വ്യോമയാന സഹകരണം ശക്​തമാക്കാൻ ഇന്ത്യ^യു.എ.ഇ നയതന്ത്ര ചർച്ച

ദുബൈ: ഇന്ത്യയും യു.എ.ഇയും തമ്മിലെ വ്യോമയാന സഹകരണം പുത്തൻ ആകാശങ്ങളിലേക്ക്​. ഇന്ത്യയിലെ വിവിധ നഗരങ്ങളിലേക്ക്​ കൂടുതൽ വിമാന സർവീസുകൾ തുടങ്ങാനും സീറ്റ്​ ക്വാട്ട വർധിപ്പിക്കാനും യു.എ.ഇ സന്നദ്ധത അറിയിച്ചു. ഇന്ത്യൻ വ്യോമയാന സഹമന്ത്രി ജയന്ത്​ സിൻഹയുമായി നടത്തിയ ചർച്ചയിൽ യു.എ.ഇ അംബാസഡർ ഡോ. അഹ്​മദ്​ അബ്​ദു റഹ്​മാൻ അൽ ബന്നയാണ്​ ഇക്കാര്യം അറിയിച്ചത്​. ഇരു രാജ്യങ്ങളും തമ്മിലെ വ്യോമഗതാഗത ഉടമ്പടി പുതുക്കുന്നതു സംബന്ധിച്ച്​ യു.എ.ഇ ജനറൽ സിവിൽ ഏവിയേഷൻ അതോറിറ്റിയുടെയും  സിവിൽ ഏവിയേഷൻ ഒഫ്​ ​അതോറിറ്റി ഒഫ്​ ഇന്ത്യയുടെയും ഉന്നത പ്രതിനിധികൾ   ഒക്​ടോബർ ആദ്യ വാരം  വിശദ ചർച്ച നടത്താനും ധാരണയായി. 
 ഇന്ത്യയിലേക്ക്​ കൂടുതൽ വിമാന സർവീസുകളാരംഭിക്കാനും പ്രാദേശിക വിമാനത്താവളങ്ങളിലേക്ക്​ കൂടുതൽ റൂട്ടുകൾ തുറക്കാനും സന്നദ്ധമാണെന്ന്​ അംബാസഡർ അൽ ബന്ന വ്യക്​തമാക്കി. ഇതു പ്രാവർത്തികമായാൽ മലയാളികൾ ഉൾപ്പെടെയുള്ള പ്രവാസികളുടെ ഏറ്റവും വലിയ പ്രശ്​നങ്ങളിലൊന്നായ വിമാന യാത്രാ നിരക്കിൽ നല്ല കുറവു വരും. ഇന്ത്യ^യു.എ.ഇ ബന്ധം കൂടുതൽ സുദൃഢമാക്കുന്നതി​​െൻറ ഭാഗമായി തുറന്ന ആകാശ നയത്തി​​െൻറ സാധ്യതകളും ആരായും.
യു.എ.ഇ^ ഇന്ത്യ ​വ്യോമ സേവന ഉടമ്പടി പ്രകാരം വിമാന സീറ്റുകളുടെ 80 ശതമാനത്തിനു മുകളിൽ യാത്രക്കാർ വരുന്ന ഘട്ടത്തിൽ ഇരു രാജ്യങ്ങളിലെയും വിമാന കമ്പനികൾ ക്വാട്ട പുതുക്കേണ്ടതുണ്ട്​. 
നിലവിൽ ഇതു 100 ശതമാനവും അതിനു മുകളിലുമാണ്​ യാത്രക്കാരുടെ തിരക്ക്​. ആഴ്​ചയിൽ 130,000 സീറ്റുകളാണ്​ നിലവിൽ അനുവദിച്ചിരിക്കുന്നത്​. തിരക്കു കൂടുന്നതിനനുസരിച്ച്​ നിരക്ക്​ കൂട്ടാനുള്ള വ്യഗ്രതയിൽ ഇന്ത്യൻ വിമാന കമ്പനികൾ ക്വാട്ട പുതുക്കാനോ ചർച്ചകൾക്കോ തയ്യാറാവാറില്ല. എന്നാൽ ഇന്ത്യയിലേക്ക്​ സർവീസുകൾ വർധിപ്പിക്കാൻ യു.എ.ഇയിലെ പ്രമുഖ വിമാനക്കമ്പനികളായ എമിറേറ്റ്​സും ഇത്തിഹാദും സദാ സന്നദ്ധമാണ്​.