർട്ടിഫിക്കറ്റും അതത്​ രാജ്യത്തെ യു.എ.ഇ എംബസിയിൽനിന്നോ യു.എ.ഇ വിദേശകാര്യ മന്ത്രാലയത്തിൽനിന്നോ അറ്റസ്​റ്റ്​ ചെയ്യണം. കുടുംബ വിസയിലും സന്ദർശക വിസയിലും എത്തുന്നവർക്ക്​ സ്വഭാവ സർട്ടിഫിക്കറ്റ്​ ആവശ്യമില്ല. യു.എ.ഇ മന്ത്രിസഭ തീരുമാന പ്രകാരമാണ്​ സ്വഭാവ സർട്ടിഫിക്കറ്റ്​ നിർബന്ധമാക്കിയത്​. യു.എ.ഇയുടെ ദേശീയ സുരക്ഷ ഉറപ്പുവരുത്തുന്നതിന്​ വേണ്ടിയാണ്​ ഇത്തരമൊരു നടപടി സ്വീകരിക്കുന്നതെന്ന്​ ഇതിന്​ വേണ്ടി നിയോഗിക്കപ്പെട്ട കമ്മിറ്റി വ്യക്​തമാക്കി.

ക്രിമിനൽ പശ്ചാത്തലമുള്ളവരും സ്വന്തം രാജ്യത്ത്​ അറസ്​റ്റ്​ വാറണ്ട്​ നിലനിൽക്കുന്നവരും യു.എ.ഇയിലെത്തുന്നത്​ ഇതുവഴി ഒഴിവാക്കാൻ സാധിക്കും. കാനഡ, ബെൽജിയം, ആസ്​ട്രേലിയ തുടങ്ങിയ രാജ്യങ്ങളിൽ തൊഴിൽവിസക്കൊപ്പം സ്വഭാവ സർട്ടിഫിക്കറ്റ്​ സമർപ്പിക്കണമെന്ന്​ നിബന്ധനയുണ്ട്​. യു.എ.ഇയിൽ ചില സർക്കാർ സ്​ഥാപനങ്ങളും സ്വകാര്യ സ്​ഥാപനങ്ങളും പുതുതായി ജോലിയിൽ പ്രവേശിക്കുന്നവരോട്​ നേരത്തെ തന്നെ സ്വഭാവ സർട്ടിഫിക്കറ്റ്​ ഹാജരാക്കാൻ ആവശ്യപ്പെട്ടിരുന്നുവെങ്കിലും വിസ ലഭ്യമാകാൻ ഇത്​ ആവശ്യമായിരുന്നില്ല.

ദുബൈ പൊലീസിൽനിന്ന്​ സർട്ടിഫിക്കറ്റ്​
ദുബൈ: ദുബൈ പൊലീസിൽനിന്ന്​ സ്വഭാവ സർട്ടിഫിക്കറ്റ്​ കിട്ടാൻ പൊലീസി​​െൻറ ആപ്ലി​േക്കഷൻ വഴി അപേക്ഷ സമർപ്പിക്കാം. എല്ലാ സ്​മാർട്ട്​ ഫോണുകളിലും ഇൗ ആപ്ലിക്കേഷൻ ഇംഗ്ലീഷിലും അറബിയിലും ലഭിക്കും.  നിശ്ചിത പേജിൽ സ്വന്തം പേരും എമിറേറ്റ്​സ്​ ​െഎ.ഡി നമ്പറും അടിക്കുന്നതോടെ രജിസ്​ട്രേഷൻ നടപടി ആരംഭിക്കും. തുടർന്ന്​ ലഭിക്കുന്ന നിർദേശങ്ങൾക്ക്​ അനുസരിച്ച്​ രജിസ്​ട്രേഷൻ പൂർത്തിയാക്കും.  യു.എ.ഇയിൽ താമസിക്കുന്ന വിദേശികൾക്ക്​ സ്വഭാവ സർട്ടിഫിക്കറ്റിനുള്ള അപേക്ഷാ ഫീസ്​ 210 ദിർഹമാണ്​.

രാജ്യത്തിന്​ പുറത്തുനിന്നാണ്​ അപേക്ഷ സമർപ്പിക്കുന്നതെങ്കിൽ 300 ദിർഹം നൽകണം. ഏതെങ്കിലും പൊലീസ്​ സ്​റ്റേഷനിലോ കുറ്റാനേ്വഷണ വിഭാഗ ഒാഫിസിലോ നേരിട്ട്​ ഹാജരായും അപേക്ഷ സമർപ്പിക്കാം. വെള്ളി, ശനി ഒഴികെയുള്ള ദിവസങ്ങളിൽ രാവിലെ 7.30 മുതൽ ഉച്ചക്ക്​ 2.30 വരെയാണ്​ ഇങ്ങനെ അപേക്ഷ സമർപ്പിക്കാൻ സാധിക്കുക.