പള്ളിമുറ്റത്ത് ടെൻറുകള്‍ നിര്‍മിക്കാന്‍ അജ്മാന്‍ കിരീടാവകാശിയുടെ നിർദേശം
text_fields
അജ്മാന്‍: പൊരിവെയിലിൽ നിന്ന് വിശ്വാസികൾക്ക് സംരക്ഷണം നൽകാൻ എമിറേറ്റിൽ പള്ളികൾക്ക് പുറത്ത് കൂടാരങ്ങൾ സ്ഥാപിക്കാൻ അജ്മാൻ കിരീടാവകാശി നിര്‍ദേശം നല്‍കി.
കോവിഡ് മാനദണ്ഡങ്ങള്‍ക്കനുസരിച്ച് സാമൂഹിക അകലം പാലിച്ച് നില്‍ക്കുന്നതിനാല്‍ പ്രാര്‍ഥനക്കായി പള്ളിയില്‍ എത്തുന്നവര്‍ പലപ്പോഴും പുറത്താണ് നിൽക്കുന്നത്. വെള്ളിയാഴ്ച പ്രാർഥനയിൽ എല്ലാ പള്ളികളിലും നിര പുറത്തേക്ക് നീളാറുണ്ട്. ഇതേത്തുടര്‍ന്നാണ്‌ അജ്മാന്‍ കിരീടാവകാശി ശൈഖ് അമ്മാര്‍ ബിന്‍ ഹുമൈദ് അല്‍ നുഐമി ഉത്തരവിട്ടത്.
അജ്മാന്‍ എമിറേറ്റില്‍ ഇതുമായി ബന്ധപ്പെട്ട് ആവശ്യമായ നടപടികള്‍ സ്വീകരിക്കാന്‍ നിര്‍ദേശം നല്‍കിയതായി ഇസ്ലാമിക് അഫയേഴ്സ് ആൻഡ് എൻ‌ഡോവ്‌മെൻറ് ഡയറക്ടർ ജനറൽ ഒബയ്ദ് അഹമ്മദ് അൽ സാബി പറഞ്ഞു. യു.എ.ഇയിലെ വിവിധ പള്ളികളിൽ സൺഷെയ്ഡുകൾ സ്ഥാപിക്കുമെന്ന് മതകാര്യ വകുപ്പ് കഴിഞ്ഞ ദിവസം അറിയിച്ചിരുന്നു.