അസാൻ മാജിദ്​ വധം: പ്രതി മാസങ്ങൾ നീണ്ട ആസൂത്രണം നടത്തി പ്രതിക്ക്​ വധശിക്ഷ നൽകണമെന്ന്​ പ്രോസിക്യൂഷൻ

അബൂദബി: 11കാരനായ പാക്​ ബാലൻ അസാൻ മാജിദിനെ പ്രകൃതിവിരുദ്ധ പീഡനത്തിന്​ ഇരയാക്കിയ ശേഷം ശ്വാസം മുട്ടിച്ച്​ കൊലപ്പെടുത്തിയ പ്രതി കുറ്റകൃത്യത്തിന്​ മാസങ്ങളോളം ആസൂത്രണം നടത്തിയതായി പ്രോസിക്യൂഷൻ കോടതിയിൽ അറിയിച്ചു. ചൊവ്വാഴ്​ച നടന്ന വിചാരണയിലാണ്​ ​പ്രോസിക്യൂഷൻ കൊലപാതക ആസൂത്രണം സംബന്ധിച്ച വിശദ വിവരങ്ങൾ കോടതിയെ ധരിപ്പിച്ചത്​. കുറ്റകൃത്യത്തി​​െൻറ വിശദാംശങ്ങൾ കേട്ട്​ അസാൻ മാജിദി​​െൻറ പിതാവ്​ കണ്ണീരണിഞ്ഞു. 

നിരപരാധിയായ കുട്ടിക്ക്​ നേരെയുള്ള പ്രവൃത്തി അത്യന്തം ഭീകരവും മനുഷ്യത്വരഹിതവുമാണെന്ന്​ തെളിവുകൾ കോടതിക്ക്​ മുമ്പിൽ സമർപ്പിച്ചുകൊണ്ട്​ പ്രോസിക്യൂഷൻ പറഞ്ഞു. കെലാപാതകം കുട്ടിയുടെ കുടുംബത്തെയും സമൂഹത്തെയും ബാധിച്ചിട്ടുണ്ട്​. പ്രതിക്ക്​ വധിശിക്ഷ നൽകണമെന്നും പ്രോസിക്യൂഷൻ ആവശ്യപ്പെട്ടു.

കൊല്ലപ്പെട്ട ബാല​​െൻറ രണ്ടാനമ്മയുടെ സഹോദരനും എ.സി മെക്കാനിക്കുമായ പാക്​ സ്വദേശിയാണ്​ കേസിലെ പ്രതി. ജൂൺ ഒന്നിന്​ പള്ളിയിൽ നമസ്​കരിക്കാൻ പോയ അസാൻ മാജിദിനെ കാണാതായിരുന്നു. അടുത്ത ദിവസം അസാനി​​െൻറ മൃതദേഹം കുട്ടിയും കുടുംബവും താമസിക്കുന്ന ​കെട്ടിടത്തി​​െൻറ മേൽക്കൂരയിൽ കണ്ടെത്തുകയായിരുന്നു. തുടർന്നുള്ള അന്വേഷണത്തിലാണ്​ പ്രതി പിടിയിലായത്​. സ്​ത്രീവേഷം ധരിച്ചെത്തിയാണ്​ ഇയാൾ കുട്ടിയെ മുകൾനിലയിലേക്ക്​ കൂട്ടിക്കൊണ്ടുപോയ​ത്​. കൂട്ടി​െകാണ്ടുപോകുന്ന വീഡിയോ പൊലീസ്​ പുറത്തുവിട്ടിരുന്നു. 

കുട്ടിയെ പ്രകൃതിവിരുദ്ധ പീഡനത്തിന്​ ഇരയാക്കിയ ശേഷം വസ്​ത്രത്തിൽ ഒളിപ്പിച്ച്​ കൊണ്ടുവന്നിരുന്ന കയർ ഉപയോഗിച്ച്​ കഴുത്ത്​ മുറുക്കിയാണ്​ പ്രതി കൊലപ്പെടുത്തിയതെന്ന്​ അന്വേഷണ ഉദ്യോഗസ്​ഥർ പറഞ്ഞു. കൊലപാതകത്തിന്​ ശേഷം കയർ സംഭവസ്​ഥലത്തുതന്നെ ഉപേക്ഷിച്ച്​ പ്രതി കടന്നുകളയുകയായിരുന്നു. നമ്പർപ്ലേറ്റില്ലാത്ത വാഹനത്തിലാണ്​ ഇയാൾ എത്തിയിരുന്നത്​. തിരിച്ച്​ വാഹനത്തിൽ കയറുന്നതിന്​ മുമ്പ്​ കൊലപാതക സമയത്ത്​ ധരിച്ചിരുന്ന സ്​ത്രീവേഷം കെട്ടിടത്തിന്​ പുറത്തുള്ള മാലിന്യക്കുട്ടയിലെറിഞ്ഞതായും അവർ പറഞ്ഞു.