ചരക്കു​ ഗതാഗതത്തിന്​ പിന്നാലെ യാത്രാസർവിസും; പാസഞ്ചർ സ്​റ്റേഷനുകൾ തുറക്കാൻ ഇത്തിഹാദ്​ റെയിൽ

ദുബൈ: ചരക്കു​ ഗതാഗതത്തിന്​ പിന്നാലെ യാത്രാസർവിസും ലക്ഷ്യമിടുന്ന ഇത്തിഹാദ്​ റെയിൽ പാസഞ്ചർ സ്​റ്റേഷനുകൾ നിർമിക്കാനൊരുങ്ങുന്നു. ഇതുസംബന്ധിച്ച കരാറിൽ ആൽസ്​റ്റോം, എസ്​.എൻ.സി.എഫ്​, ​പ്രോഗസ്​ റയിൽ, താൽസ്​ ഗ്രൂപ്​ എന്നിവയുമായി ഒപ്പുവെച്ചു. ഇതിനുപുറമെ, അറ്റകുറ്റപ്പണി, റെയിൽ ഓപറേഷൻ എന്നിവയുടെ കരാറുകളും ഒപ്പിട്ടു. ആകെ നാലു കരാറുകളാണ്​ പുതിയതായി ഒപ്പുവെച്ചത്​.

ആദ്യ പാസഞ്ചർ സ്​റ്റേഷൻ ഫുജൈറയിലായിരിക്കും നിർമിക്കുക. മണിക്കൂറിൽ 200 കിലോമീറ്റർ വേഗതയിൽ പായുന്ന ട്രെയിനിന്​ 400 യാത്രക്കാരെ വഹിക്കാനുള്ള ശേഷിയുണ്ടാവും. അബൂദബിയിൽനിന്ന്​ ദുബൈയിലേക്കും ദുബൈയിൽനിന്ന്​ ഫുജൈറയിലേക്കും 50 മിനിറ്റിൽ എത്താൻ കഴിയും. നിലവിൽ കാറിൽ യാത്രചെയ്യുന്നവർക്കുപോലും ഇതിന്‍റെ ഇരട്ടി സമയം വേണ്ടിവരുന്നുണ്ട്​.

അബൂദബിയിൽനിന്ന്​ അൽ റുവൈസിലേക്ക്​ 70 മിനിറ്റും ഫുജൈറയിലേക്ക്​ 100 മിനിറ്റുമെടുക്കും. ഇതിനിടയിലെ വിവിധ എമിറേറ്റുകളിൽ സ്​റ്റേഷനുകൾ തുറക്കാനാണ്​ കരാർ ലക്ഷ്യമിടുന്നത്​. യു.എ.ഇയിലെ വിവിധ എമിറേറ്റുകളെ ബന്ധിപ്പിക്കുന്ന ഏക ട്രെയിൻ സർവിസായിരിക്കും ഇത്​.

ആൽസ്​റ്റോം ഗ്രൂപ്പുമായുള്ള സഹകരണം പരിസ്ഥിതി സംരക്ഷണ പദ്ധതികൾക്ക്​ ആക്കം കൂട്ടു​മെന്ന്​ ഇത്തിഹാദ്​ റെയിൽ അധികൃതർ പ്രത്യാശ പ്രകടിപ്പിച്ചു. താൽസ്​ ഗ്രൂപ്പുമായുള്ള സഹകരണത്തില​ൂടെ ലക്ഷ്യമിടുന്നത്​ ഡിജിറ്റലൈസേഷനാണ്​.

സൗദി അറേബ്യൻ അതിർത്തിയിൽനിന്ന്​ ഫുജൈറ വരെ പോകുന്ന ലൈന്​ 1200 കിലോമീറ്റർ ദൈർഘ്യമുണ്ട്​. 11 നഗരങ്ങളെ കോർത്തിണക്കിയാവും റെയിൽ.

എന്നാൽ, എവിടെയൊക്കയാവും സ്​റ്റേഷൻ എന്ന വിവരം വ്യക്​തമാക്കിയിട്ടില്ല. അടുത്തിടെ ആധുനിക പാസഞ്ചർ ട്രെയിൻ കമ്പാർട്ട്മെന്‍റുകൾ പുറത്തിറക്കിയിരുന്നു. കഴിഞ്ഞ മാസം ഹൈടെക്​ ട്രെയിനുകളും പുറത്തിറക്കിയിരുന്നു.