വാടക കുടിശിക മൂലം കുടുങ്ങിയവർക്ക്​ ആശ്വാസമൊരുക്കാൻ ദുബൈ ഭൂ വകുപ്പ്​

ദുബൈ: വാടക കുടിശിക വന്ന് നിയമകുരുക്കിൽപ്പെട്ടവരുടെ ബാധ്യത തീർക്കാൻ ദുബൈ ഭൂ വകുപ്പി​െൻറ വാടക തർക്ക പരിഹാര കേന്ദ്രം (ആർ.ഡി.സി) പദ്ധതിയാരംഭിച്ചു. യു.എ.ഇ പ്രസിഡൻറ് ശൈഖ് ഖലീഫ ബിൻ സായിദ് ആൽ നഹ്യാൻ ആഹ്വാനം ചെയ്ത ദാനവർഷത്തി​െൻറ സന്ദേശമുൾക്കൊണ്ട് ഇൗ ആവശ്യത്തിനായി 10 ലക്ഷം ദിർഹം സംഭാവന ലഭിച്ചതിനെ തുടർന്നാണിത്. പരേതനായ ഉബൈദ് അൽ ഹിലൂവി​െൻറ കുടുംബമാണ് ഇൗ തുക നൽകിയത്. വാടകകേസുകളും അതിൽ ഉൾപ്പെട്ട കക്ഷികളെയും വിശകലനം ചെയ്യാൻ  ആർ.ഡി.സി  സമിതിക്ക് രൂപം നൽകി. കെട്ടിട ഉടമകളും പാട്ടക്കാരുമായി സുസ്ഥിര ബന്ധം ഉറപ്പാക്കുകയാണ് സ​െൻററി​െൻറ മുഖ്യ പരിഗണനയെന്നും  അത്തരമൊരു അന്തരീക്ഷം ദുബൈയുടെ റിയൽ എസ്റ്റേറ്റ് മേഖലയെ കൂടുതൽ ശക്തിപ്പെടുത്തുമെന്നും ആർ.ഡി.സി ഡയറക്ടർ ജഡ്ജ് അബ്ദുൽ ഖാദർ മൂസ പറഞ്ഞു.  സംഭാവനയായി ലഭിച്ച പണം കടുത്ത ബുദ്ധിമുട്ടു നേരിടുന്നവരുടെ കേസുകൾ വിശകലനം ചെയ്ത് മാനുഷിക^ജീവകാരുണ്യ തത്വങ്ങൾ പാലിച്ചു മാത്രമേ വിനിയോഗിക്കൂ എന്നും അദ്ദേഹം വ്യക്തമാക്കി.