അബൂദബി പുസ്​തകമേള: പുസ്​തകം വാങ്ങാൻ മുഹമ്മദ്​ ബിൻ സായിദ്​ 60 ലക്ഷം ദിർഹം അനുവദിച്ചു

അബൂദബി: അബൂദബി അന്താരാഷ്​ട്ര പുസ്​തകമേളയിൽനിന്ന്​ യു.എ.ഇയിലെ സ്​കൂൾ ലൈബ്രറികളിലേക്ക്​ ആവശ്യമായ പുസ്​തകങ്ങളും പഠനോപകരണങ്ങളും വാങ്ങാൻ അബൂദബി കിരീടാവകാശിയും യു.എ.ഇ സായുധ സേനാ ഡെപ്യൂട്ടി സുപ്രീം കമാൻഡറുമായ ജനറൽ ശൈഖ് മുഹമ്മദ് ബിൻ സായിദ് ആൽ നഹ്​യാൻ 60 ലക്ഷം ദിർഹം അനുവദിച്ചു. യുവജനങ്ങൾക്കിടയിൽ വായനയോടുള്ള താൽപര്യം ഉറപ്പിച്ചു നിർത്തുക, പുസ്​തകങ്ങളുടെ മൂല്യ​ത്തെ കുറിച്ചുള്ള ബോധ്യം സൃഷ്​ടിക്കുക തുടങ്ങിയ ലക്ഷ്യങ്ങളോടെയാണ്​ വൻ തുകക്കുള്ള പുസ്​തകങ്ങൾ വാങ്ങുന്നത്​. 

ശൈഖ് മുഹമ്മദ് ബിൻ സായിദ് ആൽ നഹ്​യാ​​​െൻറ രക്ഷാകർതൃത്വത്തിൽ നടക്കുന്ന അബൂദബി അന്താരാഷ്​ട്ര പുസ്​തകമേള മൂല്യമേറിയ സാംസ്​കാരിക വേദിയാണെന്ന്​ വിദ്യാഭ്യാസ മന്ത്രി ഹുസൈൻ ബിൻ ഇബ്രാഹിം ആൽ ഹമ്മാദി അഭിപ്രായപ്പെട്ടു. വിജഞാനം വ്യാപിപ്പിക്കാനും വ്യത്യസ്​ത രാജ്യങ്ങളിലെ പ്രസാധനാലയങ്ങൾ തമ്മിലെ സഹകരണം വർധിപ്പിക്കാനുമുള്ള അക്ഷീണമായ പ്രയത്​നങ്ങളിൽ പുസ്​തകമേള നിർണായകമാണെന്നും അദ്ദേഹം പറഞ്ഞു.