മാളിൽ സാധാരണക്കാർക്കിടയിൽ​​ ദുബൈ ഭരണാധികാരി​; സന്ദർശന ദൃശ്യങ്ങൾ സാമൂഹിക മാധ്യമങ്ങളിൽ വൈറൽ

ദുബൈ: നഗരത്തിലെ സാധാരണക്കാർക്കിടയിലൂടെ സഞ്ചരിച്ച്​ കാഴ്ചക്കാരിൽ കൗതുകം നിറക്കുകയാണ്​ യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം. കഴിഞ്ഞ ആഴ്ച ദേരയിലും ദുബൈ മാളിലും സന്ദർശനം നടത്തിയ അദ്ദേഹം കഴിഞ്ഞ ദിവസം നഗരത്തിലെ തിരക്കേറിയ മാൾ ഓഫ്​ എമിറേറ്റ്​സിലാണ്​ എത്തിയത്​. മാളിലൂടെ ഉദ്യോഗസ്ഥർക്കൊപ്പം നടന്നുനീങ്ങുന്ന അദ്ദേഹത്തിന്‍റെ ദൃശ്യങ്ങൾ സാമൂഹിക മാധ്യമങ്ങളിൽ പ്രചരിച്ചു. ഭരണാധികാരിയെ നേരിൽ കണ്ട ആഹ്ലാദത്തിൽ പലരും ചിത്രങ്ങൾ പകർത്തുന്നതും സ്​നേഹം പ്രകടിപ്പിക്കുന്നതും ദൃശ്യങ്ങളിൽ കാണാം. മാളിലെ സൂപ്പർമാർക്കറ്റിലും അദ്ദേഹം സന്ദർശിക്കുന്നുണ്ട്​. സാധനങ്ങൾ വാങ്ങാൻ എത്തിയവർ ഭരണാധികാരിയെ മുന്നിൽ കണ്ട്​ അത്ഭുതപ്പെടുകയാണ്.

കഴിഞ്ഞ ആഴ്ചയും നഗരത്തിലെ തിരക്കേറിയ പ്രദേശങ്ങളിലൂടെ ജനങ്ങൾക്കിടയിൽ സഞ്ചരിക്കുന്ന ശൈഖ്​ മുഹമ്മദിന്‍റെ ദൃശ്യങ്ങൾ സാമൂഹിക മാധ്യമങ്ങളിൽ വൈറലായിരുന്നു. ചൊവ്വാഴ്ച അൽ ഹംരിയ തുറമുഖത്തിന്‍റെ വികസന പ്രവർത്തനങ്ങൾ വിലയിരുത്താനായി ദേരയിലെ തിരക്കേറിയ തെരുവിലൂടെ വാഹനത്തിൽ പോകുന്ന​ ദൃശ്യങ്ങൾ പുറത്തുവന്നിരുന്നു​. പലരും പ്രിയപ്പെട്ട ഭരണാധികാരിയെ കാണുന്നതിന്​ കടകളിൽ നിന്നിറങ്ങുന്നതും കാണാം.

ദുബൈ ട്രാമിൽ ജനങ്ങൾക്കിടയിൽ സഞ്ചരിക്കുന്ന വിഡിയോയും പുറത്തുവന്നു. യാത്രക്കാർ അതിശയപൂർവം അദ്ദേഹത്തെ വീക്ഷിക്കുന്നതും ചിലർ വീഡിയോയിൽ പകർത്തുന്നതും ദൃശ്യങ്ങളിലുണ്ട്​. നേരത്തെ പല തവണകളിലായി ദുബൈ മാൾ അടക്കമുള്ള സ്ഥലങ്ങളിൽ ശൈഖ്​ മുഹമ്മദ്​ എത്തിച്ചേർന്ന വിഡിയോകൾ പ്രചരിച്ചിരുന്നു. വലിയ സുരക്ഷാ സന്നാഹങ്ങളൊന്നുമില്ലാതെ ജനങ്ങൾക്കിടയിൽ സഞ്ചരിക്കുന്ന അദ്ദേഹത്തിന്‍റെ ലാളിത്യത്തെ പ്രശംസിച്ചുകൊണ്ട്​ നിരവധിപേർ സാമൂഹിക മാധ്യമങ്ങളിൽ പ്രതികരിക്കുകയും ചെയ്തു.