ഷാർജ എജുക്കേഷൻ അക്കാദമിയിൽ പ്രവേശനം ആരംഭിച്ചു
text_fields
ഷാർജ: യു.എ.ഇയിലെ അധ്യാപന രംഗത്ത് കരിയർ മുന്നോട്ടുകൊണ്ടുപോകാൻ ആഗ്രഹിക്കുന്നവർക്കായി വിവിധ പഠന കോഴ്സുകളിലേക്ക് പ്രവേശന നടപടികൾ ആരംഭിച്ച് ഷാർജ എജുക്കേഷൻ അക്കാദമി. മാർച്ച് 30 മുതൽ ഏപ്രിൽ 30 വരെ പ്രവേശന നടപടികൾ നീണ്ടുനിൽക്കുമെന്ന് അക്കാദമി അറിയിച്ചു. അധ്യാപന മേഖലയിൽ അധ്യാപകരുടെ പങ്ക് മെച്ചപ്പെടുത്താൻ ലക്ഷ്യമിടുന്ന അക്കാദമിക, പ്രഫഷനൽ പ്രോഗ്രാമുകളാണ് വാഗ്ദാനം ചെയ്യുന്നത്. ഉന്നത വിദ്യാഭ്യാസ, ശാസ്ത്ര ഗവേഷണ മന്ത്രാലയം അംഗീകരിച്ച എട്ട് അക്കാദമിക് പ്രോഗ്രാമുകളിലേക്ക് വരാനിരിക്കുന്ന സെമസ്റ്ററിൽ സീറ്റുകൾ ലഭ്യമാണ്.
കൂടാതെ ഏർളി ചൈൽഡ്ഹുഡ് വിദ്യാഭ്യാസത്തിലെ മൂന്ന് പ്രത്യേക പ്രഫഷനൽ ഡവലപ്മെന്‍റ് സർട്ടിഫിക്കേഷൻ പ്രോഗ്രാമുകൾക്ക് നേരത്തെ നാഷനൽ ക്വാളിഫിക്കേഷൻ സെന്‍റർ അംഗീകാരം നൽകിയിട്ടുണ്ട്. ഫിൽലാന്‍റിലെ യൂനിവേഴ്സിറ്റി ഓഫ് ഹെൽസിങ്കിയുമായി ചേർന്ന് വികസിപ്പിച്ച ബിരുദാനന്തര പ്രോഗ്രാമാണ് ഇതിൽ പ്രധാനപ്പെട്ടത്. അധ്യാപകരുടെ ശാസ്ത്രീയ ചിന്തകളും ക്രിയാത്മകതയും വർധിപ്പിക്കാനായി രൂപകൽപന ചെയ്തിരിക്കുന്നതാണ് ഈ കോഴ്സുകൾ.
കൂടാതെ കാനഡയിലെ ഒന്‍റാറിയോ ഇൻസ്റ്റിറ്റ്യൂട്ട് ഫോർ സ്റ്റഡീസ് ഇൻ എജുക്കേഷനുമായി ചേർന്ന് വികസിപ്പിച്ച പോസ്റ്റ് ഗ്രാജുവേറ്റ് ഡിപ്ലോമ ഇൻ എജുക്കേഷൻ ലീഡർഷിപ്പ് പ്രോഗ്രാമിലും പ്രവേശനം നേടാം. രാജ്യത്തുടനീളമുള്ള വിത്യസ്തരായ അധ്യാപകർക്ക് പ്രവേശനം ഉറപ്പാക്കാനായി ഇംഗ്ലീഷ്, അറബി ഭാഷകളിൽ മുഴുവൻ പ്രോഗ്രാമുകളും ലഭ്യമാകുമെന്ന് അധികൃതർ അറിയിച്ചു.