അബൂദബിയിൽ 44 വാഹനങ്ങൾ കൂട്ടിയിടിച്ചു; 22 പേർക്ക്​ പരിക്ക്​

അബൂദബി: അബൂദബി ശൈഖ്​ മുഹമ്മദ്​ ബിൻ റാശിദ്​ സ്​ട്രീറ്റിൽ 44 വാഹനങ്ങൾ കൂട്ടിയിടിച്ച അപകടത്തിൽ 22 പേർക്ക്​ പരിക്കേറ്റു. രണ്ടുപേരുടെ പരിക്ക്​ ഗുരുതരമാണ്​. രണ്ടു​േപർക്ക്​ ഇടത്തരം പരിക്കുണ്ട്​. 18 പേരുടെ പരിക്ക്​ സാരമുള്ളതല്ല. ഒരാളുടെ കണ്ണിനാണ്​ ഗുരുതരമായ പരിക്ക്​.
ചൊവ്വാഴ്​ച രാവിലെ എ​േട്ടാടെയാണ്​ അപകടം. മൂടൽമഞ്ഞ്​ കാരണം കാഴ്​ചാപരിധി കുറഞ്ഞതാണ്​ അപകടത്തിലേക്ക്​ നയിച്ചത്​. ശൈഖ് മുഹമ്മദ് ബിന്‍ സായിദ് റോഡില്‍ ദുബൈ^അബൂദബി അതിര്‍ത്തിയോടുത്താണ് സംഭവം. മൂടല്‍മഞ്ഞില്‍ ജോലിസ്ഥലത്തേക്ക് പോയവരുടെ വാഹനങ്ങള്‍ ഒന്നിന് പിറകെ ഒന്നായി കൂട്ടിയിടിക്കുകയായിരുന്നു. 

പല വാഹനങ്ങളും തൊട്ടുമുന്നില്‍ മറ്റൊരു വാഹനം അപകടത്തില്‍പെട്ട് കിടക്കുന്നത് അറിയാതെ അവയിലേക്ക് ഇടിച്ച് കയറി. അപകടത്തെ തുടർന്ന്​ വാഹനങ്ങൾ അൽ സംഹ പാലം ഇ^11 ശൈഖ്​ മഖ്​തൂം ബിൻ റാശിദ്​ റോഡ്​ വഴി തിരിച്ചുവിട്ടു.  പരിക്കേറ്റവരെ ആംബുലന്‍സിലും സിവില്‍ ഡിഫന്‍സി​​​​െൻറ വാഹനങ്ങളിലുമായി ആശുപത്രിയിലേക്ക് മാറ്റി. റോഡില്‍ തകര്‍ന്നുകിടന്ന 44 വാഹനങ്ങള്‍ നീക്കം ചെയ്യാന്‍ വൻ സന്നാഹം ആവശ്യമായിവന്നു. എമിറേറ്റി​​​​െൻറ വിവിധ ഭാഗങ്ങളിൽ ചൊവ്വാഴ്​ച വലിയ തോതിൽ മഞ്ഞ്​ മൂടിയിരുന്നു. മഞ്ഞുള്ള സമയത്ത്​ വാഹനങ്ങൾ ശ്രദ്ധാപൂർവം ഒാടിക്കണമെന്നും അമിത വേഗത ഒഴിവാക്കണമെന്നും അബൂദബി പൊലീസ്​ മുന്നറിയിപ്പ്​ നൽകി. 

വാഹനമോടിക്കുന്നവർ അപകടമുണ്ടായിടത്തേക്ക്​ അനാവശ്യമായി നോക്കരുതെന്നും (റബർ നെക്ക്​) ഇത്​ കൂടുതൽ അപകടത്തിലേക്ക്​ നയിക്കുമെന്നും പൊലീസ്​ അറിയിച്ചു. രാവിലെ 6.30 മുതല്‍ 9.30 വരെയും വൈകുന്നേരം മൂന്ന് മുതല്‍ ആറ് വരെയും വലിയ ട്രക്കുകൾ പ്രധാന റോഡുകളിലൂടെ സഞ്ചരിക്കുന്നത്​ ഒഴിവാക്കാനും പൊലീസ് നിര്‍ദേശിച്ചു.