അവധിക്കാലമായി; തിരക്കിൽ മുങ്ങി വിമാനത്താവളങ്ങൾ

ദുബൈ: മധ്യവേനൽ അവധിക്ക്​ സ്​കൂളുകൾ പൂട്ടിത്തുടങ്ങിയതോടെ രാജ്യത്തെ വിമാനത്താവളങ്ങൾ തിരക്കിൽ മുങ്ങുന്നു. 
ലക്ഷക്കണക്കിന്​ പേരാണ്​ അവധിയാഘോഷങ്ങൾക്കായി രാജ്യം വിടുന്നത്​. മലയാളി കുടുംബങ്ങൾ കൂട്ടത്തോടെ നാട്ടിലേക്ക്​ തിരിച്ചുതുടങ്ങി. യാത്രക്കാരുടെ തിരക്ക്​ നിയന്ത്രിക്കാൻ വിമാനത്താവള അധികൃതർ മുൻകരുതലുകളും എടുത്തു തുടങ്ങി. ദുബൈ അന്താരാഷ്​ട്ര വിമാനത്താവളം ഇൗ അവധിക്കാലത്ത്​ 11ലക്ഷം യാത്രികരെയാണ്​ പ്രതീക്ഷിക്കുന്നത്​. ജൂൺ 29, ജൂലൈ അഞ്ച്​ എന്നീ ദിനങ്ങളിലായിരിക്കും ഏറ്റവും കൂടുതൽ യാത്രികർ ഉണ്ടാവുകയെന്നാണ്​ എമിറേറ്റ്​സ്​ വിമാനക്കമ്പനിയുടെ കണക്കുകൂട്ടൽ.

ഇൗ ദിവസങ്ങളിൽ 2.20 ലക്ഷം യാത്രക്കാർ എമിറേറ്റ്​സിനായി നീക്കിവെച്ചിരിക്കുന്ന ടെർമിനൽ മൂന്നിലൂടെ യാത്ര ചെയ്യുമെന്നാണ്​ പ്രതീക്ഷ. എമിഗ്രേഷൻ, ചെക്​ ഇൻ കൗണ്ടറുകളിൽ തിരക്ക്​ കൂടുമെന്നതിനാൽ യാത്രക്കാർ നേരത്തെ വിമാനത്താവളത്തിൽ എത്തണമെന്ന്​ അധികൃതർ ആവശ്യപ്പെടുന്നുണ്ട്​. ഇക്കണോമി ക്ലാസിൽ ഹാൻറ്​ ബാഗേജി​​​െൻറ തൂക്കം ഏഴ്​ കിലോയിലും ബിസിനസ്​ ക്ലാസ്​, ഫസ്​റ്റ്​ ക്ലാസ്​ എന്നിവയിൽ 14 കിലോയിലും അധികരിക്കാൻ പാടില്ല. 

ഇക്കാര്യം ഉറപ്പാക്കാൻ വിവിധയിടങ്ങളിൽ പരിശോധനയുണ്ടാകുമെന്ന്​ എമിറേറ്റ്​സ്​ അധികൃതർ അറിയിച്ചു. എമിറേറ്റ്​സ്​ യാത്രികർക്ക്​ വിമാനം പുറപ്പെടുന്നതിന്​ ആറ്​ മണിക്കൂർ മു​മ്പ്​ നേരി​െട്ടത്തിയോ രണ്ട്​ ദിവസം മുമ്പ്​ ഒാൺലൈൻ വഴിയോ ചെക്​ഇൻ ചെയ്യാം. തിരക്ക്​ കണക്കിലെടുത്ത്​ കാർപാർക്ക്​ ചെയ്യുന്നിടത്ത്​ തന്നെ ചെക്​ഇൻ ചെയ്യാനുള്ള സൗകര്യവും അവർ ഒരുക്കിയിട്ടുണ്ട്​. 24 മണിക്കൂർ മുതൽ ആറ്​ മണിക്കൂർ മുമ്പ്​ വരെ ഇൗ സൗകര്യം ഉപയോഗിക്കാം.