പ്രവാസി മൃതദേഹം ഇനി തൂക്കില്ല; വിമാന നിരക്ക് ഏകീകരിച്ചു

ദുബൈ: ഗള്‍ഫില്‍ നിന്ന് പ്രവാസികളുടെ മൃതദേഹം നാട്ടിലെത്തിക്കാനുള്ള നിരക്ക് എയര്‍ ഇന്ത്യ ഏകീകരിച്ചു. മൃതദേഹം തൂക്കി നോക്കി നിരക്ക് ഈടാക്കുന്നത്​ ഇതോടെ അവസാനിക്കും. യു.എ.ഇയിൽ നിന്ന്​ ഇന്ത്യയില്‍ എവിടേക്കും പ്രവാസികളുടെ മൃതദേഹം എത്തിക്കാന്‍ 1500 ദിര്‍ഹമാണ് (ഏകദേശം 28,000 രൂപ) ഈടാക്കുക. മൃതദേഹം തൂക്കി നിരക്ക് ഈടാക്കുന്നത്​ പ്രവാസികളിൽ വലിയ പ്രതിഷേധത്തിന്​ ഇടയാക്കിയ സാഹചര്യത്തിലാണ് ഏകീകരിക്കാന്‍ എയര്‍ ഇന്ത്യ തീരുമാനിച്ചത്.

ശനിയാഴ്ച മുതല്‍ ഇൗ നിരക്ക് നിലവില്‍ വരും. യു.എ.ഇയിൽ നിന്ന്​ പ്രായപൂര്‍ത്തിയായവരുടെ മൃതദേഹം കൊണ്ടുപോകുന്നതിന് 1500 ദിര്‍ഹവും 12 വയസിന് താഴെയുള്ളവരുടെ മൃതദേഹത്തിന് 750 ദിര്‍ഹവുമാണ്​ ഈടാക്കുക. ഒമാനില്‍ നിന്ന് 160 റിയാൽ, കുവൈത്തില്‍ നിന്ന് 175 ദീനാർ, സൗദിയില്‍ നിന്ന് 2200 റിയാൽ, ബഹ്റൈനില്‍ നിന്ന് 225 ദിനാർ, ഖത്തറില്‍ നിന്ന് 2200 റിയാല്‍ എന്നിങ്ങനെയായിരിക്കും മുതിര്‍ന്നവരുടെ മൃതദേഹത്തിനുള്ള നിരക്ക്. വിദേശത്ത്​ മരിക്കുന്ന ഇന്ത്യക്കാരുടെ മൃതദേഹങ്ങള്‍ നാട്ടിലെത്തിക്കാൻ വിമാനക്കമ്പനികൾ തൂക്കി അമിത നിരക്ക്​ ഇൗടാക്കുന്ന നടപടിക്കെതിരെ മാധ്യമം നിരവധി വാർത്തകളും വാർത്താ പരമ്പരയും പ്രസിദ്ധീകരിച്ചിരുന്നു.

കോഴിക്കോട്​ ആസ്​ഥാനമായി പ്രവർത്തിക്കുന്ന മലബാർ ഡവലപ്​മ​​​​​​െൻറ്​ ഫോറം പ്രവാസി മൃതദേഹം പൂർണമായും സൗജന്യമായി നാട്ടിലെത്തിക്കണമെന്നാവശ്യപ്പെട്ട്​ ഇൗയിടെ പാർലമ​​​​​​െൻറിന്​ മുമ്പിൽ 24 മണിക്കൂർ നിരാഹാര സമരവും നടത്തി.പുതിയ നിരക്കോ​ടെ കേരളത്തിലേക്ക്​ നിലവിൽ ഇൗടാക്കുന്നതിനേക്കാൾ 10,000 രൂപയോളം കുറയും. എന്നാൽ ഉത്തരേന്ത്യൻ നഗരങ്ങളിലേക്ക്​ നിലവിലേതിനേക്കാൾ അൽപം കൂടും.