കോവിഡ് സന്നദ്ധ പ്രവർത്തകർക്ക് അക്കാഫി​െൻറ ആദരം

ദുബൈ: മഹാമാരിക്കാലത്ത്​ ദുരിതത്തിൽപെട്ടവർക്ക്​ സ്വാന്തനമേകിയ സന്നദ്ധ പ്രവർത്തകർക്ക്​ അക്കാഫ്​ വളൻറിയർ ഗ്രൂപ്പി​െൻറ ആദരം.

അക്കാഫ്​ പ്രവർത്തകർക്ക്​ പുറമെ സന്നദ്ധ സംഘടനകൾ, സാമൂഹിക പ്രവർത്തകർ, മാധ്യമപ്രവർത്തകർ എന്നിവരും ആദരം ഏറ്റുവാങ്ങി.

കോവിഡ് കാലത്ത്​ മാതൃകാപരമായ പ്രവർത്തനങ്ങളാണ്​ അക്കാഫ്​ കാഴ്​ചവെച്ചത്​. കോവിഡ് ബാധിച്ചവർക്ക്​ ഐസൊലേഷൻ, ചികിത്സ സഹയം, ഭക്ഷണകിറ്റ്​, ജോലി നഷ്​ടപ്പെട്ട്​ കുടുങ്ങിയവർക്ക്​ നാട്ടിലെത്താൻ സൗജന്യ വിമാന സർവിസ്​, ഒാക്​സിജൻ കോൺസൺട്രേറ്റർ, വാക്​സിനേഷൻ സെൻറർ എന്നിവയുമായി 250ഓളം വളൻറിയർമാർ ഒന്നരവർഷമായി സജീവമായിരുന്നു.

ഇവർക്കൊപ്പം കെ.എം.സി.സി, എം.എസ്​.എസ്​, ഓർമ, ഐ.സി.എഫ്​ മർക്കസ്​, നോർക്ക, അൻബോട്​, ഇൻകാസ്​, ഷാർജ ഇന്ത്യൻ അസോസിയേഷൻ തുടങ്ങിയ സംഘടനകളെയും ആദരിച്ചു. ഇന്ത്യൻ കോൺസുലേറ്റ്​ വൈസ്​ കോൺസുലർ ഉത്തം ചന്ദ്​, ഡി.എച്ച്​.എ സി.ഇ.ഒ സാലേ അൽ ഹാഷ്​മി, സി.ഡി.എ സി.ഇ.ഒ ഡോ. ഒമർ അൽ മുതന്ന, ദുബൈ പൊലീസിലെ ക്യാപ്​റ്റൻ മുഹമ്മദ്​ സബീൽ മുഹമ്മദ്​, ഫഹദ്​ മുഹമ്മദ്​ അൽബലൂഷി, മുഹമ്മദ്​ മുഹ്​സിൻ അലി, മർവാൻ ഖലീൽ ഇബ്രാഹിം അൽ ബലൂഷി, വതാന അൽ ഇമാറാത്തിലെ തമീമ മുഹമ്മദ്​ അൽ നയ്​സർ, സി.ഡി.എയിലെ അഹ്​മദ്​ അൽ സാബി എന്നിവരാണ്​ ആദരിച്ചത്​.

പ്രോഗ്രാം ജനറൽ കൺവീനർ ജലാൽ സ്വാഗതം പറഞ്ഞു. സീനിയർ അക്കാഫ് വളൻറിയർ പോൾ ടി. ജോസഫ് അധ്യക്ഷത വഹിച്ചു.

അക്കാഫ് വളൻറിയർ നേതാക്കളായ റാഫി പട്ടേൽ, വെങ്കിട്ട് മോഹൻ, സാനു മാത്യു, മച്ചിങ്കൽ രാധാകൃഷ്ണൻ, ഷൈൻ ചന്ദ്രസേനൻ, എ.എസ്​. ദീപു, നൗഷാദ് മുഹമ്മദ് തുടങ്ങിയവർ നേതൃത്വം നൽകി.