കുഞ്ഞോമനകൾ മാറിപ്പോവുന്നത്​ തടയാൻ ഉപകരണമൊരുക്കി ഡി.എച്ച്​.എ 

ദുബൈ:നവജാത ശിശുക്കൾ തമ്മിൽ മാറിപ്പോയെന്നും ആശുപത്രിയിൽ നിന്ന്​ കുഞ്ഞിനെ മോഷ്​ടിച്ചുവെന്നും കേൾക്കാറില്ലേ, ചില സിനിമകളിലെ പ്രമേയം തന്നെ ആ​ശുപത്രിയിൽ നിന്ന്​ മാറിപ്പോയ കുട്ടികൾ വ്യത്യസ്​ത സാഹചര്യമുള്ള അന്യ കുടുംബങ്ങളിൽ വളരുകയും പിന്നീട്​ നാടകീയമായി തിരിച്ചറിയുന്നതും മറ്റുമാണ്​. 
കുഞ്ഞിനെ ആരെങ്കിലും മാറ്റിയാലോ എന്ന്​ ഭയന്ന്​ അമ്മമാരും അമ്മൂമ്മമാരും ഒരു പോള കണ്ണടക്കാതെ ആശുപത്രിയിൽ കാവലിരുന്ന സംഭവങ്ങളും നിരവധി. അത്തരം മാറിപ്പോവലുകളും മോഷണങ്ങളും ഇല്ലാതാക്കാൻ പുത്തൻ ഉപകരണവുമായി ദുബൈ ആരോഗ്യ അതോറിറ്റി (ഡി.എച്ച്​.എ). കുഞ്ഞി​​​െൻറ കാലിൽ  കൊളുത്തിയിടാവുന്ന ഇൗ ഉപകരണം ഒരു അലാറമാണ്​. 

അനുമതിയില്ലാതെ കുഞ്ഞിനെ ആരെങ്കിലും എടുക്കാൻ ശ്രമിച്ചാൽ പോലും അമ്മയും ആശുപത്രി അധികൃതരും വിവരമറിയും. 
ഡി.എച്ച്​.എക്കു കീഴിലെ ദുബൈ, ലത്തീഫ ആശുപത്രികളിലാണ്​ ആദ്യഘട്ടത്തിൽ ഇത്​ നടപ്പാക്കുന്നത്​.   നവജാത ശിശുക്കളുടെ രക്​തത്തിലെ ഒാക്​സിജൻ അളവ്​ നിരീക്ഷിക്കുന്നതിനുള്ള അലാറം ഘടിപ്പിച്ച ഉപകരണവും ഡി.എച്ച്​.എ അവതരിപ്പിക്കുന്നുണ്ട്​. ഒാക്​സിജൻ അളവ്​ കുറഞ്ഞാൽ അമ്മക്കും ആശുപത്രി സ്​റ്റാഫിനും സന്ദേശം ലഭിക്കും.