അജ്മാന്‍ ലിവ ഈത്തപ്പഴ മേള ജൂലൈ 25 ന്

അജ്മാന്‍: ഇൗത്തപ്പഴത്തി​​​െൻറ മാധുര്യമൂറും പൈതൃകവും പാരമ്പര്യവും  ആഘോഷമാക്കുന്ന അജ്മാന്‍ ലിവ ഈത്തപ്പഴ മേള  25 ന് തുടങ്ങും.  മേളയുടെ  അഞ്ചാം പതിപ്പാണ് ഇത്. ഇൗ മാസം 25 മുതൽ 28 വരെ അല്‍ ജറഫിലെ  എമിറേറ്റ്സ് ഹോസ്പിറ്റാലിറ്റി സ​​െൻററിലാണ് മേള  നടക്കുന്നത്.  അജ്മാന്‍ ഭരണാധികാരിയും യു.എ.ഇ  സുപ്രീം കൗൺസിൽ അംഗവുമായ ശൈഖ് ഹുമൈദ് ബിൻ റാഷിദ് അൽ നുഐമിയുടെ രക്ഷാകർതൃത്വത്തിൽ അജ്മാൻ ടൂറിസം ഡിപ്പാർട്ട്മ​​െൻറ്  ആണ്   മേള സംഘടിപ്പിക്കുന്നത്.
 തദ്ദേശീയ കർഷകർ തങ്ങളുടെ ഉത്പന്നങ്ങൾ മേളയില്‍  പ്രദര്‍ശിപ്പിക്കും.  
ഏറ്റവും പുതിയ രീതികളും സാങ്കേതികവിദ്യകളും കൃഷിക്കാർക്കും സന്ദർശകർക്കും പരിചയപ്പെടാൻ ഏറ്റവും മികച്ച വേദികളിലൊന്നാണിത്​.  കുടുംബങ്ങള്‍ക്കും സന്ദര്‍ശകര്‍ക്കും ഏറെ വിനോദകരമായി ഒരുക്കുന്ന  മേള കാണാൻ 15,000 ത്തോളം പേര്‍ എത്തുമെന്നാണ് കണക്കാക്കുന്നത്.  
ഉദ്ഘാടന ദിനം  രാവിലെ പത്തിന്​ ആരംഭിക്കുന്ന മേള രാത്രി പതിനൊന്നു വരെ നീളും. തുടര്‍ന്നുള്ള ദിവസങ്ങളില്‍ വൈകീട്ട് നാലു മുതല്‍ പതിനൊന്ന് വരെയാണ് മേള സമയം. കുട്ടികള്‍ക്കായി കലാ സാംസ്കാരിക മത്സരങ്ങളുണ്ടാവും. 
മേള കാണാനെത്തുന്നവർക്ക്​  നറുക്കെടുപ്പിലൂടെ വലിയ സമ്മാനങ്ങളും നൽകുന്നുണ്ട്. പ്രവേശനം സൗജന്യമാണ്.