വീട്ടുജോലിക്കാരുടെ അവകാശ സംരക്ഷണത്തിന്​ പുതിയ നിയമം വരുന്നു

അബൂദബി: വീട്ടുജോലിക്കാരുടെ അവകാശം സംരക്ഷിക്കാനും ജോലിസമയം ക്രമീകരിക്കാനും ഫെഡറൽ നാഷനൽ കൗൺസിൽ (എഫ്​.എൻ.സി) അവതരിപ്പിച്ച കരട്​ നിയമത്തിന്​ മന്ത്രിസഭയുടെ അംഗീകാരം. ആഴ്​ചയിൽ ഒരു അവധിദിനം, 30 ദിവസം ശമ്പളത്തോടു കൂടിയ വാർഷികാവധി, പാസ്​പോർട്ട്​, എമിറേറ്റ്​സ്​ ​െഎ.ഡി, തൊഴിൽ പെർമിറ്റ്​ തുടങ്ങിയ രേഖകൾ കൈവശം വെക്കാനുള്ള അധികാരം, ദിവസേന 12 മണിക്കൂർ വിശ്രമം എന്നീ നിർദേശങ്ങൾ ഉൾക്കൊള്ളുന്നതാണ്​ നിയമം. 12 മണിക്കൂർ വിശ്രമത്തിൽ എട്ട്​ മണിക്കൂർ തുടർച്ചയായി നൽകണം.
അന്താരാഷ്​​്ട്ര തൊഴിൽ സംഘടനാ കൺവെൻഷ​​െൻറ ശിപാർശകൾക്ക്​ അനുസൃതമാണ്​ കരട്​ നിയമത്തിലെ നിർദേശങ്ങൾ. യു.എ.ഇ പ്രസിഡൻറ്​ ശൈഖ്​ ഖലീഫ ബിൻ സായിദ്​ ആൽ നഹ്​യാൻ ഒപ്പ്​ വെക്കുന്നതോടെ നിയമത്തിന്​ പ്രാബല്യമാകും. 
വംശം, നിറം, ലിംഗം, മതം, രാഷ്​ട്രം, സമുദായം എന്നിവ അടിസ്​ഥാനമാക്കിയോ മറ്റോ ഉള്ള വിവേചനം പാടില്ലെന്ന്​ നിയമം വ്യക്​തമാക്കുന്നു. ശാരീരിക-വാചിക-ലൈംഗിക പീഡനം, മനുഷ്യക്കടത്ത്​, നിർബന്ധിച്ച്​ ജോലി ചെയ്യിക്കൽ എന്നിവയിൽനിന്ന്​ വീട്ടു​േജാലിക്കാർക്ക്​ സംരക്ഷണവും നിയമം ഉറപ്പ്​ നൽകുന്നു. 
രാജ്യത്ത്​ 7,50,000ത്തോളം വീട്ടുജോലിക്കാരുണ്ട്​ എന്നാണ്​ കണക്ക്​​. ​വിദേശ തൊഴിലാളികളുടെ 20 ശതമാനം വരുമിത്​. ഇവരിൽ 65 ശതമാനവും അബൂദബി, ദുബൈ, ഷാർജ എമിറേറ്റുകളിലാണ്​. മാന്യമായ തൊഴിൽ സാഹചര്യവും സാമൂഹിക സുരക്ഷയും മാനവ വിഭവശേഷി മന്ത്രാലയത്തിലെ പ്രത്യേക ട്രിബ്യൂണലുകളുടെ സേവനവും വീട്ടു​േജാലിക്കാർക്ക്​ ലഭ്യമാക്കണമെന്ന്​ നിയമം അനുശാസിക്കുന്നു. ബാലവേല നിർമാർജനം ചെയ്യുന്നതിന്​ അന്താരാഷ്​​്ട്ര നിയമം നിഷ്​കർഷിച്ച 18 വയസ്സ്​ പൂർത്തിയായവരെ മാത്രമേ ജോലിക്ക്​ നിർത്താവൂ എന്നും നിയമത്തിൽ വ്യക്​തമാക്കുന്നു. 
