ബാങ്ക്​ വിവരങ്ങൾ ​കൈക്കലാക്കി തട്ടിപ്പ്​; രണ്ടുപേർ പിടിയിൽ

അബൂദബി: ഫോൺ വഴി ബാങ്ക് അക്കൗണ്ട് വിവരങ്ങൾ കൈക്കലാക്കി തട്ടിപ്പ് നടത്തുന്ന രണ്ടുപേരെ അജ്​മാൻ പൊലീസി​െൻറ സഹായത്തോടെ അബൂദബി പൊലീസ് പിടികൂടി. പ്രതികൾ തട്ടിപ്പിന്​ ഉപയോഗിച്ച മൊബൈൽ ഫോണുകളും സിം കാർഡുകളും പിടിച്ചെടുത്തു. ഇവർ തട്ടിപ്പിലൂടെ നേടിയ സമ്പാദ്യവും ബാങ്ക് ബാലൻസും മരവിപ്പിച്ചു.

സാമൂഹികസുരക്ഷക്ക്​ ഭീഷണിയാകുന്ന രീതിയിൽ, വഞ്ചനയിലൂടെ ജനങ്ങളുടെ പണം കൈക്കലാക്കുന്നവർക്കെതിരെ കർശന നടപടി സ്വീകരിക്കുമെന്ന് അബൂദബി പൊലീസ് ക്രിമിനൽ സെക്യൂരിറ്റി സെക്​ടർ ഡയറക്​ടർ മേജർ ജനറൽ മുഹമ്മദ് സുഹൈൽ അൽ റാഷിദി പറഞ്ഞു.

ഇത്തരം ക്രിമിനൽ സംഘങ്ങളുടെ തട്ടിപ്പിന് ഇരകളാകാതിരിക്കാൻ ജാഗ്രത വേണമെന്നും ബാങ്ക് അക്കൗണ്ട്​, ക്രെഡിറ്റ് കാർഡ് വിവരങ്ങൾ വെളിപ്പെടുത്തരുതെന്നും അധികൃതർ മുന്നറിയിപ്പ് നൽകി. തട്ടിപ്പിന്​ ഇരയായി എന്ന്​ ബോധ്യപ്പെട്ടാൽ ബാങ്ക് അക്കൗണ്ടുകളും ക്രെഡിറ്റ്, ഡെബിറ്റ് കാർഡുകളും ഉടൻ റദ്ദാക്കുകയോ മരവിപ്പിക്കുകയോ വേണം. ഫോണിലൂടെ ബാങ്കിങ് വിവരങ്ങൾ അപ്ഡേറ്റ് ചെയ്യാൻ ബാങ്കുകൾ ആവശ്യപ്പെടില്ല. ഇത്തരം വ്യാജ കോളുകളിലൂടെയും സന്ദേശങ്ങളിലൂടെയും വഞ്ചിക്കപ്പെടരുതെന്നും ബാങ്കി​െൻറ ഏറ്റവും അടുത്ത ശാഖയിൽ പോയി ഉപഭോക്തൃസേവന ജീവനക്കാർ വഴി മാത്രം ഡാറ്റ അപ്ഡേറ്റ് ചെയ്യണമെന്നും അധികൃതർ ആവശ്യപ്പെട്ടു.

തട്ടിപ്പ്​ കോളുകൾ ലഭിക്കുന്നവർ 8002626 എന്ന ടോൾഫ്രീ നമ്പറിലോ അമാൻ സേവനവുമായി ബന്ധപ്പെ​ട്ടോ വിവരം വേഗം അറിയിക്കണമെന്നും അധികൃതർ പറഞ്ഞു.