77 കിലോമീറ്റർ നീളത്തിൽ ഡ്രൈനേജ്​ ശൃംഖല, രണ്ട്​ തുരങ്കപാത; ഫുജൈറയിൽ ഉൾറോഡുകൾ​ വികസിപ്പിക്കുന്നു

ഫുജൈറ: എമിറേറ്റിലെ നിരവധി ഉൾറോഡുകൾ വികസിപ്പിക്കുന്നതിനായി പ്രഖ്യാപിച്ച പദ്ധതിയുടെ ഒമ്പതാം ഘട്ടത്തിന്​ തുടക്കം. 31 കിലോമീറ്റർ നീളമുള്ള വികസന പദ്ധതിയിൽ ദിബ്ബ അൽ ഫുജൈറ, അൽ ഹൈൽ, ഖറാത്ത്​, ഖിദ്​ഫ, വാദി അൽ സിദ്​ർ, സെയ്​ജി, തുബാൻ, ഹബാബ്​, അൽ ഖരിയ, വാദി സഹം, അൽ ഫർഫാർ, ഔഹാല എന്നീ ഇടറോഡുകളാണ്​ ഉൾപ്പെടുന്നത്​.

പദ്ധതിക്ക്​ കീഴിൽ 77 കിലോമീറ്റർ നീളത്തിൽ ഡ്രൈനേജ്​ ശൃംഖലയും നിർമിക്കുമെന്ന്​ ഫുജൈറ പൊതുമരാമത്ത്​, കാർഷിക ഡിപാർട്ട്​മെന്‍റ്​ വകുപ്പ്​ ഡയറക്ടർ സലിം മുഹമ്മദ്​ അലി അൽ മക്സാ പറഞ്ഞു. രണ്ട്​ തുരങ്കപാതയാണ്​ പദ്ധതിയിലൂടെ നിർമിക്കുക. അൽ ശരിയയിൽ 1.2 കിലോമീറ്റർ നീളത്തിലുള്ള ഒരു തുരങ്കവും ശൈഖ്​ ഖലീഫ​ ജനറൽ ആശുപത്രിയുടെ മുൻവശത്ത്​ 1.4 കിലോമീറ്റർ നീളത്തിലുള്ള മറ്റൊരു തുരങ്കവുമാണ്​ നിർമിക്കുന്നത്​.

കൂടാതെ ശൈഖ്​ സായിദ്​ റോഡിലും അൽ ഖുർഫ റോഡുകളിലും വെളിച്ച സംവിധാനങ്ങൾ, സൈൻ ബോർഡുകൾ, സ്​പീഡ്​ ബ്രേക്കറുകൾ, സൈഡ്​ പാർക്കിങ്​ ഇടങ്ങൾ, കാൽനട ക്രോസിങ്​, കോർണിഷുകളിൽ ട്രാഫിക്​ ലൈറ്റുകൾ എന്നിവ സ്ഥാപിക്കും. യു.എ.ഇ സുപ്രീം കൗൺസിൽ അംഗവും ഫുജൈറ ഭരണാധികാരിയുമായ ശൈഖ്​ ഹമദ്​ ബിൻ മുഹമ്മദ്​ അൽ ശർഖിയുടെ നിർദേശം അനുസരിച്ചാണ്​ പദ്ധതി നടപ്പിലാക്കുന്നതെന്ന്​ അധികൃതർ അറിയിച്ചു.