ഇന്ത്യൻ തൊഴിലാളി നിയമനത്തിന്​ യു.എ.ഇ പോർട്ടൽ ഒരുക്കുന്നു

അബൂദബി: ഇന്ത്യൻ തൊഴിലാളികളുടെ നിയമനത്തിന്​ യു.എ.ഇ പോർട്ടൽ ഒരുക്കുന്നു.
 ഇന്ത്യൻ പ്രധാനമന്ത്രി നരേന്ദ്രമോദിയുടെ യു.എ.ഇ സന്ദർശനവേളയിൽ ഇരു രാജ്യങ്ങളും ഒപ്പുവെച്ച കരാർ പ്രകാരം ഇന്ത്യക്കാരുടെ തൊഴിൽ സുരക്ഷിതത്വം ഉറപ്പ് വരുത്തുകയെന്ന ലക്ഷ്യത്തോടെയാണിത്. യു.എ.ഇയിൽ ജോലി തേടുന്ന ഇന്ത്യക്കാർക്ക്​ സ്വന്തം രാജ്യത്തുനിന്ന്​ തന്നെ അവരുടെ അപേക്ഷ സമർപ്പിക്കാനും തൊഴിൽ കരാറി​​​െൻറ നിബന്ധനകളും മാനദണ്ഡങ്ങളും അവലോകനം ചെയ്യാനും സാധിക്കുന്ന വിധമാണ്​ പോർട്ടൽ രൂപകൽപന ചെയ്യുക. ബ്ലു കോളർ തൊഴിലാളികൾ, നഴ്​സുമാർ, കപ്പൽജീവനക്കാർ എന്നിവരുടെ ഇമിഗ്രേഷൻ നിയന്ത്രിക്കുന്ന ഇന്ത്യയുടെ ഒാൺലൈൻ സംവിധാനമായ ഇ^മൈഗ്രേറ്റുമായി പോർട്ടൽ ബന്ധിപ്പിക്കുമെന്ന്​ യു.എ.ഇ മാനവവിഭവശേഷി സ്വദേശിവത്കരണ മന്ത്രാലയം അണ്ടർ സെക്രട്ടറി ഉമർ ആൽ നുഐമി അറിയിച്ചു. 
ഇന്ത്യയും യു.എ.ഇയും തമ്മിലുള്ള ധാരണ സഹകരണത്തി​​​െൻറ പുതിയ അധ്യായം സൃഷ്​ടിക്കും. നിയമത്തിനും ചട്ടങ്ങൾക്കും അനുസൃതമായി കരാർ തൊ ഴിൽഘടന സമീകൃതമായും ഫലപ്രദമായും കൈകാര്യം ചെയ്യാൻ ഇതുവഴി സാധിക്കും. യു.എ.ഇ മാനവ വിഭവശേഷി മന്ത്രാലയം ഇന്ത്യൻ വിദേശകാര്യ മന്ത്രാലയത്തിന്​ ലഭ്യമായ ജോലിയുടെയും അവയുടെ കരാർ വ്യവസ്​ഥകളുടെയും വിവരങ്ങൾ ലഭ്യമാക്കുമെന്നും ഉമർ ആൽ നുഐമി അഭിപ്രായ​െപ്പട്ടു.
തൊഴിലാളികളുടെ അവകാശ സംരക്ഷണത്തിന്​ ഇന്ത്യയുടെ ഇ^മൈഗ്രേറ്റ്​ സംവിധാനം യു.എ.ഇ മാനവവിഭവശേഷി^സ്വദേശിവത്​കരണ മന്ത്രാലയവുമായി ബന്ധിപ്പിക്കുമെന്ന്​ ഇന്ത്യൻ സ്​ഥാനപതി നവ്​ദീപ്​ സിങ്​ സൂരി നേരത്തെ വ്യക്​തമാക്കിയിരുന്നു. മൂന്നോ നാലോ മാസം ഇതിനുള്ള നടപടി പൂർത്തീകരിക്കാൻ സാധിക്കുമെന്ന്​ പ്രതീക്ഷിക്കുന്നതായും അദ്ദേഹം അറിയിച്ചിരുന്നു.
ഇന്ത്യൻ തൊഴിലാളികളെ നിയമിക്കുന്ന വിദേശ തൊഴിലുടമകൾക്ക്​ ഒാൺലൈൻ രജിസ്​ട്രേഷൻ നടത്താനുള്ള ഇ^മൈഗ്രേറ്റ്​ സംവിധാനം 2015ലാണ്​ ഇന്ത്യ ആരംഭിച്ചത്​. അനധികൃത നിയമന ഏജൻസികൾ വ്യാജ വാഗ്​ദാനങ്ങൾ നൽകി തൊഴിലാളികളെ വഞ്ചിക്കുന്ന സംഭവങ്ങൾ വർധിച്ചതിനെ തുടർന്ന്​ 2015ലാണ്​ ഇ^മൈഗ്രേറ്റ്​ സംവിധാനം ആരംഭിച്ചത്​.