ജോലിയുടെ സ്വഭാവം, ജോലിസ്​ഥലം, ശമ്പളം, നിയമപ്രകാരമുള്ള വിശ്രമ സമയം തുടങ്ങിയ വ്യവസ്​ഥകളും നിബന്ധനകളും സ്വന്തം രാജ്യത്തുനിന്ന്​ പുറപ്പെടുന്നതിന്​ മുമ്പ്​ തന്നെ വീട്ടുജോലിക്കാർ മനസ്സിലാക്കിയിട്ടുണ്ടെന്ന്​ തൊഴിൽനിയമന ഏജൻസികൾ ഉറപ്പുവരുത്തിയിരിക്കണം. ജോലിയിൽ പ്രവേശിച്ച്​ മൂന്ന്​ മാസം വീട്ടുജോലിക്കാരൻ ​െപ്രാബേഷനിലായിരിക്കും. ആറ്​ മാസം വരെ ​െപ്രാബേഷൻ ദീർഘിപ്പിക്കാം. ഇക്കാലത്തിനിടെ ​െതാഴിലുടമ തൊഴിലാളിയെ പിരിച്ചുവിടുന്നുവെങ്കിൽ നാട്ടിലയക്കാനുള്ള ചെലവ്​ നിയമന ഏജൻസി വഹിക്കണം. 
ജോലിക്കാരനെ ഒരിക്കൽ മാത്രമേ പ്രബേഷനിൽ ജോലി ചെയ്യിക്കാൻ തൊഴിലുടമക്ക്​ അവകാശമുള്ളൂ. അതേസമയം, ഇരു കക്ഷികളുടെയും സമ്മത പ്രകാരം തൊഴിലാളിയെ മറ്റൊരു ജോലിയിലേക്ക്​ മാറ്റുന്നുവെങ്കിൽ വീണ്ടും പ്രബേഷനിൽ ജോലി ചെയ്യിക്കാം. 
വീട്ടുജോലിക്കാരെ വേലക്കാർ, സഹായികൾ, കാവൽക്കാർ, സുരക്ഷാ ഉദ്യോഗസ്​ഥർ, വീട്ടിലെ ആടുമാട്​ നോട്ടക്കാർ, കുടുംബ ഡ്രൈവർമാർ, കുതിര പരിചാരകർ, പ്രാപ്പിടിയൻ പരിശീലകർ, വീട്​ സൂക്ഷിപ്പുകാർ, സ്വകാര്യ പരിശീലകർ, സ്വകാര്യ അധ്യാപകർ, ശിശുപരിപാലകർ, വീട്ടുകൃഷി നോട്ടക്കാർ, സ്വകാര്യ നഴ്​സ്​. സ്വകാര്യ പി.ആർ.ഒ, സ്വകാര്യ കാർഷിക എൻജിനീയർ എന്നിങ്ങനെ തരംതിരിക്കുന്നു. ഇതുവരെ വേലക്കാർ, വീട്ടുകൃഷി നോട്ടക്കാർ, വീട്ടു ഡ്രൈവർ എന്നി​ങ്ങനെ മാത്രമാണ്​ തരംതിരിച്ചിരിക്കുന്നത്​. 
എല്ലാ വിധ പീഡനങ്ങളിൽനിന്നും അ​ക്രമങ്ങളിൽനിന്നും നിയമം ജോലിക്കാർക്ക്​ പരിരക്ഷ നൽകുന്നു. തൊഴിലുടമകൾ ജോലിക്കാർക്ക്​ മാന്യമായ ജീവിത സാഹചര്യമൊരുക്കുകയും അവരുടെ സ്വകാര്യതയെ ആദരിക്കുകയും വേണം. ഉത്തരവാദിത്തങ്ങൾ നിറ​േവറ്റുന്നതിൽ തൊഴിലുടമ വീഴ്​ച വരുത്തിയാൽ ജോലിക്കാരന്​ കരാർ റദ്ദാക്കാം. തൊഴിൽ സാഹചര്യങ്ങളും തൊഴിലുപകരണങ്ങളും ജോലിക്കാരുടെ സുരക്ഷിതത്വം ഉറപ്പ്​ വരുത്തുന്നതായിരിക്കണം. 
