ബർദുബൈയുടെ ​പ്രിയപ്പെട്ട ഹംസക്ക മടങ്ങുന്നു

ദുബൈ: ബർദുബൈയിലെ മലയാളികളുടെയും ഗുജറാത്തികളുടെയും സിന്ധികളുടെയും പ്രിയപ്പെട്ട ഹംസക്ക പ്രവാസം അവസാനിപ്പിച്ച്​ നാട്ടിലേക്ക്​ മടങ്ങുന്നു. ദുരിതം അനുഭവിക്കുന്ന ഒരുപറ്റം മനുഷ്യരെ സഹായിക്കാൻ കഴിഞ്ഞ ചാരിതാർഥ്യത്തോടെയാണ്​ മലപ്പുറം ആല​ങ്കോട്​ പന്താവൂർ ഏറത്ത്​ ഹംസയുടെ മടക്കം.

1993 ജൂലൈയിലാണ്​ പ്രവാസലോകത്തെത്തിയത്​. ക്ലീനിങ്​ ആയിരുന്നു ജോലി. 1994 മുതൽ മുംബൈ സ്വദേശികളുടെ അൽ താര കമ്പനിയിൽ ജോലി തുടങ്ങി. അന്ന്​ മുതൽ ഇന്ന്​ വരെ ഈ സ്​ഥാപനത്തിനൊപ്പമാണ്​ ഊണും ഉറക്കവും. ആദ്യ കാലത്ത്​ 600 ദിർഹമായിരുന്നു ശമ്പളം. ഇപ്പോൾ 2000 ദിർഹമും. ശമ്പളമല്ല, ഈ നാടി​െൻറ സ്​നേഹമാണ്​ തന്നെ ഇവിടെ പിടിച്ചുനിർത്തിയതെന്ന്​ ഹംസ പറയുന്നു. ദുബൈയിൽനിന്ന്​ കിട്ടിയ നല്ല സൗഹൃദങ്ങളാണ്​ ഏറ്റവും വലിയ സാമ്പാദ്യം. റമദാനിൽ ബർദുബൈയിലെ മൂന്ന്​ പള്ളികളിൽ നോമ്പുതുറ ഒരുക്കിയിരുന്നത്​ ഹംസയുടെ നേതൃത്വത്തിലായിരുന്നു. രണ്ട്​ വർഷമായി നോമ്പുതുറകൾ ഇല്ലാത്തതി​െൻറ സങ്കടവും ഹംസക്കുണ്ട്​.

ലോക്​ഡൗൺ കാലത്ത്​ റൂമുകളിൽ ഭക്ഷണം എത്തിക്കാനും കിറ്റെത്തിക്കാനും മുൻപന്തിയിലുണ്ടായിരുന്നു. കെ.എം.സി.സിയുടെ സജീവ പ്രവർത്തകനാണ്​. മലയാളികളെ ചേർത്തുപിടിക്കുന്ന ഇവിടത്തെ ഭരണാധികാരികൾക്ക്​ നന്ദി പറഞ്ഞാണ്​ മടക്കം. 52 ഡിഗ്രിയിലും മൂടിപ്പുതച്ച്​ ഉറങ്ങാനും ഏത്​ പാതിരാത്രിയിലും സുരക്ഷിതമായി പുറത്തിറങ്ങാനും കഴിയുന്ന വേറെ ഏത്​ നാടുണ്ടെന്ന്​ ഹംസ ചോദിക്കുന്നു.ആരോഗ്യപരമായ പ്രശ്​നങ്ങളുള്ളതിനാലാണ്​ മടക്കം. നാട്ടിലെത്തിയാൽ കൃഷിയിലും സാമൂഹിക പ്രവർത്തനത്തിലും കൂടുതൽ സജീവമാകണമെന്ന്​ 59കാരനായ ഹംസ പറയുന്നു. നാട്ടിൽ പുഞ്ച, കിഴങ്ങ്​, തെങ്ങ്​, വാഴകൃഷിയുണ്ട്​.

മക്കളായ ഹഫ്​സത്തി​െൻറയും അസ്​മയുടെയും വിവാഹം കഴിഞ്ഞു. മൂത്തമകൻ ജാഫർ സാദിഖ്​ നാദൽ ഷെബ ക്ലബിൽ ജീവനക്കാരനാണ്​. ഇളയ മകൻ ജാബിർ ദുബൈയിലെ ടൈപിങ്​ സെൻററിൽ വൈകാതെ ജോലിക്ക്​ കയറും. ഭാര്യ: ഫാത്തിമ.