ഉമ്മുൽ ഖുവൈനിൽ വാഹനാപകടം: മൂന്ന്​ മരണം

ദുബൈ: ഉമ്മുൽ ഖുവൈൻ എമിറേറ്റ്​സ്​ റോഡിൽ ചൊവ്വാഴ്​ച നടന്ന വാഹനാപകടത്തിൽ മൂന്ന്​ ഏഷ്യൻ വംശജർ മരണപ്പെട്ടു. രണ്ട്​ ട്രക്കുകൾ കൂട്ടിയിടിച്ചുണ്ടായ അപകടത്തിൽ തൽക്ഷണ മരണമാണ്​ സംഭവിച്ചത്​. ഇടിച്ച വാഹനങ്ങളിൽ മൂന്നു പേർ കുടുങ്ങിക്കിടക്കുന്നു എന്ന സന്ദേശം ലഭിച്ച്​ ഉമ്മുൽ ഖുവൈൻ സിവിൽ ഡിഫൻസ്​ സംഭവ സ്​ഥലത്ത്​ പാഞ്ഞെത്തി രക്ഷാ പ്രവർത്തനം ആരംഭിക്കുകയായിരുന്നുവെന്ന്​ ഡിവിൽ ഡിഫൻസ്​ ഡി.ജി കേണൽ ഹസൻ അലി മുഹമ്മദ്​ ബിൻ സുർമ്​ അറിയിച്ചു. അത്യാധുനിക ഉപകരണങ്ങളുടെ സഹായത്തോടെയാണ്​ ശരീരങ്ങൾ വാഹനങ്ങളിൽ നിന്ന്​ പുറത്തെത്തിച്ചത്​. മ​ൃതദേഹങ്ങൾ ശൈഖ്​ ഖലീഫ ആശുപത്രിയിലേക്ക്​ മാറ്റി. ഗതാഗത നിയമങ്ങൾ പാലിക്കുകയും കൂട്ടി ഇടി ഒഴിവാക്കാൻ വാഹനങ്ങൾക്കിടയിൽ സുരക്ഷാ അകലം കൃത്യമായി സൂക്ഷിക്കുകയും വേണമെന്ന്​ കേണൽ ബിൻ സുർമ്​ യാത്രികരോട്​ അഭ്യർഥിച്ചു.