ദുബൈയിൽ 29,600 പുതിയ പാർക്കിങ്​ സ്ഥലങ്ങൾ ഒരുക്കുന്നു

ദുബൈ: നഗരത്തിൽ കൂടുതൽ പാർക്കിങ്​ സൗകര്യങ്ങൾ രൂപപ്പെടുത്തുന്നതിന്‍റെ ഭാഗമായി ‘പാർക്കിൻ’ 29,600 പുതിയ പാർക്കിങ്​ സ്ഥലങ്ങൾ ഒരുക്കുന്നു. ദുബൈയിലെ പൊതു പാർക്കിങ്​ നിയന്ത്രിക്കുന്ന കമ്പനിയായ ‘പാർക്കിൻ’, ദുബൈ ഹോൾഡിങ്​ കമ്പനിയുമായി സഹകരിച്ചാണ്​ പദ്ധതി നടപ്പിലാക്കുന്നത്​. സഹകരണ കരാറനുസരിച്ച്​ വിവിധ സ്ഥലങ്ങളിലെ പാർക്കിങ്​ നിയന്ത്രണം ‘പാർക്കിൻ’ ഏറ്റെടുക്കും. വിവിധ ഘട്ടങ്ങളായാണ്​ പുതിയ പാർക്കിങ്​ സ്ഥലങ്ങൾ സംവിധാനിക്കുക. ഏതെല്ലാം താമസ കേന്ദ്രങ്ങളിൽ പെയ്​ഡ്​ പാർക്കിങ്​ സംവിധാനം ആരംഭിക്കുമെന്നത്​ സംബന്ധിച്ച്​ അധികൃതർ വ്യക്​തമാക്കിയിട്ടില്ല.

നഗരത്തിൽ പാർക്കിങിന്​ സ്ഥലങ്ങൾ കൂടുതലായി ആവശ്യമായ സാഹചര്യത്തിലാണ്​ പുതിയ മേഖലകളിൽ സംവിധാനം ഏർപ്പെടുത്തുന്നതെന്ന്​ ‘പാർക്കിൻ’ വയക്​തമാക്കിയിട്ടുണ്ട്​. ദുബൈ ഹോൾഡിങുമായുള്ള സഹകരണം ഗതാഗതം മെച്ചപ്പെടുത്താനും തിരക്ക്​​ കുറക്കാനും സന്ദർശകരുടെയും താമസക്കാരുടെയും ദൈനംദിന യാത്രാനുഭവങ്ങൾ മെച്ചപ്പെടുത്താനും സഹായിക്കുമെന്ന്​ അധികൃതർ വ്യക്​തമാക്കി. സ്വകാര്യ കമ്മ്യൂണിറ്റികളിൽ കമ്പനിയുടെ നിയന്ത്രണത്തിലുള്ള പാർക്കിങ്​ സ്ഥലങ്ങളുടെ എണ്ണം പുതിയ പദ്ധതി പൂർത്തിയാകുന്നതോടെ 50,400 ആകും. ഇത്​ നിലവിലെ എണ്ണത്തിന്‍റെ ഇരട്ടിയിലേറെ വരും.

കമ്പനിയുടെ വിപുലീകരണ തന്ത്രത്തിലെ ഒരു നാഴിക്കല്ലാണ്​ ദുബൈ ഹോൾഡിങുമായുള്ള സഹകരണമെന്നും ദുബൈയുടെ തുടരുന്ന വികസനത്തെ സഹായിക്കുന്നതിന്​ അനിവാര്യമായ അടിസ്ഥാന സൗകര്യങ്ങൾ വികസിപ്പിക്കുന്നതിനുള്ള പ്രതിബദ്ധതയെ ഇത്​ അടയാളപ്പെടുത്തുന്നുവെന്നും ‘പാർക്കിൻ’ ചീഫ്​ എക്സി. മുഹമ്മദ്​ അബ്​ദുല്ല അൽ അലി പറഞ്ഞു.

എമിറേറ്റിലെ പാർക്കിങ്​ സൗകര്യങ്ങൾ നിയന്ത്രിക്കുന്നതിനാണ്​ കഴിഞ്ഞ വർഷം ജനുവരിയിൽ ദുബൈ സർക്കാർ ‘പാർക്കിൻ’ കമ്പനി രൂപപ്പെടുത്തിയത്​. എമിറേറ്റിൽ നിലവിൽ തന്നെ രണ്ട്​ ലക്ഷത്തിലധികം പാർക്കിങ്​ സ്ഥലങ്ങൾ കമ്പനിയുടെ നിയന്ത്രണത്തിലുണ്ട്​. പൊതു പാർക്കിങ്​, പൊതു മൾടി സ്​റ്റോറി കാർ പാർക്കിങ്​, സ്വകാര്യ പാർക്കിങ്​ സ്ഥലങ്ങൾ എന്നിവ ഇതിലുൾപ്പെടും. കഴിഞ്ഞ ഏപ്രിൽ മാസത്തിൽ നഗരത്തിൽ തിരക്കേറിയ സമയങ്ങളിൽ ചില സമയങ്ങളിൽ പ്രത്യേക നിരക്ക്​ ഏർപ്പെടുത്തുമെന്ന്​ കമ്പനി പ്രഖ്യാപിച്ചിരുന്നു.

എമിറേറ്റിലെ പള്ളികൾക്ക്​ സമീപത്തെ പാർക്കിങ്​ സ്ഥലങ്ങളിൽ ആഗസ്റ്റ്​ മാസം മുതൽ പെയ്​ഡ്​ പാർക്കിങ് നടപ്പിലാക്കുമെന്ന്​ കഴിഞ്ഞ ആഴ്ച കമ്പനി വ്യക്​തമാക്കിയിരുന്നു. ഇതിന്‍റെ ഭാഗമായി ‘പാർക്കിൻ’ 59 ഇടങ്ങളിലെ 2100 പാർക്കിങ്​ സ്ഥലങ്ങൾ നിയന്ത്രിക്കുമെന്നും അറിയിച്ചു. പാർക്കിനും ദുബൈയിലെ ഇസ്​ലാമികകാര്യ, ജീവകാരുണ്യ പ്രവർത്തന വകുപ്പും(ഐ.എ.സി.എ.ഡി) തമ്മിൽ ഒപ്പുവെച്ച സഹകരണ കരാറനുസരിച്ചണ്​ പദ്ധതി നടപ്പിലാക്കുന്നത്​.