ജനങ്ങൾക്ക്​ ശല്യമായി വാഹനമോടിച്ച അറബ്​ യുവാക്കൾക്ക്​ റോഡ്​ വൃത്തിയാക്കാൻ ശിക്ഷ

അബൂദബി: തലസ്​ഥാന നഗരത്തിലെ ഒരു പെട്രോൾ പമ്പിൽ ജോലിക്കാരനായി ഒരു സ്വദേശി യുവാവിനെ കണ്ടാൽ സംശയിക്കണ്ട. ഫിലിപ്പിനോ - തെക്കനേഷ്യൻ യുവാക്കൾ സാധാരണയായി ചെയ്​തുവരുന്ന ​തൊഴിൽ മേഖലയിലേക്ക്​ അറബ്​ പൗരൻമാരും എത്തിയതൊന്ന​ുമല്ല. മര്യാദ പഠിക്കാൻ കോടതി പറഞ്ഞയച്ചതാണ്​ കക്ഷിയെ. റോഡുകളിൽ സകല മര്യാദയും ലംഘിച്ച്​ വാഹനങ്ങൾ ചറപറ പായിക്കുന്നവരെ മൃഗശാല ശുചീകരണത്തിന്​ നിയോഗിക്കാൻ നിർദേശിച്ച യു.എ.ഇ വൈസ്​ പ്രസിഡൻറും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമി​​​െൻറ പാത പിൻപറ്റിയാണ്​ അൽ ദഫ്രയിലെ കോടതി ശിക്ഷ വിധിച്ചത്​. നാല്​ ഇമറാത്തി യുവാക്കളും മറ്റൊരു ജി.സി.സി രാജ്യത്തെ പൗരനുമാണ്​ അപകടകരമായി വാഹനമോടിച്ചതിന്​ വിചാരണ നേരിട്ടത്​.
രണ്ടു പേരോട്​ പാർക്കുകൾ ശുചീകരിക്കുന്ന ചുമതല നിർവഹിക്കാൻ നിർദേശിച്ചപ്പോൾ രണ്ടു പേരെ റോഡുകളും തെരുവുകളും ശുദ്ധിയാക്കാൻ നിയോഗിച്ചു.  ഒരാൾക്ക്​ പമ്പിൽ  പെട്രോൾ അടിക്കുന്ന ജോലി നൽകി. 

രണ്ടുപേർ ബോധപൂർവം പരസ്​പരം വാഹനങ്ങൾ ഇടിപ്പിച്ച്​ റോഡിലൂടെ നീങ്ങിയതാണ്​ ഒരു കുറ്റം, മറ്റൊരു കേസിൽ ലൈസൻസ്​ ഇല്ലാത്ത യുവാവിന്​ വാഹനം ഒാടിക്കാൻ നൽകിയതിനാണ്​ ശിക്ഷ. ഇയാളുടെ ലൈസൻസ്​ ഒരു വർ​ഷത്തേക്ക്​ സസ്​പ​​െൻറ്​ ചെയ്​തിട്ടുമുണ്ട്​. നമ്പർ പ്ലേറ്റില്ലാത്ത വാഹനം കനത്ത ശബ്​ദമുണ്ടാക്കി ഒാടിച്ച്​ നാട്ടുകാർക്ക്​ ശല്യമുണ്ടാക്കിയതാണ്​ ഒരു പ്രതിയുടെ കുറ്റം. സാമൂഹിക സേവനത്തിനു പുറമെ ഇയാൾക്ക്​ 500 ദിർഹം പിഴയും ചുമത്തി. ലൈസൻസ്​ മൂന്നു മാസത്തേക്ക്​ റദ്ദാക്കി. 

സ്വന്തം ജീവിതത്തിനോ മറ്റുള്ളവരുടെ ജീവനോ അപകടം വരുത്താത്ത രീതിയിൽ മാന്യമായി വാഹനമോടിക്കാൻ ശീലിക്കണ​െമന്ന്​ അബൂദബി അറ്റോണി ജനറൽ അലി മുഹമ്മദ്​ അൽ ബലൂഷി യുവജന​ങ്ങളോട്​ ആഹ്വാനം ചെയ്​തു. അവധിക്കാലത്ത്​ യുവജനങ്ങൾക്കെതിരായ ഇത്തരം പരാതികൾ വർധിക്കുകയാണ്​. രക്ഷിതാക്കൾ മക്കളോട്​ അശ്രദ്ധമായി വാഹനമോടിക്കുന്നതി​​​െൻറ അപകടവും ഗതാഗത നിയമങ്ങൾ പാല​ിക്കേണ്ടതി​​​െൻറ ആവശ്യവും പറഞ്ഞ്​ ബോധ്യപ്പെടുത്തണം. 

യുവജനങ്ങളുടെ മനസിൽ പരിവർത്തനം സാധ്യമാക്കുക എന്ന ലക്ഷ്യത്തോടെയാണ്​ സാമൂഹിക സേവനത്തിന്​ നിയോഗിക്കുന്നത്​.  പിഴയോ  ആറു മാസത്തിൽ കുറവ്​ തടവോ മാത്രം ശിക്ഷ വിധിച്ചിരുന്ന കുറ്റങ്ങൾക്കാണ്​ ഇപ്പോൾ ഇത്തരം ചുമതല നൽകുന്നത്​. എന്നാൽ സാമൂഹിക സേവനം നിർവഹിക്കുന്നതിൽ വീഴ്​ച വരുത്തിയാൽ ​ഇക്കാര്യം കോടതിയുടെ ശ്രദ്ധയിൽ എത്തും. തടവു ശിക്ഷ അനുഭവിക്കേണ്ടിയും വരും.