അഡ്​നോക്​ അനുബന്ധ സ്​ഥാപനങ്ങളെല്ലാം  ഒരു ബ്രാൻഡിന്​ കീഴിലേക്ക്​

അബൂദബി: അബൂദബി നാഷനൽ ഒായിൽ കമ്പനിയുടെ (അഡ്​നോക്​) അനുബന്ധ സ്​ഥാപനങ്ങളെല്ലാം ഒരൊറ്റ ബ്രാൻഡിന്​ കീഴിലേക്ക്​ കൊണ്ടുവരുന്നു. ഇതോടനുബന്ധിച്ച്​ അബൂദബിയിലെ അഡ്​നോക്​ ആസ്​ഥാനത്ത്​ സംഘടിപ്പിച്ച ഞായറാഴ്​ച ആഘോഷത്തിൽ സഹമന്ത്രിയും അഡ്​നോക്​ ഗ്രൂപ്പ്​ ചീഫ്​ എക്​സിക്യൂട്ടീവുമായ സുൽത്താൻ ആൽ ജാബിറാണ്​ കമ്പനിയുടെ പുതിയ ഘടന പ്രഖ്യാപിച്ചത്​. കമ്പനിയുടെ സ്രോതസ്സുകൾ, പ്രവർത്തനങ്ങൾ, പങ്കാളികൾ എന്നിവയിൽനിന്ന്​ പരമാവധി മൂല്യം നേടുന്നതിന്​ കൂടുതൽ വാണിജ്യകേന്ദ്രീകൃതവും പ്രവർത്തനക്ഷമവുമാക്കുകയാണ്​ ബ്രാൻഡ്​ ഏകീകരണത്തി​​െൻറ ലക്ഷ്യം.

അഡ്​നോകി​​െൻറ പുതിയ ഘടനയുടെ ആഘോഷത്തിൽ ഗ്രൂപ്പ്​ ചീഫ്​ എക്​സിക്യൂട്ടീവ്​ സുൽത്താൻ ആൽ ജാബിർ, എഫ്.എൻ.സി കാര്യ സഹമന്ത്രി നൂറ ബിൻത് മുഹമ്മദ് അൽ കഅബി എന്നിവർ അഡ്​നോക്​ അംബാസഡർമാർക്കൊപ്പം

 

ഇതോടെ നിലവിൽ അഡ്​നോക്കി​​െൻറ 20 അനുബന്ധ കമ്പനികളും സംയുക്​ത സംരംഭങ്ങളും ഏകീകൃത ബ്രാൻഡിന്​ കീഴിൽ 16 ആയി കുറയും. സകൂം ഡെവലപ്​മ​െൻറ്​ കമ്പനിയും (സഡ്​കോ) അബൂദബി മറൈൻ ഒാപ​േററ്റിങ്​ കമ്പനിയും (അഡ്​മ^ഒപ്​കോ) സംയോജിപ്പിച്ച്​ അഡ്​നോക്​ ഒാഫ്​ഷോർ എന്ന പേരിലായിരിക്കും ഇനി അറിയപ്പെടുക. ഇവ ഏകീകരിക്കുന്ന നടപടികൾ നടന്നുകൊണ്ടിരിക്കുകയാണ്​. അബൂദബി നാഷനൽ ടാങ്കർ കമ്പനി (അഡ്​നാറ്റ്​കോ), പെട്രോളിയം സർവീസസ്​ കമ്പനി (ഇസ്​നാദ്​), അബൂദബി പെട്രോളിയം പോർട്ട്​സ്​ ഒാപറേറ്റിങ്​ കമ്പനി (ഇർശാദ്​) എന്നിവ ഒന്നിപ്പിക്കാനുള്ള പ്രക്രിയകൾ കഴിഞ്ഞ വർഷം അവസാനം ആരംഭിച്ചിട്ടുണ്ട്​. 4,000ത്തോളം ജീവനക്കാരാണ്​ ഇൗ കമ്പനികളിൽ ജോലി ചെയ്യുന്നത്​. ഗ്യാസ്​കോ എന്നറിയപ്പെടുന്ന അബൂദബി ഗ്യാസ്​ ഇൻഡസ്​ട്രീസ്​ അഡ്​നോക്​ ഗ്യാസ്​ പ്രോസസിങ്​ എന്ന പേരിലേക്ക്​ മാറ്റും. ഒാക്​സിഡൻറൽ പെട്രോളിയവുമായുള്ള സംയുക്​ത സംരംഭമായ അൽ ഹുസ്​ൻ ഗ്യാസ്​ അഡ്​നോക്​ സൂർ ഗ്യാസ്​ ആകും. നാഷനൽ ഡ്രില്ലിങ്​ കമ്പനി (എൻ.ഡി.സി) അഡ്​നോക്​ ഡ്രില്ലിങ്​ എന്ന പേരിലേക്ക്​ മാറ്റും. അതേസമയം, ആസ്​ട്രിയയിലെ ബൊറീലസുമൊത്തുള്ള പൊട്രോ കെമിക്കൽ സംയുക്​ത സംഭംഭമായ ബൊറൂജിന്​ ബ്രാൻഡ്​ മാറ്റം ബാധകമാക്കില്ല. ഇൗ ബ്രാൻഡ്​ മേഖലയിൽ അത്രമാത്രം പ്രശസ്​തി നേതിയതിനാലാണിത്​. 

പുരോഗമനാത്​മകവും പ്രവർത്തനാധിഷ്​ടിതവും വാണിജ്യകേന്ദ്രീകൃതവും നവീനവുമായ സംസ്​കാരം സൃഷ്​ടിക്കുന്നതിനുള്ള യത്​നങ്ങളെ പിന്തുണക്കാനാണ്​ ഏകീകൃത ബ്രാൻഡിങ്​ എന്ന്​ സുൽത്താൻ ആൽ ജാബിർ പറഞ്ഞു. പരമ പ്രധാനമായ ഇൗ മാറ്റം അഡ്​നോക്കി​​െൻറ വിജയത്തെ നിർവചിക്കുന്നതിനുള്ള വെല്ലുവിളിയും അവസരവും ആയേക്കുമെന്നും അദ്ദേഹം കൂട്ടിച്ചേർത്തു. 

കേന്ദ്രീകൃത നിയന്ത്രിത മാതൃകയിൽ ഒാരോ കമ്പനികൾക്കും പ്രവർത്തനത്തിന്​ സ്വയംഭരണാധികാരം ഉണ്ടായിരിക്കുമെന്ന്​ സുൽത്താൻ ആൽ ജാബിർ പറഞ്ഞു. എഫ്.എൻ.സി കാര്യ സഹമന്ത്രി നൂറ ബിൻത് മുഹമ്മദ് അൽ കഅബി,വിതരണക്കാർ, ഉപഭോക്​താക്കൾ, അഡ്​നോക്കി​​െൻറ അനുബന്ധ സ്​ഥാപനങ്ങളുമായി ബിസിനസ്​ നടത്തുന്ന വ്യക്​തികൾ, ഗ്രൂപ്പുകൾ എന്നിവരൊയൊന്നും ബ്രാൻഡ്​മാറ്റം ബാധിക്കില്ലെന്നും അദ്ദേഹം വ്യക്​തമാക്കി. 
പുതിയ സംവിധാനത്തിലേക്കുള്ള മാറ്റം ആഘോഷിച്ച്​ സംഘടിപ്പിച്ച പരിപാടിയിൽ 3,000ത്തോളം പേർ പ​െങ്കടുത്തു.