എക്​സ്​പോഷറിന്​ അപേക്ഷിക്കാം

ഷാർജ ഗവൺമെൻറ് മീഡിയ ബ്യൂറോ വർഷം തോറും സംഘടിപ്പിക്കുന്ന എക്സ്പോഷർ ഇൻറർനാഷണൽ ഫോട്ടോഗ്രാഫി ഫെസ്​റ്റിവൽ 'ഇൻഡിപെൻഡൻറ് ഫോ​ട്ടോ ജേർണലിസ്​റ്റ് അവാർഡിന്​' (ഐ.എഫ്​.പി.എ) എൻട്രികൾ ക്ഷണിച്ചു. നവംബർ 30 ആണ്​ എൻട്രികൾ സ്വീകരിക്കുന്ന അവസാന തീയതി. മലയാളികൾ അടക്കം നിരവധി ഫോ​ട്ടോഗ്രാഫർമാർക്ക്​ പുരസ്​കാരം ലഭിച്ച മേളയാണിത്​.

പൊതുജനാഭിപ്രായത്തെ ബാധിക്കുന്ന ആഗോള പ്രശ്നങ്ങളെക്കുറിച്ച് അവബോധം സൃഷ്​ടിക്കുന്ന ഫ്രീലാൻസ് ഫോട്ടോഗ്രാഫർമാരാണ്​ അപേക്ഷിക്കേണ്ടത്​.

ഇൻഡിപെൻഡൻറ് ഫോട്ടോ ജേർണലിസ്​റ്റ് അവാർഡ് മൂന്ന് വിഭാഗങ്ങളായി തിരിച്ചിരിക്കുന്നു. ബ്രേക്കിങ്​ ന്യൂസ് ഉൾക്കൊള്ളുന്ന ന്യൂസ് ജേർണലിസം, പരിസ്ഥിതി ജേർണലിസം, സൊലൂഷൻസ് ജേർണലിസം എന്നിവയാണത്​. കുറഞ്ഞത് അഞ്ച് ഫോട്ടോകളും പരമാവധി 12 ഫോട്ടോകളും സമർപ്പിക്കണം. രജിസ്ട്രേഷൻ സൗജന്യമാണ്​. 18 വയസ്സിന് മുകളിലുള്ള എല്ലാ രാജ്യക്കാർക്കും പ​ങ്കെടുക്കാം. അംഗീകൃത അസോസിയേഷനോ ഫെഡറേഷനോ നൽകുന്ന പ്രസ് കാർഡ് ഉപയോഗിച്ച് അവാർഡ് വെബ്‌സൈറ്റ് വഴി അപേക്ഷിക്കാം.

ഒന്നാം സ്​ഥാനം നേടുന്നയാൾക്ക്​ 15,000 ഡോളറാണ്​ പുരസ്​കാര തുക. ഇതിന്​ പുറമെ അടുത്ത സീസണിൽ ഇവരുടെ ചിത്രങ്ങൾക്ക്​ പ്രത്യേക സ്​ഥാനം നൽകും. രണ്ടാം സ്ഥാനം നേടുന്നയാളുടെ ചിത്രത്തിനും അടുത്ത സീസണിൽ പ്രത്യേക സ്​ഥാനം നൽകും.

എക്സ്പോഷർ ഇൻറർനാഷണൽ ഫോട്ടോഗ്രാഫി ഫെസ്​റ്റിവലിന് ഫെസ്​റ്റിവൽ അവാർഡുകൾക്കുള്ള എൻട്രികളും ഇഋപ്പാൾ സമർപ്പിക്കാം. അമേച്വർ, പ്രൊഫഷണൽ ഫോട്ടോഗ്രാഫർമാർക്ക് നവംബർ ഒന്ന്​ വരെ അപേക്ഷ നൽകാം.

ആർക്കിടക്​ചറൽ ഫോട്ടോഗ്രാഫി, ഏരിയൽ ആൻഡ് ഡ്രോൺ, ലാൻഡ്സ്കേപ്പ്, പോർട്രെയിറ്റ്, ട്രാവൽ, ഷോർട്ട് ഫിലിം, വന്യജീവി ഫോട്ടോഗ്രാഫി, ഷാർജ സർക്കാർ ജീവനക്കാരുടെ ഫോ​ട്ടോഗ്രഫി എന്നിവയിലേക്കും അപേക്ഷ നൽകാം.