അനലോഗ്​ മിഷൻ : അബ്​ദുല്ല അൽ ഹമ്മാദിയും സാലെ അൽ അമീരിയും യു.എ.ഇയെ പ്രതിനിധീകരിക്കും

ദുബൈ: റഷ്യയിലെ മോസ്​കോയിൽ നടക്കുന്ന ബഹിരാകാശ ഗവേഷണ പരിപാടിയിൽ യു.എ.ഇയെ പ്രതിനിധീകരിച്ച്​ പ​ങ്കെടുക്കുന്നവരുടെ പേര്​ വിവരങ്ങൾ പുറത്തുവിട്ടു. യു.എ.ഇ പൗരൻമാരായ അബ്​ദുല്ല അൽ ഹമ്മദിയും സാലെ അൽ അമീരിയുമായിരിക്കും എട്ടു മാസം നീളുന്ന പദ്ധതിയുടെ ഭാഗമാകുക. മോസ്​കോ എൻ.ഇ.​െക സെൻററിൽ നടക്കുന്ന ഗവേഷണത്തിൽ ഇവരിൽ ഒരാളായിരിക്കും ആറംഗ അന്താരാഷ്​ട്ര സംഘത്തിനൊപ്പം പ​ങ്കെടുക്കുക. കരുതൽ എന്ന നിലയിലാണ്​ രണ്ടാമത്തെയാളെ ഉൾപ്പെടുത്തിയത്​.

മോസ്‌കോ ആസ്ഥാനമായി നടക്കുന്ന എട്ടു മാസത്തെ പഠനപരിപാടിയായ 'സീരിയസ് 20- 21'​െൻറ ഭാഗമാണ് 'അനലോഗ്​ മിഷൻ 1' പദ്ധതി യു.എ.ഇ തുടങ്ങിയത്​.

ഇതി​െൻറ ഭാഗമായി യു.എ.ഇ പൗരന്മാരിൽ നിന്ന്​ അപേക്ഷ ക്ഷണിച്ചാണ്​ മുഹമ്മദ് ബിന്‍ റാഷിദ് ബഹിരാകാശ കേന്ദ്രം രണ്ടു പേരെ തെരഞ്ഞെടുത്ത്​. 172 പേരാണ്​ അപേക്ഷിച്ചിരുന്നത്​. ചൊവ്വയിലേതിന് സമാനമായ അന്തരീക്ഷം ലബോറട്ടറിയില്‍ കൃത്രിമമായി സൃഷ്​ടിച്ച് മനുഷ്യരില്‍ അവയുണ്ടാക്കുന്ന ശാരീരിക, മാനസിക വ്യതിയാനങ്ങൾ പഠിക്കുകയാണ് ലക്ഷ്യം. ഭാവിയിലെ ചൊവ്വ ദൗത്യങ്ങള്‍ക്ക് തയാറെടുപ്പ് നടത്താന്‍ ഇത്തരം പരീക്ഷണങ്ങളിലെ കണ്ടെത്തലുകള്‍ നിര്‍ണായകമാകും. നേരത്തെ പദ്ധതിയിട്ട ഗവേഷണം കോവിഡിനെ തുടർന്ന്​ നീളുകയായിരുന്നു. നവംബറിൽ തുടങ്ങാനാണ്​ നിലവിലെ പദ്ധതി. 2117ഓടെ ചൊവ്വയില്‍ മനുഷ്യരുടെ കോളനികള്‍ നിര്‍മിക്കുകയെന്ന ലക്ഷ്യത്തോടെയുള്ള 'മാര്‍സ് 2117' പരിപാടിക്ക് തയാറെടുപ്പിനും യു.എ.ഇ അനലോഗ് മിഷന്‍ നിര്‍ണായക പങ്ക് വഹിക്കും.

അപേക്ഷകരെ പലതവണ അഭിമുഖം നടത്തിയ ശേഷമാണ്​ രണ്ടു പേരെ തിരഞ്ഞെടുത്തത്​. അന്തിമ പട്ടികയില്‍ ഇടംനേടിയവരെ വിവിധ പരിശോധനകള്‍ക്ക് വിധേയരാക്കി. ഇതിനുശേഷമാണ്​ രണ്ടു പേരെ പ്രഖ്യാപിച്ചത്​. ഡോക്ടര്‍മാര്‍, ആരോഗ്യ ഗവേഷകര്‍, ശാസ്ത്രജ്ഞര്‍, ജീവശാസ്ത്രജ്ഞര്‍, ലൈഫ്-സപ്പോര്‍ട്ട് സ്‌പെഷലിസ്​റ്റുകള്‍, ഐ.ടി, ഇലക്ട്രോണിക്‌സ് പ്രഫഷനലുകള്‍ തുടങ്ങിയവർ ​അപേക്ഷിച്ചിരുന്നു.

ചൊവ്വയിലേതിന് സമാനമായ പാരിസ്ഥിതിക, ജീവിത സാഹചര്യങ്ങള്‍ കൃത്രിമമായി സൃഷ്​ടിക്കുന്നതാണ്​​ അനലോഗ് മിഷൻ. ദൗത്യത്തില്‍ പങ്കെടുക്കുന്നവരുടെ സ്വഭാവസവിശേഷതകളിലുള്ള മാറ്റങ്ങള്‍ അറിയുന്നതിനായി നിരവധി പരീക്ഷണങ്ങള്‍ നടത്തും. ഇവരെ ലബോറട്ടറികള്‍ക്കുള്ളില്‍ തനിയെയും കൂട്ടമായും താമസിപ്പിക്കും.

17 വർഷമായി യു.എ.ഇ സായുധ സേനയുടെ ഭാഗമാണ്​ അബ്​ദുല്ല അൽ ഹമ്മാദി. നിലവിൽ മെയിൻറനൻസ്​ വിഭാഗം ക്രൂ ചീഫാണ്​.മാഞ്ചസ്​റ്റർ മെട്രോപൊളിറ്റനിൽ നിന്ന്​ എയ്​റോസ്​പേസ്​ എൻജിനീയറിങ്ങിൽ ബിരുദം നേടിയിട്ടുണ്ട്​. അബൂദബി യൂനിവേഴ്​സിറ്റിയിൽ നിന്ന്​ മെക്കാനിക്കൽ എൻജിനീയറിങ്​ ബിരുദവും നേടി.

അഡ്​നോകിലെ മെക്കാനിക്കൽ എൻജിനീയറാണ്​ സാലെ അൽ അമീരി. ഖലീഫ യൂനിവേഴ്​സിറ്റിയിൽ നിന്ന്​ മെക്കാനിക്കൽ എൻജിനീയറിങ്ങിൽ ബിരുദമുണ്ട്​.

2015ൽ അബൂദബി സോളാർ ചലഞ്ചിൽ അമീരിയുടെ സംഘം രണ്ടാം സ്​ഥാനം നേടിയിരുന്നു. 1200 കിലോമീറ്റർ മൈലേജുള്ള സോളാർ കാറാണ്​ അന്ന്​ സംഘം അവതരിപ്പിച്ചത്​.