അഷ്റഫ് താമരശേരിയുടെ ഫേസ്ബുക്​ പേജ് തിരിച്ചുകിട്ടി

അജ്മാന്‍: അഞ്ചു​ ദിവസത്തിനൊടുവില്‍ യു.എ.ഇയിലെ സാമൂഹിക പ്രവര്‍ത്തകന്‍ അഷ്റഫ് താമരശേരിയുടെ ഫേസ്ബുക്​​ പേജ് തിരിച്ചുകിട്ടി. വെള്ളിയാഴ്ചയാണ് പേജ് സൈബര്‍ ചാരന്മാര്‍ കൈയടക്കിയത്.

യു.എ.ഇയിലെ പ്രവാസി മരണങ്ങളും തുടര്‍ നടപടികളും പോസ്​റ്റ്​ ചെയ്യുന്ന പേജിന് രണ്ടു ലക്ഷത്തിലേറെ ഫോളോവേഴ്സ് ഉണ്ട്. പേജി​െൻറ മെൻററായ കുടുംബാംഗത്തി​െൻറ ഫേസ്​ബുക്​ അക്കൗണ്ട് ഹാക്ക് ചെയ്ത സംഘം മെൻറര്‍ അടക്കമുള്ള അഡ്മിന്‍മാരെ നീക്കി നിയന്ത്രണം സ്വന്തമാക്കുകയായിരുന്നു.

പണം ആവശ്യപ്പെട്ട് നിരവധിപേര്‍ക്ക് ഈ പേജില്‍ നിന്ന് സന്ദേശം അയച്ചതിനെ തുടര്‍ന്ന് സത്യാവസ്ഥ അറിയാന്‍ ചിലയാളുകള്‍ വിളിച്ചന്വേഷിച്ചപ്പോഴാണ് അഷ്‌റഫ്‌ താമരശേരി സംഭവം അറിയുന്നത്. ഇതേത്തുടര്‍ന്ന് അബൂദബി, ദുബൈ, അജ്മാന്‍ പൊലീസ് സ്​റ്റേഷനുകളില്‍ പരാതി നല്‍കി. ആരും പണം നല്‍കരുതെന്ന്​ ആവശ്യപ്പെട്ട് വിഡിയോ സന്ദേശം പങ്കുവെച്ചു. പേജി​െൻറ നിയന്ത്രണം പൂര്‍ണമായും കൈയിലാക്കിയ സംഘം കഴിഞ്ഞ ദിവസങ്ങളിലായി മൂന്ന് പോസ്​റ്റുകള്‍ ഇട്ടു. പതിവിന് വിപരീതമായി പേജില്‍ നിന്നുള്ള പോസ്​റ്റ്‌ കണ്ട ഫോളോവേഴ്സ് പോസ്​റ്റിനു താഴെ ശക്തമായി പ്രതികരിച്ചിരുന്നു.

ഗള്‍ഫിലെ പൊലീസില്‍ പരാതി നല്‍കിയതോടൊപ്പം കേരള പൊലീസി​െൻറ സഹായവും തേടി. ചൊവ്വാഴ്ച രാത്രി ഹാക്കര്‍മാര്‍ മോശമായ വിഡിയോ പോസ്​റ്റ് ചെയ്തതോടെ സുഹൃത്തുക്കളായ ഐ.ടി. വിദഗ്ധന്മാര്‍ നടത്തിയ പരിശ്രമത്തിനൊടുവിലാണ്​ പേജ് വീണ്ടെടുക്കാൻ കഴിഞ്ഞത്.

വെരിഫൈ ആയ ബ്ലു ടിക്കോട് കൂടിയ പേജ് ആസൂത്രിതമായാണ് ഹാക്കര്‍മാര്‍ കൈവശപ്പെടുത്തിയത്. പേജ് വീണ്ടെടുത്തശേഷം നടത്തിയ ലൈവ്​ വിഡിയോയില്‍ അദ്ദേഹം എല്ലാവർക്കും നന്ദി അറിയിച്ചു.