ഷാർജയിൽ വർണ ദീപങ്ങൾ സംഗീത തേരിറങ്ങി

ഷാർജ: മഞ്ഞണിഞ്ഞ രാവിനെ പൊന്നണിയിച്ച് ഷാർജയിൽ വർണ ദീപങ്ങൾ തെളിഞ്ഞു. രാവിനെ പകലാക്കി മാറ്റുന്ന എട്ടാമത് ഷാർജ വെളിച്ചോത്സവത്തിന്​ തുടക്കമായി. വെളിച്ച വിസ്​മയം കാണാൻ ആയിരങ്ങളാണ്​ ആദ്യ ദിനം  തന്നെ   എത്തിച്ചേർന്നത്. മുൻവർഷങ്ങളിൽ നിന്ന് മാറി പുതിയ ശൈലിയിലും പ്രമേയത്തിലും നടക്കുന്ന ഉത്സവത്തിന് ഇക്കുറി മാറ്റ് കൂടുതലാണ്. ശാസ്​ത്രം, സർഗ രചന, അറിവ് എന്നിവക്ക് ഉൗന്നൽ നൽകുന്ന കാഴ്്ച്ചകളാണ് വെളിച്ചത്താൽ വരഞ്ഞിടുന്നത്.  ഡോ.സുൽത്താൻ ആൽ ഖാസിമി സ​െൻറർ ഫോർ ഗൾഫ് സ്​റ്റഡീസിലായിരുന്നു ഉദ്​ഘാടന പരിപാടി. വിവിധ രാജ്യങ്ങളിൽ നിന്നുള്ള പ്രമുഖ സംഗീതജ്ഞരുടെ നേതൃത്വത്തിൽ നടക്കുന്ന സംഗീത പരിപാടി വെളിച്ചോത്സവത്തിന് തെളിച്ചം കൂട്ടി . ഉദ്യാനങ്ങളും തിയേറ്ററുകളും കായലും ഉൾപ്പെടുന്ന അൽ മജാസ്​ പ്രദേശമാകെ വർണങ്ങളിൽ മുങ്ങി. ബുഹൈറ കോർണിഷിൽ സ്​ഥിതി ചെയ്യുന്ന പാം ഒയാസീസിലെ വെളിച്ചത്തി​െൻറ ഇടനാഴികകൾ കാണാൻ   നല്ല തിരക്കായിരുന്നു. എല്ലാ മതസ്​ഥർക്കും പ്രവേശനം അനുവദിച്ചിട്ടുള്ള അൽ നൂർ പള്ളിയിലെ ദീപാലങ്കാരങ്ങൾക്ക് ഇത്തവണ ചന്തം കൂടുതലാണ്. ഷാർജയുടെ സാംസ്​കാരിക വൈവിധ്യം എന്ന പ്രമേയത്തെയാണ് പള്ളി  ചുവരുകളിലും മിനാരങ്ങളിലും വർണ വെളിച്ചങ്ങൾ കൊണ്ട് ആലേഖനം ചെയ്യുന്നത്. ഷാർജ സർവ്വകലാശാല വളപ്പുകളിൽ ശാസ്​ത്രം, സർഗ രചന, അറിവ് എന്നിവയെയാണ് പ്രധാനമായും വെളിച്ചത്തിൽ ആവിഷ്ക്കരിച്ചിരിക്കുന്നത്. ദി ഹൗസ്​ ഓഫ് ജസ്​റ്റിസ്​, ദി ഹാർട് ഓഫ് ഷാർജ, ഷാർജ  അൽ ഹിസൻ കോട്ട, സുപ്രീം കൗൺസിൽ ഫോർ ഫാമിലി അഫയേഴ്സ്, ദൈദിലെ അമ്മാർ ബിൻ യാസർ പള്ളി, ദിബ്ബ അൽ ഹിസ്​നിലെ ശൈഖ് റാഷിദ് ബിൻ അഹമ്മദ് ആൽ ഖാസിമി പള്ളി, അൽ ഹംറിയ നഗരസഭ, ഖോർഫക്കാൻ നഗര വികസന വിഭാഗം, ഖോർഫക്കാൻ നഗരസഭ കൗൺസിൽ, കൽബ നഗരസഭ കൗൺസിൽ, കൽബ ഡയറക്ടറേറ്റ് ഓഫ് ഹ്യൂമൻ റിസോഴ്സസ്​ എന്നിവിടങ്ങളിലെല്ലാം തന്നെ പുതുമയാർന്ന കാഴ്ച്ചകൾ സമ്മാനിച്ചാണ് വെളിച്ചവും സംഗീതവും പ്രകടനം നടത്തുന്നത്. സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ.സുൽത്താൻ ബിൻ മുഹമ്മദ് ആൽ ഖാസിമിയുടെ രക്ഷാകർതൃത്വത്തിൽ, ഷാർജ വാണിജ്യ വിനോദ സഞ്ചാര  വികസന  അതോറിറ്റി (എസ്​.സി.ടി.ഡി.എ) നടത്തുന്ന വെളിച്ചോത്സവം വീക്ഷിക്കാനെത്തുന്നവർക്ക് അതീവ സുരക്ഷയാണ് അധികൃതർ ഒരുക്കിയിരിക്കുന്നത്. ശനി മുതൽ ബുധൻ വരെ ദിവസവും വൈകിട്ട് ആറ് മുതൽ രാത്രി 11 വരെയും വ്യാഴം, വെള്ളി ദിവസങ്ങളിൽ ആറ് മുതൽ അർധരാത്രി വരെയുമാണ് നിറദീപക്കാഴ്​ചയുടെ മഹോത്സവം.