അമീർ മുഹമ്മദ്​ ആംഗ്ലിക്കൻ സഭ ആസ്​ഥാനത്ത്​

ജിദ്ദ: ബ്രിട്ടനിൽ സന്ദർശനം നടത്തുന്ന കിരീടാവകാശി അമീർ മുഹമ്മദ്​ ബിൻ സൽമാൻ ആംഗ്ലിക്കൻ സഭ ആസ്​ഥാനത്തെത്തി. ലണ്ടനിലെ സഭ ആസ്​ഥാനമായ ലാംബിത്​ പാലസിൽ​ കാൻറർബെറി ആർച്ച്​ ബിഷപ്പ്​ ജസ്​റ്റിൻ വിൽബിയുമായി അദ്ദേഹം കൂടിക്കാഴ്​ച നടത്തി. ചർച്ചകളിൽ ആംഗ്ലിക്കൻ ചർച്ചി​​​െൻറ ആദ്യ വനിത ബിഷപ്പുമാരിൽ ഒരാളായ ക്രിസ്​റ്റീൻ ഹാർഡ്​മാൻ, ന്യൂകാസിൽ ബിഷപ്പ്​ നിക്ക്​ ബൈൻസ്​ എന്നിവരും പ​െങ്കടുത്തു. ഒരുമണിക്കൂറോളം അമീർ മുഹമ്മദ്​ സഭാആസ്​ഥാനത്ത്​ ചെലവഴിച്ചു. 2015 ൽ ബർമിങ്​ഹാം യൂനിവേഴ്​സിറ്റി ലൈബ്രറിയിൽ കണ്ടെത്തിയ ആദ്യകാല ഖുർആൻ കൈയെഴുത്തുപ്രതി ഉൾപ്പെടെ അവിടെ സൂക്ഷിച്ചിരിക്കുന്ന വിവിധ മതഗ്രന്ഥങ്ങളുടെ പുരാതന കൈയെഴുത്തുപ്രതികളുടെ ശേഖരവും അദ്ദേഹം നോക്കിക്കണ്ടു. കൈറോയിൽ കഴിഞ്ഞ ദിവസം കോപ്​റ്റിക്​ പോപ്​ തവദ്രൂസ്​ രണ്ടാമനെയും അമീർ മുഹമ്മദ്​ സന്ദർശിച്ചിരുന്നു.