താമസ സൗകര്യത്തിന്​ പുറമെ വസ്​ത്രം, ഭക്ഷണം, ചികിത്സ, ആ​േ​രാഗ്യപരിരക്ഷ, ശാരീരിക സുരക്ഷിതത്വം എന്നിവ ലഭ്യമാക്കണം. അവരുടെ അഭിമാനത്തെ ആദരിക്കുകയും വേണം.

ആ​ഴ്​ചയിൽ അവധി; വാർഷികാവധി 30 ദിവസം
ആഴ്​ചയിൽ ഒരു ദിവസം വീട്ടുജോലിക്കാർക്ക്​ അവധി നൽകിയിരിക്കണം. ഏതെങ്കിലും കാരണവശാൽ അവധി ദിനത്തിൽ ജോലി ചെയ്യേണ്ടിവന്നാൽ പകരം വേതനമോ നിയമാനുസൃത പ്രതിഫലമോ നൽകണം. 30 ദിവസമാണ്​ വാർഷികാവധി. സേവനകാലം ആറ്​ മാസത്തിനും ഒരു വർഷത്തിനും ഇടയിലാണെങ്കിൽ ഒരു മാസത്തിന്​ രണ്ട്​ ദിവസം എന്ന രീതിയിലാണ്​ അവധി കണക്കാക്കുക. 
അവധി ദിനങ്ങൾ എപ്പോൾ നൽകണമെന്നത്​ തൊഴിലുടമക്ക്​ തീരുമാനിക്കാം. ആവശ്യമെങ്കിൽ രണ്ടിലധികമാകാതെ ഭാഗിച്ചുനൽകാം. രണ്ട്​ വർഷത്തെ അവധി ഒന്നിച്ച്​ നൽകാനും അനുമതിയുണ്ട്​. രണ്ട്​ വർഷത്തിലൊരിക്കൽ നാട്ടിൽ പോയി വരാനുള്ള ചെലവ്​ തൊഴിലുടമ വഹിക്കണം. അവധിക്ക്​ വീട്ടിലേക്ക്​ പോകാൻ താൽപര്യപ്പെടാത്ത ജോലിക്കാർക്ക്​ അവധിക്കാലത്തെ ശമ്പളവും യാത്രാബത്തയും പണമായി നൽകാം.
വർഷത്തിൽ 30 ദിവസം മെഡിക്കൽ അവധിയും ലഭിക്കും. ഇതിൽ ആദ്യ 15 ദിവസം ശമ്പളത്തോട്​ കൂടിയും പിന്നീടുള്ള 15 ദിവസം ശമ്പളമില്ലാതെയും ആയിരിക്കും അവധി. 

വേതനം
തൊഴിലാളിയെ യു.എ.ഇയിൽ എത്തിക്കുന്നതിന്​ മുമ്പ്​ ശമ്പളം അറിയിക്കുകയും അത്​ തൊഴിലാളി അംഗീകരിക്കുകയും വേണം. ഒാരോ മാസവും പത്താം തീയതിക്ക്​ മുമ്പ്​ ശമ്പളം നൽകണം. ശമ്പളം കിട്ടിയതായി തൊഴിലാളി ഒപ്പിട്ട്​ നൽകിയ രശീതി സൂക്ഷിക്കണം. 
