ആവേശമായി അഡിഹെക്​സ്​ ഇന്ന്​ കൊടിയിറങ്ങുന്നു

അബൂദബി: അറബ്​ ധീരതയുടെയും സാഹസികതയുടെയും അടയാളക്കൊടികൾ പാറിക്കുന്ന​ പതിനാറാമത്​ അന്താരാഷ്​ട്ര വേട്ട- കുതിരചമയ പ്രദർശനം -അഡിഹെക്​സ്​ ഇന്ന്​ സമാപിക്കും. 12ന്​ ആരംഭിച്ച പ്രദർശനം കാണാൻ ആയിരക്കണക്കിനാളുകളാണ്​ അബൂദബി നാഷനൽ എക്​സിബിഷൻ സ​​െൻററിലെത്തിയത്​​. അത്യാധുനിക വേട്ട ആയുധങ്ങൾ, ആകർഷകവും അതിധീരരുമായ വേട്ടമൃഗങ്ങൾ, കുതിര സവാരി ഉപകരണങ്ങൾ, വാഹനങ്ങൾ, അ​െമ്പയ്​ത്​ ഉപകരണങ്ങൾ എന്നിവയുടെ അതിനൂതന ശ്രേണിയാണ്​ ലോകത്തി​​​െൻറ പല ഭാഗങ്ങളിൽ നിന്നുള്ള കമ്പനികൾ എത്തിച്ചത്​.

പ്രായം വകവെക്കാതെ ആവേശപൂർവം എത്തിയ വയോധികരും ഫാൽക്കണുകളുടെയും വേട്ടനായ്​ക്കളുടെയും പ്രകടനങ്ങൾ ആസ്വദിച്ച്​ കുട്ടികളും മേളയെ ആഘോഷമാക്കി. ഒട്ടക-കുതിരയോട്ട മത്സരങ്ങളിൽ തൽപരനായ ദുബൈ കിരീടാവകാശി ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മത്​കൂം മേള നഗരിയിൽ എത്തിയത്​ ശ്രദ്ധേയമായി. പുത്തൻ ആയുധങ്ങളുടെയും കുതിര ചമയ വസ്​തുക്കളുടെയും വിവരങ്ങൾ ശൈഖ്​ ഹംദാൻ കൗതുക​പുർവം ചോദിച്ചറിഞ്ഞു. 

ഇമറാത്തി കരകൗശല വസ്​തുക്കളുടെയും വിഭവങ്ങളുടെയും പ്രദർശനവും വിതരണവും മേള നഗരിയിലുണ്ട്​. തത്സമയ ചിത്ര രചനയാണ്​ മറ്റൊരാകർഷണം. 
മനംമയക്കുന്ന സുഗന്ധ വസ്​തുക്കൾ തയ്യാറാക്കുന്നതിനുള്ള പരിശീലനം  നഗരിയാകെ പരിമളം പരത്തി. ലക്ഷക്കണക്കിന്​ ദിർഹത്തി​​​െൻറ മത്സരങ്ങളാണ്​ ഒാരോ ദിവസവും മേളയിൽ നടന്നത്​. 

ഡോ. സുബൈർ മേടമ്മൽ ഇക്കുറിയുമെത്തി
അബൂദബി: പതിവു തെറ്റിച്ചില്ല, കേരളത്തിലെ പ്രാപ്പിടിയൻ വിദഗ്​ദൻ ഡോ. സുബൈർ മേടമ്മൽ ഇക്കുറിയും അഡിഹെക്​സ്​ പ്രദർശനത്തിനെത്തി. കാലിക്കറ്റ് സർവ്വകലാശാല ജന്തുശാസ്ത്ര വിഭാഗത്തിൽ അസിസ്​റ്റൻറ്​ പ്രഫസറായ ഡോ. സുബൈർ ഇത്​ പതിനാറാം തവണയാണ്​ മേളയിൽ പ​െങ്കടുക്കുന്നത്​.  രണ്ടു പതിറ്റാണ്ടിലേറെയായി ഫാൽക്കൺ പക്ഷികളെ കുറിച്ച് പഠനം നടത്തുന്ന ഇദ്ദേഹം ബയോളജി ആൻഡ് ബിഹേവിയർ ഓഫ് ഫാൽക്കൺസ് എന്ന പുസ്തകവും ,ഫാൽക്കൺസ് ആൻഡ് ഫാൽക്കണറി ഇൻ മിഡിൽ ഇൗസ്​റ്റ്​ എന്ന ഡോക്യുമ​െൻററിയും തയ്യാറാക്കിയിട്ടുണ്ട്.

എമിറേറ്റ് ഫാൽക്കൺ ക്ലബ്ബിലെ അറബ്​ വംശജനല്ലാത്ത ഏക അംഗമാണ്​ താനെന്ന്​ സുബൈർ പറഞ്ഞു.  ലോകത്തി​​െൻറ വിവിധ ഭാഗങ്ങളിൽ ഫാൽക്കൺ   കോൺഫറൻസുകളിൽ  പങ്കെടുക്കാറുണ്ട്. വർഷങ്ങൾക്ക്​ മുൻപ്​ ജന്തുശാസ്ത്ര മേഖലയിലെ ജോലി തേടി അബൂദബിയിൽ  എത്തിയവേളയിൽ   അൽഖസ് നയിലുള്ള ഫാൽക്കൺ ഗവേഷണ ആശുപത്രിയിൽ    ജോലി അന്വേഷിച്ചെങ്കിലും  യോജിച്ച ജോലിയില്ലെന്നതിനാൽ ജർമ്മൻകാരനായ ആശുപത്രി മേധാവി മടക്കുകയായിരുന്നു.  ഇൗ സംഭവമാണ്​ ഫാൽക്കൺപക്ഷികളെ കുറിച്ച് വിശദമായി പഠന ഗവേഷണം നടത്തി ഡോക്​ടറേറ്റ്​ എടുക്കുന്നതിലേക്ക്​ നയിച്ചത്​.   ഫാൽക്കൺപക്ഷികളുടെ 15 തരം ശബ്ദങ്ങൾ റെക്കോഡ് ചെയ്തിട്ടുണ്ട്​.  

മലപ്പുറം തിരൂർ വാണിയന്നൂർ  മേടമ്മൽ കുഞ്ഞൈദ്രു ഹാജിയുടെയും ,കെ ബി ഫാത്തിമയുടെയും മകനാണ്.​ വളവന്നൂർ ബാഫഖി യതീംഖാന ഹയർസെക്കൻഡറി സ്കൂൾ പ്ലസ് ടു അധ്യാപിക സജിതയാണ് ഭാര്യ. ആദിൽസുബൈർ , അമൽ സുബൈർ,   അൽഫ സുബൈർ എന്നിവർ മക്കളാണ് .