പിങ്ക് കാരവന് ഇന്ന് അബൂദബിയിൽ സമാപനം

ഷാര്‍ജ: സ്തനാര്‍ബുദത്തിനെതിരെ പോരാടി കുതിക്കുന്ന പിങ്ക് കാരവന് വെള്ളിയാഴ്ച തലസ്ഥാന നഗരിയില്‍ സമാപനമാകും. മാര്‍ച്ച് ഏഴിന് ആരംഭിച്ച പിങ്ക് കുളമ്പടികള്‍ക്കാണ് നാളെ താത്ക്കാലിക വിരാമമിടുന്നത്. ഇതി​​െൻറ അനുബന്ധ ചികിത്സകളും മറ്റും തുടരുമെന്ന്​ സംഘാടകര്‍ പറഞ്ഞു. 
വെള്ളിയാഴ്ച യാസ് ഐലന്‍ഡിലെ ഐക്കിയ സ്റ്റോര്‍ പരിസരത്തുനിന്നാണു പ്രയാണം തുടങ്ങുക. 
11.7 കിലോമീറ്റര്‍ സഞ്ചരിച്ച് സായിദ് സ്പോര്‍ട്സ് സിറ്റിയിലാണ് സമാപനം. ഇതിനിടക്ക് പരിശോധന നടത്താന്‍ ആഗ്രഹിക്കുന്നവര്‍ക്ക് ഒാൺലൈൻ വഴി അപേക്ഷ നല്‍കാനുള്ള സൗകര്യമുണ്ട്. www.premieronline.com/event/Pink_Strides_Abu_Dhabi_2546 എന്നതാണ്​ വിലാസം.
 ആയിരങ്ങള്‍ക്ക് ആശ്വാസം പകരുന്ന കാരവ​​െൻറ പ്രവര്‍ത്തനങ്ങള്‍ക്ക് സംഭാവനങ്ങള്‍ നല്‍കാന്‍ ആഗ്രഹിക്കുന്നവര്‍ക്കും അവസരമുണ്ട്. ഇത്തിസലാത്ത് , ഡു എന്നിവയിലൂടെ 2302 എന്ന എസ്.എം.എസ് നമ്പര്‍ വഴി പണം കൈമാറാം. അഞ്ച് ദിര്‍ഹം മുതല്‍ ഈ സംവിധാനം ഉപയോഗിച്ച് സംഭാവന നല്‍കാം. 
ഷാര്‍ജ ഇസ്​ലാമിക് ബാങ്ക് വഴിയും പണമയക്കാം,  39 ദിര്‍ഹത്തിന് മുകളിലുള്ള സംഖ്യയാണ് അയക്കാന്‍ സാധിക്കുക. ആയിരങ്ങളാണ് ഈ പത്ത് ദിന പിങ്ക് കാരവന്‍ പര്യടനത്തിനിടയില്‍ പരിശോധനക്ക് എത്തിയത്. നിരവധി പേരില്‍ രോഗം കണ്ടെത്തി. ഇവര്‍ക്ക് അനുബന്ധ ചികിത്സകളും ആരംഭിച്ചിട്ടുണ്ട്. 
2011ല്‍ ആരംഭിച്ച പിങ്ക് കാരവന്‍ ഏഴാം വാര്‍ഷികത്തിന്‍െറ ഭാഗമായാണ് യു.എ.ഇയുടെ ഏഴ് എമിറേറ്റുകളിലൂടെ കുതിച്ചത്.