1.2 ലക്ഷം ദിർഹം കൊള്ളയടിച്ച നാലംഗ സംഘത്തിന്​ തടവ്​

ദുബൈ: കത്തികാണിച്ച്​ ഭീഷണിപ്പെടുത്തി 1.2 ലക്ഷം ദിർഹം കൊള്ളയടിച്ച നാലംഗ സംഘത്തിന്​ കോടതി തടവുശിക്ഷ വിധിച്ചു. ജൂൺ മാസത്തിലാണ്​ കേസിനാസ്പദമായ സംഭവമുണ്ടായത്​. 24 കിലോ സ്വർണം വിൽക്കാനുണ്ടെന്ന്​ പറഞ്ഞ്​ വിളിച്ചുവരുത്തിയാണ്​ സംഘം ഇയാളെ കൊള്ളയടിച്ചത്​. സ്വർണം വാങ്ങാൻ പണവുമായി അൽ നഹ്​ദയിലെ പ്രത്യേക സ്ഥലത്ത്​ എത്തിച്ചേരാൻ സംഘത്തിലെ സ്ത്രീ ആവശ്യപ്പെടുകയായിരുന്നു. എന്നാൽ, ഇവിടെയെത്തിയ ഇദ്ദേഹത്തെ സംഘം കത്തി കാണിച്ച്​ ഭീഷണിപ്പെടുത്തി പണം നൽകാൻ ആവശ്യപ്പെട്ടു. നൽകാതിരുന്നപ്പോൾ ബാഗ്​ കുത്തി​ത്തുറന്ന്​ പണവുമായി കടന്നുകളയുകയായിരുന്നു. പൊലീസിൽ നൽകിയ പരാതിയെ തുടർന്ന്​ നടന്ന അന്വേഷണത്തിൽ അതിവേഗം പ്രതികൾ വലയിലായി. കുറ്റകൃത്യം ആസൂത്രണം ചെയ്തത്​ മറ്റൊരു കൂട്ടാളിയാണെന്നും ഇത് നടപ്പാക്കാൻ ഓരോരുത്തർക്കും 6000 ദിർഹം മാത്രമാണ്​ നൽകിയതെന്നുമാണ്​ ഇവർ നൽകിയ മൊഴി. നാലുപേർക്കും ഒരു വർഷം തടവും നാടുകടത്തലുമാണ്​ ശിക്ഷ വിധിച്ചിട്ടുള്ളത്​. പ്രതികൾ മോഷ്ടിച്ച പണം തിരിച്ച്​ ഉടമക്ക്​ നൽകാനും കോടതി ഉത്തരവിട്ടു.