തീരാത്ത കാഴ്​ചകളിൽ ഒരുദിനം

മശ്ഹൂദ് പൊന്നാനി

എട്ടുവർഷം മുമ്പ്​ ഷാർജയിൽ സന്ദർശകവിസയിൽ എത്തിയ സമയത്താണ് എക്സ്പോ 2020ന്​ ദുബൈ വേദിയാകുമെന്ന് അറിയുന്നത്. അന്ന് തുടങ്ങിയ ആകാംക്ഷയാണ്. ഉദ്ഘാടനച്ചടങ്ങ് ലൈവ് ആയി യൂട്യൂബിൽ കണ്ടപ്പോൾ ആകാംക്ഷ ഇരട്ടിയായി. അങ്ങനെയാണ്​ ഇക്കഴിഞ്ഞ വെള്ളിയാഴ്​ച കൂടെ താമസിക്കുന്ന സുഹൃത്തുക്കളായ ഫസ്‌റിൻ, ജാബിർ എന്നിവർക്കൊപ്പം​ മേളക്ക് പോയത്. മെട്രോ സ്​റ്റേഷൻ മുതൽ എക്സ്പോ നഗരി ജനനിബിഡമായിരുന്നു. 'ഹയ്യാകും' വളൻറിയേഴ്‌സ് മെഗാഫോണിലൂടെ സന്ദർശകരെ സ്വാഗതംചെയ്യുകയും നിർദേശങ്ങൾ അറിയിക്കുകയും ചെയ്യുന്നു. വളരെ പെട്ടെന്ന് പ്രവേശന നടപടികൾ കഴിഞ്ഞു. ഏതു പവലിയൻ സന്ദർശിക്കണം എന്ന ആശയക്കുഴപ്പത്തിനിടെ നേരെ ലക്​സംബർഗ് ലക്ഷ്യമാക്കി നീങ്ങി. 'വെൽകം ടു ലക്​സംബർഗ്' വളൻറിയേഴ്​സ്​ സ്വാഗതം ചെയ്​തു. അവിടത്തെ വിദേശികൾ അവരുടെ കഥ പറയുന്ന സ്‌ക്രീനുകളാണ് ആദ്യം വരവേറ്റത്. തുടർന്ന് രസകരമായ ഫൺ റൈഡും ത്രില്ലിങ്​ ആയിരുന്നു.

നേരെ യുക്രെയിൻ ലക്ഷ്യമാക്കി നീങ്ങി. രാജ്യത്തെ സാങ്കേതിക മികവുകളും വ്യാപാരമുന്നേറ്റവും അവിടെ പ്രദർശിപ്പിച്ചിരിക്കുന്നു. അടുത്ത പവലിയനിൽ കൈകൂപ്പിക്കൊണ്ട് ഇന്തോനേഷ്യയിലെ വളൻറിയേഴ്‌സ് സ്വീകരിച്ചു. ഇവിടത്തെ പ്രധാന വിനോദസഞ്ചാര കേന്ദ്രങ്ങളെ പരിചയപ്പെടുത്തുന്ന തിയറ്റർ പ്രദർശനം ശ്രദ്ധേയമാണ്. തങ്ങളുടെ വൈവിധ്യം നിറഞ്ഞ സംസ്​കാരത്തെ പാകിസ്​താൻ പവലിയൻ പരിചയപ്പെടുത്തുന്നു. ലബനൻ, ഒാസ്ട്രിയ, ബ്രൂണെ, യു.കെ, സുഡാൻ തുടങ്ങിയ എട്ട് രാജ്യങ്ങളുടെ പവലിയനുകളാണ് ആദ്യ ദിനം സന്ദർശിക്കാൻ സാധിച്ചത്. കൂടാതെ നേട്ടങ്ങൾ എണ്ണിപ്പറഞ്ഞ ജി.സി.സി പവലിയനും വേൾഡ് എക്സ്പോ പവലിയനും സന്ദർശിക്കാൻ സാധിച്ചു. അതിനിടയിൽ ആകാശത്ത്​ വർണവിസ്​മയമൊരുക്കി ബ്രിട്ട​െൻറ റോയൽ എയർഫോഴ്​സ്​ ടീമിലെ 'റെഡ് ആരോസ്' അണിയിച്ചൊരുക്കിയ എയർഷോ കാതിനും കണ്ണിനും കുളിർമയേകി. സാങ്കേതികവിദ്യയുടെ കൂടി ആഘോഷമാണ് ദുബൈ എക്സ്പോ. മികച്ച ഓഡിയോ വിഷ്വൽ ടെക്നോളജി ഉപയോഗപ്പെടുത്തിയാണ്​ രാജ്യങ്ങൾ അവരുടെ പ്രദർശനം കാഴ്​ചക്കാർക്ക് മുന്നിൽ അവതരിപ്പിച്ചിരിക്കുന്നത്​. നഗരിയിലെ എല്ലാ ഭാഗത്തും കുടിവെള്ളവും സാനിറ്റൈസറും ലഭ്യമാണ്.

വ്യക്‌തമായ നിർദേശങ്ങളുമായി വളൻറിയേഴ്‌സ് നിരന്നുനിൽക്കുന്നു. റോബോട്ടുകളും കൗതുകകാഴ്‌ചയാണ്‌. ഇലക്ട്രോണിക് വാഹനങ്ങളിൽ പൊലീസ്, ആംബുലൻസ് സംവിധാനങ്ങൾ കർമസജ്ജരായി നഗരിയിലുണ്ട്​. അവധി ദിനം ആയതിനാൽ വലിയ തിരക്കായിരുന്നു ഓരോ പവലിയനിലും. നീണ്ട വരികാരണം ഇന്ത്യ, യു.എ.ഇ, സൗദി, സ്വിറ്റ്സർലൻഡ്, ഈജിപ്​ത്​, ഫലസ്​തീൻ, ചൈന, നോർവെ എന്നിവ പുറത്തുനിന്ന് വീക്ഷിക്കാനേ സാധിച്ചുള്ളൂ. ഇറാഖ് പവലിയൻ തുറന്നില്ലെന്ന അറിയിപ്പാണ് ലഭിച്ചത്. അൽ വസ്​ൽ ഡോമിലെ 360 ഡിഗ്രി പ്രോജക്​ഷൻ സ്ക്രീനിലെ ഷോ അനുഭവിച്ചറിയേണ്ട വിഷ്വൽ ട്രീറ്റ് തന്നെയാണ്. നമ്മുടെ സങ്കൽപങ്ങൾക്ക്‌ അപ്പുറമാണ് എക്സ്പോ കാഴ്​ചകൾ ഓരോന്നും. നിർമിതിയിലെ വിസ്​മയങ്ങളാണ് ഓരോ പവലിയനുകളും. ഓരോന്നും ഒന്നിനൊന്ന് മെച്ചം. വ്യത്യസ്​തഭാഷകൾ, സംസ്​കാരങ്ങൾ, വേഷങ്ങൾ ആണെങ്കിലും ഒരുമിച്ചുകൂടിയാൽ എല്ലാവരും ഒന്ന് എന്ന സന്ദേശമാണ് എക്സ്പോ നൽകുന്നത്. കാണാത്ത കാഴ്ചകൾക്കായി ഇനി അടുത്ത ദിവസത്തെ സന്ദർശനത്തിനുള്ള കാത്തിരിപ്പിലാണിപ്പോൾ.