ദുബൈയിൽ പുതുതായി തുറന്നത്​ 2,336 ഭക്ഷ്യ സ്ഥാപനങ്ങൾ; ആറുമാസത്തിനിടെ നടത്തിയത്​ 34700 ഭക്ഷ്യ പരിശോധനകൾ

ദുബൈ: ഈ വർഷം ആദ്യ പകുതിയിൽ ദു​ബൈയിൽ പുതുതായി തുറന്നത്​ 2,336 ഭക്ഷ്യ സ്ഥാപനങ്ങൾ. ഭക്ഷ്യ മേഖലയിൽ മുൻനിര നിക്ഷേപ കേന്ദ്രമായി ദുബൈ മാറുന്നുവെന്നതിന്‍റെ തെളിവാണ്​ പുതുതായി തുറന്ന സ്ഥാപനങ്ങളുടെ എണ്ണം സൂചിപ്പിക്കുന്നതെന്ന്​​ ദുബൈ മുനിസിപ്പാലിറ്റി അറിയിച്ചു.

ഭക്ഷ്യ സുരക്ഷ ഉറപ്പുവരുത്തുന്നതിന്‍റെ ഭാഗമായി കഴിഞ്ഞ ആറു മാസത്തിനിടെ എമിറേറ്റിലുടനീളമുള്ള റസ്റ്റാറന്‍റുകളിലും ഭക്ഷ്യവിതരണ സ്ഥാപനങ്ങളിലുമായി 34,700 പരിശോധനകളാണ്​ മുനിസിപ്പാലിറ്റി പൂർത്തിയാക്കിയത്​. ആരോഗ്യ സുരക്ഷ മാർഗനിർദേശങ്ങളും ഭക്ഷണ നിലവാരവും എമിറേറ്റിലെ മുഴുവൻ റസ്റ്റാറന്‍റുകൾ പാലിക്കുന്നുണ്ടെന്ന്​ ഉറപ്പുവരുത്തുകയാണ്​ ലക്ഷ്യം. കൂടാതെ പൊതുജനാരോഗ്യം സംരക്ഷിക്കുന്നതിനൊപ്പം സുരക്ഷിതവും ഉയർന്ന ഗുണനിലവാരമുള്ളതുമായ ഭക്ഷ്യവസ്തുക്കൾ ലഭിക്കുന്നുണ്ടെന്ന്​ ഉറപ്പുവരുത്താനും ഇതുവഴി സാധിക്കും.

അതേസമയം, കഴിഞ്ഞ ആറു മാസത്തിനിടെ ദുബൈ തുറമുഖങ്ങൾ വഴി എത്തിയത്​ 173,775 ഷിപ്​മെന്‍റുകളിലായി 49 ലക്ഷം ടൺ ഭക്ഷ്യ വസ്തുക്കളാണ്​. ഇത്​ ആഗോള ഭക്ഷ്യവ്യാപാരത്തിനുള്ള ഇടനാഴി എന്ന നിലയിൽ ദുബൈ നഗരത്തിന്‍റെ പങ്ക്​ ശക്​തിപ്പെടുത്തി. കർശന പരിശോധനകൾക്ക്​ ശേഷം ഏകദേശം 9,40,000 ഭക്ഷ്യ ഉത്​പന്നങ്ങൾ ക്ലിയർ ചെയ്യുകയും അംഗീകൃത ഡാറ്റാബേസുകളിൽ 77,700 പുതിയ ഭക്ഷ്യ വസ്തുക്കൾ രജിസ്റ്റർ ചെയ്യുകയും ചെയ്തു. ദുബൈ മുനിസിപ്പാലിറ്റിയുടെ ഡിജിറ്റൽ ഫുഡ്​ രജിസ്​ട്രേഷന്‍റെയും പരിശോധന സംവിധാനത്തിന്‍റ കാര്യക്ഷമതയാണ്​ ഈ കണക്കുകൾ പ്രതിഫലിപ്പിക്കുന്നതെന്നും ഫുഡ്​ സേഫ്​റ്റി ഡിപാർട്ട്​മെന്‍റ്​ ഡയറക്ടർ ഡോ. സുൽത്താൻ അൽ താഹിർ പറഞ്ഞു. എമിറേറ്റിലെ ജീവിത നിലവാരം ഉയർത്തുന്നതിൽ ഭക്ഷ്യ സുരക്ഷ പ്രധാന പങ്കുവഹിക്കുന്നുണ്ടെന്നും അദ്ദേഹം പറഞ്ഞു.