തൊഴിലാളി കടമായി വാങ്ങിയ തുകയോ എന്തെങ്കിലും വസ്​തുക്കൾക്ക്​ നാശം വരുത്തിയതി​​െൻറ നഷ്​ടപരിഹാരമോ കോടതിയെ ബോധ്യപ്പെടുത്തി ഇൗടാക്കാം എന്നല്ലാതെ ജോലിക്കാര​​െൻറ ശമ്പളത്തിൽനിന്നോ ഗ്രാറ്റ​േവിറ്റിയിൽനിന്നോ ഒന്നും കുറക്കാൻ അവകാശമില്ല. ​േജാലിക്കാരനും തൊഴിലുടമയും തമ്മിൽ എന്തെങ്കിലും തർക്കങ്ങളുണ്ടായാൽ മാനവ വിഭവ ശേഷി മന്ത്രാലയത്തിലെ പ്രത്യേക ട്രിബ്യൂണലുകൾ മുഖേനയോ മറ്റു കോടതികൾ മുഖേന​േയാ ആണ്​ പരിഹാരം തേടേണ്ടത്​.

തൊഴിൽ കരാർ
മാനവവിഭവശേഷി മന്ത്രാലയം അംഗീകരിച്ച  മാതൃകയിലായിരിക്കണം തൊഴിൽ കരാർ തയാറാ​േക്കണ്ടത്​. കരാറിൽ ജോലിയുടെ വിശദാംശം, തൊഴിലാളിയുടെ യോഗ്യത, തൊഴിലുടമയുടെ ഉത്തരവാദിത്വങ്ങൾ എന്നിവ രേഖപ്പെടുത്തണം. ഇൗ കരാറിൽ തൊഴിലുടമയും നിയമന ഏജൻസിയും ഒപ്പു വെക്കണം. തൊഴിലാളിയുടെ യാത്രാചെലവ്​, നിയമന ഏജൻറി​​െൻറ ഫീസ്​ എന്നിവയും കരാറിലുണ്ടാകണം. 
കരാർ പ്രകരമുള്ള നിബന്ധനകൾ പാലിക്കുന്നതിൽ നിയമന ഏജൻറ്​ വീഴ്​ച വരുത്തിയാൽ ജോലി നൽകാതിരിക്കാൻ തൊഴിൽ ഉടമക്ക്​ അവകാശമുണ്ട്​. അങ്ങനെ സംഭവിച്ചാൽ തൊഴിലാളിയെ സ്വന്തം രാജ്യ​േത്തക്ക്​ തിരിച്ചയക്കുന്നതിനുള്ള എല്ലാ ചെലവും ഏജൻറ്​ വഹിക്കേണ്ടി വരും. ഏജൻറ്​ കരാറിലെ നിബന്ധനകൾ പാലിക്കുന്നതിൽ പരാജയപ്പെട്ടത്​ കാരണമായി ഉടമക്ക്​ ഉണ്ടാകുന്ന എല്ലാ നഷ്​ടങ്ങൾക്കും ഏജൻറ്​ നഷ്​ടപരിഹാരം നൽകേണ്ടിവരും. 
കരാറി​​ലെ ഭാഷ അറബിയായിരിക്കും. അറബിക്ക്​ പുറമെ ​മറ്റേതെങ്കിലും വിദേശ ഭാഷ ഉപയോഗിച്ചിട്ടുണ്ടെങ്കിലും അറബിയായിരിക്കും അംഗീകൃതമായി കണക്കാക്കുക. കരാർ അവസാനിക്കുന്ന തീയതി വ്യക്​തമായി രേഖപ്പെടുത്തിയിരിക്കണം. രണ്ട്​ വർഷത്തിലധികം ഇൗ കരാർ നീട്ടാനോ പുതുക്കാനോ സാധിക്കില്ല. 
