കാൽനൂറ്റാണ്ടി​െൻറ പ്രവാസശേഷം നൗഷാദ് ഇന്ന് ഒരുമനയൂരിലേക്ക്

അബൂദബി: കാൽനൂറ്റാണ്ട്​ പ്രവാസ ജീവിതത്തിന് വിരാമമിട്ട്​ തൃശൂർ ചാവക്കാട് ഒരുമനയൂർ പാറാട്ടുവീട്ടിൽ നൗഷാദ് ചൊവ്വാഴ്ച നാട്ടിലേക്ക് മടങ്ങും. ശാന്തപുരം ഇസ്​ലാമിയ കോളജിലെ പഠനത്തിനുശേഷം ബിരുദാനന്തര ബിരുദവും ബി.എഡും പൂർത്തിയാക്കി പെരുമ്പിലാവ് അൻസാർ ഇംഗ്ലീഷ് മീഡിയം സ്‌കൂളിൽ അറബിക് അധ്യാപകനായി ജോലി ചെയ്യുന്നതിനിടെയാണ്​ 1996ൽ സന്ദർശക വിസയിൽ ദുബൈയിലെത്തിയത്.

ദുബൈ അൽ ഹബ്തൂർ മോട്ടോഴ്‌സിൽ പബ്ലിക്ക് റിലേഷൻ ഓഫിസറായാണ് തുടക്കം. ഇറാഖ്, ഈജിപ്ത്, ഫലസ്തീൻ രാജ്യങ്ങളിലെ സഹപ്രവർത്തകർക്കൊപ്പമുള്ള സഹവാസത്തിനിടെ വേഗത്തിൽ അറബി ഭാഷയിലെ സംസാരം സ്വായത്തമാക്കി. 1999 മേയ് 15ന് അബൂദബി ഫണ്ട് ഫോർ ഡെവലപ്‌മെൻറ്​ എന്ന സർക്കാർ സ്ഥാപനത്തിലേക്ക് ജോലിമാറി. നീണ്ട 22 വർഷത്തെ സേവനത്തിനു ശേഷമാണ് ഈ സ്ഥാപനത്തിൽനിന്ന് മടങ്ങുന്നത്. ദ്വിഭാഷ സെക്രട്ടറിയായും സ്വിഫ്റ്റ് അഡ്മിനിസ്‌ട്രേറ്ററായുമാണ് ഈ സ്ഥാപനത്തിൽ ജോലി ചെയ്തിരുന്നത്. തൊഴിൽ മികവിന് ഇ​േൻറണൽ പുരസ്‌കാരങ്ങൾ ലഭിച്ചിട്ടുണ്ട്.

അബൂദബി ഇസ്​ലാമിക് കൾചറൽ സെൻററിൽ വീക്കെൻഡ്​ കൾചറൽ സ്​റ്റഡീസ് അധ്യാപകനായും സേവനമനുഷ്ഠിച്ചു. പ്രവാസ ജീവിതത്തിനിടയിൽ കേരളത്തി​െൻറ വിവിധ മേഖലകളിൽ നിന്നുള്ള കുട്ടികൾക്ക് അറിവുപകരാനായതും നേട്ടം. വിവിധ സാമൂഹിക കൂട്ടായ്മകളിൽ നേതൃപരമായ പ്രവർത്തനങ്ങളിൽ സജീവമായിരുന്നു. അബൂദബിയിലെ ഒരുമ ഒരുമനയൂർ ജനറൽ സെക്രട്ടറി, നോർത്ത് ഒരുമനയൂർ വെൽഫെയർ അസോസിയേഷൻ ജനറൽ സെക്രട്ടറി, ഐ.സി.സി അബൂദബി മുറൂർ ഏരിയ എക്‌സിക്യൂട്ടിവ്​ മെംബർ, തൃശൂർ ജില്ല അസോസിയേഷൻ എക്‌സിക്യൂട്ടിവ് മെംബർ, ചാവക്കാട് അസോസിയേഷൻ എക്‌സിക്യൂട്ടിവ് മെംബർ എന്നീ നിലകളിലും പ്രവർത്തിച്ചു.

പ്രാദേശിക സംഘടനകളിൽ റിലീഫ്-ജീവകാരുണ്യപ്രവർത്തനങ്ങളിലും സജീവമായിരുന്നു. പ്രവാസ ജീവിതത്തി​െൻറ സിംഹഭാഗവും അബൂദബിയിൽ കുടുംബസമേതമായിരുന്നു. മലപ്പുറം ജില്ലയിലെ കാഞ്ഞിരമുക്ക് സ്വദേശിനി സഈദയാണ് ഭാര്യ. മക്കൾ: നാജിഹ്, മാജിദ, നദ, നാസ്വിഹ്, ആസിം.