ജയിൽ അന്തേവാസികളുടെ കുഞ്ഞുങ്ങൾക്കായി  നഴ്​സറി വിപുലീകരണവുമായി അജ്​മാൻ പൊലീസ്​ 

ദുബൈ: സമൂഹത്തിൽ സന്തോഷവും നീതിയും ഉറപ്പാക്കാൻ നടത്തി വരുന്ന ശ്രമങ്ങളുടെ ഭാഗമായി അജ്​മാൻ പൊലീസ്​ നഴ്​സറികൾ വിപുലീകരിക്കുന്നു. തടവുകാരുടെ കുഞ്ഞുങ്ങൾക്ക്​ കളിച്ചുല്ലസിച്ച്​ പഠിച്ച്​ വളരാനുള്ള സൗകര്യമൊരുക്കാനാണ്​ ഇൗ ഉദ്യമം. 160 കുഞ്ഞുങ്ങൾക്ക്​ കൂടി സൗകര്യം ലഭിക്കും വിധമാണ്​ ഇൗ ഘട്ടത്തിലെ വികസനം. 
ജയിൽ അന്തരീക്ഷത്തിൽ നിന്ന്​ മാറി സാധാരണ ജീവിതം അനുഭവിച്ചറിയാനും ശാസ്​ത്രീയവും നൂതനവുമായ കളികളിൽ പങ്കുചേരാനും ഇതു വഴി കുഞ്ഞുങ്ങൾക്കാവുമെന്ന്​ അജ്​മാൻ പൊലീസി​​​െൻറ ശിക്ഷ^പരിഷ്​കരണ വിഭാഗം (ആർ.പി.ഇ) ഡയറക്​ടർ ​ബ്രിഗേഡിയർ മുബാറക്​ ഖൽഫാൻ അൽ റിസി പറഞ്ഞു.  ഭക്ഷണം, കഴിപ്പാട്ടങ്ങൾ, പഠനോപകരണങ്ങൾ എന്നിവ ഉൾപ്പെടെ
കുഞ്ഞുങ്ങൾക്ക്​ വീട്ടിൽ ലഭിക്കേണ്ട സൗകര്യങ്ങളെല്ലാം ഇവിടെ സജ്ജീകരിക്കും. മാതാക്കൾക്ക്​ കുട്ടികളുമായി സമയം ചെലവിടാനും കഴിയും. ഇതു വഴി ചെറുപ്രായത്തിൽ ലഭിക്കേണ്ട മാതൃസ്​നേഹം നിഷേധിക്കപ്പെടുന്നില്ലെന്ന്​ ഉറപ്പാക്കാനാവും. കുട്ടികളുടെ അവകാശങ്ങൾ സംരക്ഷിക്കാനും വിദ്യാഭ്യാസ^ആരോഗ്യ സൗകര്യങ്ങളെല്ലാം ലഭിക്കാനും വേണ്ട നടപടികളും സ്വീകരിക്കും. ജയിലിൽ എത്തുന്നവരെ കുഞ്ഞുങ്ങളിൽ നിന്ന്​ വേർപെടുത്താറില്ലെന്നും കൈക്കുഞ്ഞുങ്ങൾ മുതൽ ഏഴു വയസുകാർ വരെ പല പ്രായത്തിലുള്ള കുട്ടികൾ ഇവിടെയുണ്ടെന്നും ​ബ്രിഗേഡിയർ റിസി പറഞ്ഞു.