ഒന്നര വർഷത്തിനുശേഷം കാണികൾ ഇന്ന്​ ഗാലറിയിൽ

ദുബൈ: ഒന്നര വർഷത്തിനുശേഷം യു.എ.ഇയിലെ ഫുട്​ബാൾ ഗാലറിയിലേക്ക്​ ഇന്ന്​ കാണികളെത്തും. യു.എ.ഇയിലെ പ്രശസ്​ത ഫുട്​ബാൾ ടൂർണമെൻറായ പ്രസിഡൻഷ്യൽ കപ്പ്​ ഫുട്​ബാളി​െൻറ ഫൈനലിനാണ്​ 30 ശതമാനം കാണികളെ അനുവദിച്ചത്​. വാക്​സിനെടുത്തവർക്ക്​ മാത്രമാണ്​ പ്രവേശനം.

ഹസ ബിൻ സായിദ്​ സ്​റ്റേഡിയത്തിലാണ്​ മത്സരം. വാക്​സിനെടുത്തവർക്ക്​ മാത്രം പ്രവേശനം അനുവദിച്ച ആദ്യ ഔദ്യോഗിക പരിപാടിയാണിത്​. യു.എ.ഇയിലെ പ്രമുഖ ക്ലബുകളായ ഷബാബ്​ അൽ അഹ്​ലിയും അൽനാസർ ക്ലബും തമ്മിലാണ്​ മത്സരം. കോവിഡ്​ മൂലം കഴിഞ്ഞ സീസൺ മത്സരങ്ങൾ നടന്നിരുന്നില്ല.

ഗാലറിയിൽ ക്രമീകരണങ്ങൾ പൂർത്തിയാക്കി. രണ്ട്​ ടീമുകളു​ടെയും കാണികളെ രണ്ട്​ വശങ്ങളിലായാണ്​ ഇരുത്തുന്നത്​. ഓരോ സീറ്റുകൾക്കും ഇടയിൽ നിശ്ചിത അകലമുണ്ടായിരിക്കും. കാണികൾ കോവിഡ്​ വാക്​സി​െൻറ രണ്ട്​ ഡോസും പൂർത്തിയാക്കിയിരിക്കണം. മാത്രമല്ല, അൽ ഹൊസൻ ആപ്പിൽ 'ഇ' സ്​റ്റാറ്റസ്​ ഉണ്ടായിരിക്കണമെന്നും നിബന്ധനയുണ്ട്​. മത്സരത്തിന്​ 48 മണിക്കൂറിനുള്ളിലെടുത്ത കോവിഡ്​ നെഗറ്റിവ്​ സർട്ടിഫിക്കറ്റ്​ ഹാജരാക്കണം. യു.എ.ഇ ഫുട്​ബാൾ അസോസിയേഷനും ദേശീയ ദുരന്ത നിവാരണ സമിതിയും ചേർന്നാണ്​ തീരുമാനം നടപ്പാക്കുന്നത്​.

യു.എ.ഇയിലെ കായിക മത്സരങ്ങൾക്ക്​ കാണികളെ പ്രവേശിപ്പിക്കുന്നതി​െൻറ സൂചനകളാണ്​ ഇത്​ നൽകുന്നത്​. ഇത്​ പരീക്ഷണമായാണ്​ നടത്തുന്നതെന്നും വിജയകരമായാൽ ജൂണിൽ നടക്കുന്ന ഏഷ്യൻകപ്പ്​ - ലോകകപ്പ്​- യോഗ്യത മത്സരങ്ങളിലും കാണികളെ അനുവദിക്കുമെന്നും യു.എ.ഇ ഫുട്​ബാൾ ഫെഡറേഷൻ അറിയിച്ചു. നേരത്തെ, യു.എ.ഇയിലെ വിവിധ കായിക മത്സരങ്ങളിൽ കാണികൾക്ക്​ നിയന്ത്രണങ്ങളോടെ അനുമതി നൽകിയിരുന്നു. എന്നാൽ, വീണ്ടും കോവിഡ്​ വ്യാപകമായതോടെ പിന്നീടുള്ള മത്സരങ്ങളിൽനിന്ന്​ കാണികളെ ഒഴിവാക്കുകയായിരുന്നു.ഐ.പി.എല്ലും ക്രിക്കറ്റ്​ ലീഗുകളും രാജ്യാന്തര സൗഹൃദ ഫുട്​ബാൾ മത്സരങ്ങളും നടത്തിയെങ്കിലും കാണികൾക്ക്​ പ്രവേശനമുണ്ടായിരുന്നില്ല.