കുടുംബത്തോടൊപ്പം നീന്തിത്തുടിക്കാന്‍ അബൂദബി നീന്തല്‍ മേള

അബൂദബി: മത്സരത്തോടൊപ്പം കുടുംബത്തെയും കൂട്ടി ആഹ്ളാദപൂര്‍വം നീന്താനുള്ള അവസരമായി അബൂദബി സ്വിമ്മിങ് ഫെസ്റ്റിവല്‍ എത്തുന്നു. ഒക്ടോബര്‍ 29ന് എമിറേറ്റ്സ് പാലസ് പരിസരത്തെ ബീച്ചിലാണ് മത്സരം നടക്കുക. എട്ട് വയസ്സ് മുതലുള്ളവര്‍ക്ക് പങ്കെടുക്കാം. അബൂദബി മൈല്‍, അബൂദബി സ്പ്ളാഷ് ഡാഷ്, ജൂനിയര്‍ സ്പ്ളാഷ് ഡാഷ്, റിലേ, ഫാമിലി ഫണ്‍ ചാലഞ്ച് വിഭാഗങ്ങളിലാണ് മത്സരം. ജൂനിയര്‍ സ്പ്ളാഷ് ഡാഷില്‍ എട്ട് മുതല്‍ ഒമ്പത് വരെ വയസ്സുള്ളവര്‍ക്ക് 100 മീറ്റര്‍, പത്ത് മുതല്‍ 11 വരെ വയസ്സുള്ളവര്‍ക്ക് 300 മീറ്റര്‍, 12 മുതല്‍ 14 വരെ വയസ്സുള്ളവര്‍ക്ക് 500 മീറ്റര്‍ മത്സരങ്ങളുണ്ടാവും. അബൂദബി സ്പ്ളാഷ് ഡാഷില്‍ 800 മീറ്റര്‍ മത്സരമാണുണ്ടാവുക. 14നും മുകളിലും  വയസ്സുള്ളവര്‍ക്ക് പങ്കെടുക്കാം. 16നും മുകളിലും വയസ്സുള്ളവര്‍ അബൂദബി മൈലില്‍ പങ്കെടുക്കാം. 1600 മീറ്ററാണ് ഈയിനത്തില്‍ നീന്തേണ്ടത്.  കുടുംബത്തോടൊപ്പം നീന്തേണ്ടവര്‍ക്ക് ഫാമിലി ഫണ്‍ ചാലഞ്ചില്‍ പങ്കെടുക്കാം. രക്ഷിതാക്കള്‍ 300 മീറ്ററും കുട്ടികള്‍ 100 മീറ്ററുമാണ് ഈ മത്സരത്തില്‍ നീന്തേണ്ടത്. മുതിര്‍ന്നവര്‍ക്കുള്ള 4x300 മീറ്റര്‍ റിലേയും സംഘടിപ്പിക്കും. കൂടുതല്‍ വിവരങ്ങള്‍ക്കും മത്സരത്തിന് രജിസ്റ്റര്‍ ചെയ്യാനും  www.swimabudhabi.com.