തൊഴിലാളിയുടെ താൽപര്യ പ്രകാരമോ തൊഴിലാളി കാരണമായോ കരാറിലെ വ്യവസ്​ഥകൾ പാലിക്കാത്തതിനാലോ തൊഴിൽ കരാർ റദ്ദാക്കുകയാണെങ്കിൽ ഏജൻറ്​ എല്ലാ ഫീസുകളും തിരിച്ചടക്കേണ്ടിവരും. 

നിയമലംഘനത്തിന്​ കനത്ത ശിക്ഷ
നിയമം ലംഘിക്കുന്നവർ തടവും കനത്ത പിഴയും ശിക്ഷ ലഭിക്കും. തൊഴിലുടമയുടെ ഏതെങ്കിലും രഹസ്യങ്ങൾ ജോലിക്കാരൻ പരസ്യമാക്കിയാൽ ആറ്​ മാസം തടവോ 100,000 ദിർഹം പിഴയോ രണ്ടും കൂടിയോ ശിക്ഷ ലഭിക്കും. തൊഴിലിൽനിന്ന്​ പിരിഞ്ഞതിന്​ ശേഷമാണ്​ ജോലിക്കാരൻ രഹസ്യം വെളിപ്പെടുത്തുന്നതെങ്കിലും ഇൗ ശിക്ഷ ബാധകമാണ്​. ഒരു വീട്ടിൽ ജോലിചെയ്​തു കൊണ്ടിരിക്കെ ആ ജോലിയിൽനിന്ന്​ ഒഴിവാകാൻ ജോലിക്കാരനെ പ്രേരിപ്പിക്കുകയോ ജോലിക്കാരന്​ അഭയം വാഗ്​ദാനം ചെയ്യുകയോ നിയമം നടപ്പാക്കുന്ന ഉദ്യോഗസ്​ഥരെ കൃത്യനിർവഹണത്തിൽ തടയുകയോ ചെയ്യുന്നവർക്കും ഇതേ ശിക്ഷ ലഭിക്കും. കൂടാതെ ശിക്ഷക്ക്​ ശേഷം നാടുകടത്താനും കോടതി ഉത്തരവിടും. കരാർ ലംഘനം നടത്തുന്ന നിയമന ഏജൻസികൾക്ക്​ 100,000 ദിർഹം പിഴ വിധിക്കും. കരാർ ലംഘനം തുടർന്നാൽ പിഴ വർധിപ്പിക്കും. കരാറിൽ വ്യക്​തമാക്കാത്ത ജോലി ചെയ്യിക്കുന്ന വീട്ടുടമക്ക്​ 10,000 ദിർഹം പിഴ വിധിക്കും. ജോലിക്കാരനെ കാണാതായിട്ട്​ 48 മണിക്കൂറിനകം പൊലീസിനെ അറിയിച്ചില്ലെങ്കിലും ഇതേ പിഴയാണ്​ ശിക്ഷ. ജോലിക്ക്​ ഹാജരാകാൻ കഴിയാതിരുന്നിട്ട്​ 48 മണിക്കൂറിനകം പൊലീസിനെ അറിയിക്കാത്ത ജോലിക്കാരനും സമാന ശിക്ഷ ലഭിക്കും. കൃത്യമായ കാരണമില്ലാതെ ജോലിക്ക്​ ഹാജരാകുന്നതിൽ ജോലിക്കാരൻ വീഴ്​ച വരുത്തരുത്​. 
ജോലിക്കാർ സമൂഹത്തി​​െൻറ ആചാരങ്ങളെയും പാരമ്പര്യത്തെയും മാനിക്കുകയും വേണം.  പുതിയ നിയമപ്രകാരം തൊഴിലാളി നൽകുന്ന കേസുകളിൽ അതിവേഗം തീർപ്പ്​ കൽപിക്കും. കൂടാതെ നിയമ നടപടികളുടെ എല്ലാ ഘട്ടങ്ങളിലുമുള്ള കോടതി ഫീസുകൾ ​തൊഴിലാളിക്ക്​ സൗജന്യമായിരിക്കും.