കൂറ്റൻ ടാങ്കിൽ വീണ ഉ​േദ്യാഗസ്​ഥനെ ദുബൈ പൊലീസ്​ രക്ഷപ്പെടുത്തി

ദുബൈ: പരിശോധനക്കിടെ കൂറ്റൻ ടാങ്കിൽ വീണുപോയ ഉ​േദ്യാഗസ്​ഥനെ ദുബൈ പൊലീസ്​ അടിയന്തിര സേവന സംഘം രക്ഷപ്പെടുത്തി. ദുബൈ ക്രീക്കിലെ അഗ്​നിശമന പ്രവർത്തനത്തിനുപയോഗിക്കുന്ന പത നിറഞ്ഞ 11 മീറ്റർ ഉയരമുള്ള ടാങ്കിലാണ്​ ഇൻസ്​പെക്​ടർ വീണത്​.  വിവരമറിഞ്ഞതും ദുബൈ പൊലീസി​​െൻറ നാവിക രക്ഷാ^ഉന്നത ദൗത്യ സംഘത്തിൽ നിന്നുള്ള രക്ഷാ പ്രവർത്തകർ പറന്നെത്തുകയായിരുന്നു. നിമിഷങ്ങൾക്കകം കരകയറ്റുകയും ചെയ്​തു.

ഏറെ വെല്ലുവിളി നിറഞ്ഞതായിരുന്നു രക്ഷാ പ്രവർത്തനമെന്ന്​  ചുമതല വഹിച്ച ​ലഫ്​. കേണൽ അലി അൽ ഖസ്സീബ്​ അൽ നഖ്​ബി പറഞ്ഞു. ടാങ്കിനുള്ളിൽ ഒാക്​സിജൻ കുറവായിരുന്നു. അകത്തേക്ക്​ കടക്കാനുള്ള ദ്വാരവും ചെറുതായിരുന്നു. 11 മീറ്റർ വലിപ്പമുള്ള ടാങ്കിൽ 4 മീറ്റർ ഉയരത്തിലാണ്​ ദ്രാവകമുണ്ടായിരുന്നത്​. അകത്തുപെട്ട ഉദ്യോഗസ്​ഥന്​ കൃത്രിമ ശ്വാസം നൽകി. പിന്നീട്​ ശുദ്ധവായു നിറച്ച ബലൂണുകളും കപ്പിയും ഉപയോഗിച്ച്​ അദ്ദേഹത്തെ പുറത്തെത്തിച്ച്​ ആംബുലൻസിലേക്ക്​ മാറ്റി. ആരോഗ്യ നില തൃപ്​തികരമാണെന്ന്​ അധികൃതർ വ്യക്​തമാക്കി.