പ്രവാസി ഹാജിമാരുടെ പാസ്​പോർട്ട്​: കേന്ദ്രമന്ത്രിക്ക്​ പരാതി നൽകി 

ദുബൈ:  പ്രവാസി ഹാജിമാരുടെ പാസ്പോർട്ട് സൗദി സർക്കാറിന്​ സമർപ്പിക്കുന്നതുമായി ബന്ധപ്പെട്ട് ഇന്ത്യൻ ഹജ്ജ് കമ്മിറ്റി പുറപ്പെടുവിച്ച ഉത്തരവ്​ പ്രയാസരഹിതമായി   പരിഷ്കരിക്കണമെന്നാവശ്യപ്പെട്ട് ദുബൈ കെ.എം.സി.സി പ്രസിഡൻറ്​  പി.കെ അൻവർ നഹയും മുസ്ലിം  യൂത്ത് ലീഗ് ദേശീയ ജനറൽ സെക്രട്ടറി സി.കെ സുബൈറും  കേന്ദ്ര ന്യൂനപക്ഷ ഹജ് കാര്യ മന്ത്രി  മുക്താർ നഖ്‌വിക്ക്​ നിവേദനം നൽകി. മെയ് 15നാണ് ഹാജിമാരുടെ പാസ്പോർട്ട്  സിസ്​റ്റം മുഖേന സൗദി ഭരണകൂടത്തിന് നൽ​േകണ്ടത്. 
ഇതനുസരിച്ച് ഏപ്രിൽ 15 നുള്ളിൽ പാസ്പോർട്ട് സമർപ്പിക്കാനാണ് ഹജ്ജ് കമ്മിറ്റി  സർക്കുലറിൽ നിർദേശിക്കുന്നത്​.ഹജ് കഴിഞ്ഞ് രണ്ടാം ഘട്ടത്തിൽ തീർത്ഥാടകർ മടങ്ങിയെത്തുക സെപ്റ്റംബർ പത്തിനാണ്. 
ഫലത്തിൽ  അഞ്ച്  മാസത്തോളം പാസ്പോർട്ട് കൈയ്യിലില്ലാത്തത് മൂലം ഹജ് കഴിഞ്ഞ് കൃത്യസമയത്ത് തിരികെ ജോലിയിൽ പ്രവേശിക്കാനാവാതെ നിരവധി ഹാജിമാർക്ക് ജോലി നഷ്ടപ്പെടുന്ന സാഹചര്യമുണ്ടാകും.  
ഇതു വ്യക്​തമാക്കി സുപ്രിം കോടതി അഭിഭാഷകൻ ഹാരിസ് ബീരാൻ തയാറാക്കിയ വിശദ  പരാതി സംഘം കേന്ദ്രമന്ത്രിക്ക് സമർപ്പിച്ചു. വിഷയത്തിന്  അടിയന്തര പരിഹാരം ഉറപ്പാക്കുമെന്ന് മന്ത്രി  ഉറപ്പ് നൽകിയതായി കെ.എം.സി.സി ഭാരവാഹികൾ വാർത്താ കുറിപ്പിൽ അറിയിച്ചു.