സ്വാമിമാർ അബൂദബി ക്ഷേത്രഭൂമി  സന്ദർശിച്ച്​ പൂജ ഒരുക്കം വിലയിരുത്തി

അബൂദബി: അബൂദബിയിൽ നിർമിക്കുന്ന പ്രഥമ ​ക്ഷേ​ത്രത്തി​​​​െൻറ ഭൂമിപൂജക്കുള്ള ഒരുക്കങ്ങൾ പ്രമുഖ സ്വാമിമാർ വിലയിരുത്തി. ഇൗശ്വർ ചരൺ സ്വാമിയുടെ നേതൃത്വത്തിൽ 25ഒാളം സ്വാമിമാരാണ്​ അൽ റഹ്​ബയിലെ ക്ഷേത്രസ്​ഥലത്ത്​ സന്ദർശനം നടത്തിയത്​. വെള്ളിയാഴ്​ച 10.30ഒാടെയാണ്​ ഇവരെത്തിയത്​. ക്ഷേത്രത്തിന്​ സ്​ഥലം അനുവദിച്ച യു.എ.ഇ ഭരണാധികാരികൾക്ക്​ സ്വാമിമാർ നന്ദി അറിയിച്ചു. 

ദുബൈ കോൺസുൽ ജനറൽ വിപുൽ, ബി.ആർ.എസ്​ ​വെഞ്ചേഴ്​സ്​ ചെയർമാൻ ബി.ആർ. ഷെട്ടി തുടങ്ങിയവും സ്​ഥലത്തെത്തിയിരുന്നു. ഞായറാഴ്​ച രാവിലെ 10.30ഒാടെയാണ്​ ഭൂമിപൂജ ആരംഭിക്കുക. ആഗോളവ്യാപകമായി 1200ഒാളം ക്ഷേ​ത്രങ്ങൾ നിർമിച്ച ബോചാസൻവാസി അക്ഷർ പുരുഷോത്തം സൻസ്​തയാണ്​ (ബാപ്​സ്​) അബൂദബിയിൽ ക്ഷേത്രനിർമാണത്തിന്​ നേതൃത്വം നൽകുന്നത്​.  അക്ഷർധാം മാതൃകയിലായിരിക്കും എന്ന്​ കരുതപ്പെടുന്ന ക്ഷേത്രം തീർഥാടന വിനോദസഞ്ചാര മേഖലയുടെ വികസനത്തിന്​ ഉപകരിക്കും. 55000 ചതു​രശ്രമീറ്റർ സ്​ഥലത്ത്​ ക്ഷേത്രത്തിന്​ പുറമെ ഭക്ഷണശാല, ഉ​ദ്യാനം, ഫൗണ്ടൻ, ലൈബ്രറി, പ്രദർശന ഹാളുകൾ, പഠനമുറികൾ, കളിസ്​ഥലം എന്നിവയും ഉണ്ടാകും. 

2020ഒാടെ നിർമാണം പൂർത്തീകരിക്കാൻ ഉദ്ദേശിക്കുന്ന ക്ഷേത്രം ന്യൂഡൽഹിയിൽ അക്ഷർധാം ക്ഷേത്രത്തേക്കാൾ ചെറുതായിരിക്കുമെന്ന്​ ക്ഷേത്രനിർമാണവുമായി ബന്ധപ്പെട്ടവർ അറിയിച്ചു.