സന്നദ്ധ സേവനത്തി​െൻറ 40 വർഷങ്ങൾ; കെ.പി. മൂസ നാടണയുന്നു

ദുബൈ: നാലു പതിറ്റാണ്ടു​ മുമ്പ്​ കെ.പി. മൂസ ഷാർജയിൽ കാലുകുത്തു​േമ്പാൾ കൈയിലുണ്ടായിരുന്നത്​ ആത്മവിശ്വാസം മാത്രമായിരുന്നു.മുന്നിലെത്തിയ പ്രതിസന്ധികളെ അതിജീവിച്ച മൂസ 40 വർഷത്തെ പ്രവാസ ജീവിതത്തിന്​ വിരാമമിട്ട്​ നാട്ടിലേക്ക്​ മടങ്ങുന്നു.

1982ലാണ്​ കൊയിലാണ്ടി തിക്കോടി സ്വദേശി കെ.പി. മൂസ ബോംബെ വഴി ഷാർജയിലെത്തിയത്​. പ്രത്യേകിച്ച് ജോലി പരിജ്ഞാനമൊന്നും കൈയിലുണ്ടായിരുന്നില്ലെങ്കിലും എന്ത് ജോലിയും ചെയ്യാനുള്ള സന്നദ്ധതയുമായാണ് പ്രവാസം തുടങ്ങിയത്. കാര്യങ്ങൾ എളുപ്പമായിരുന്നില്ലെങ്കിലും കഠിനപ്രയത്നത്തിലൂടെ ഓരോ ഘട്ടവും കടന്നു​. റസ്​റ്റാറൻറിലും സൂപ്പർമാർക്കറ്റിലും അറബിയുടെ വീട്ടിലുമായി 25 വർഷം ജോലി ചെയ്​തു.

ഒടുവിൽ ദുബൈ മുനിസിപ്പാലിറ്റിയിൽ ഓഫിസ് ബോയ് ആയി ജോലി ലഭിച്ചു. അൽതവാറിലെ സൂപ്പർമാർക്കറ്റിലെ ജോലിക്കിടയിൽ പരിചയപ്പെട്ട അറബിയുടെ സഹായത്തോടെയാണ് ഈ ജോലി ലഭിച്ചത്. അവിടെ 15 വർഷം പൂർത്തിയാക്കിയാണ് ഇപ്പോൾ പ്രവാസത്തിന് വിരാമമിടുന്നത്. തന്നിലേൽപിക്കുന്ന ഏത് ജോലിയും കൃത്യതയോടെ സമയബന്ധിതമായി ചെയ്യാൻ സാധിച്ചതി​ന്​ പല അംഗീകാരങ്ങളും മൂസക്ക്​ ലഭിച്ചു. ജോലി ചെയ്യുന്ന ഓഫിസ് പരിസരത്ത് ഒരു മാവിൻ തൈ നട്ട്​ പരിപാലിച്ചിരുന്നു.

സാമൂഹിക പ്രവർത്തനങ്ങളിലും സജീവമായിരുന്നു. കെ.എം.സി.സിയുടെ നിരവധി ഘടകങ്ങളിൽ പല പദവികളും വഹിച്ചിട്ടുണ്ട്. കൊയിലാണ്ടി മണ്ഡലം കമ്മിറ്റി പ്രസിഡൻറ്​, കോഴിക്കോട് ജില്ല വൈസ് പ്രസിഡൻറ്​, സംസ്ഥാന കമ്മിറ്റിയംഗം എന്നീ നിലകളിൽ പ്രവർത്തിച്ചു.ഭാര്യ: ഷഫീക്കത്ത്. മക്കൾ: ഷംന, തഹദീർ, ഷജീഹ. മരുമക്കൾ: അഫ്സൽ ശ്യാം (അൽ ഇത്തിഹാദ്​), റമീസ് (അന്തമാൻ).