തൊഴിൽ അപകടത്തിൽ കാൽ നഷ്​ടപ്പെട്ട  മലയാളിക്ക്​ ഒന്നേമുക്കാൽ കോടി രൂപ നഷ്​ടപരിപാരം

ദുബൈ: ജോലി സ്​ഥലത്തുണ്ടായ അപകടത്തിൽ വലതുകാൽ നഷ്​ടപ്പെട്ട മലയാളിക്ക്​ 10 ലക്ഷം ദിർഹം (ഏകദേശം ഒന്നേ മുക്കാൽ കോടി രൂപ) നഷ്​ട പരിഹാരം നൽകാൻ ഷാർജ കോടതിയുടെ വിധി. 2014 സെപ്​റ്റംബറിൽ  കം​പ്രസർ പൊട്ടിത്തെറിച്ചുണ്ടായ അപകടത്തിൽ  വലതുകലാൽ മുട്ടിനുമുകളിൽ വെച്ച്​ നഷ്​ടപ്പെടുകയും ദേഹമാസകലം പൊള്ളലേൽക്കുകയും ചെയ്​ത തൃശൂർ കോടശ്ശേരി സ്വദേശി ബാല​ന്​ അനുകൂലമായാണ്​ വിധി.  അജ്​മാനിലെ കമ്പനി, ഷാർജയിൽ പ്രവൃത്തിച്ചുവരുന്ന കമ്പനിയിൽ നിന്ന്​  വാടകക്കെടുത്ത  ശീതീകരണിയിൽ (ചില്ലർ) വാതകം നിറക്കുന്നതിനിടയിലാണ്​ കംപ്രസർ പൊട്ടിത്തെറിച്ചത്​. ബാലൻ ഷാർജയിലെ കമ്പനിയിൽ  ഹെൽപറായിരുന്നു. ശീതീകരണ തകരാർ പരിഹരിക്കാനായി അജ്​മാനിലെ കമ്പനിയിലേക്ക്​ അയച്ചതായിരുന്നു. പരിശോധനക്കായി ടെക്​നീഷ്യൻ കംപ്രസറിലേക്ക്​ വാതകം​ നിറക്കു​േമ്പാഴായിരുന്ന പൊട്ടിത്തെറിയുണ്ടായത്​. 
ടെക്​നീഷ്യൻ നൈട്രജൻ വാതകം നിറക്കുന്നതിന്​ പകരം ​ശ്രദ്ധക്കുറവിൽ  ഒാക്​സിജൻ നിറച്ചതാണ്​ കംപ്രസർ പൊട്ടിത്തെറിക്കാൻ കാരണമായത്​. മാരകമായ പൊള്ളലും പരിക്കുമേറ്റ ബാലൻ രണ്ടു മാസക്കാലം ഇവിടെ ആശുപത്രിയിൽ ചികിത്സ നേടിയ ശേഷം, കമ്പനി നാട്ടിലേക്ക്​ കയറ്റി വിടുകയായിരുന്നു. ബാലന്​ മതിയായ നഷ്​ട പരിഹാരം നൽകാം എന്ന ഉറപ്പിലാണ്​ കമ്പനിയുടമ ബാലനെ നാട്ടിലേക്കയച്ചത്​. എന്നാൽ ആറു മാസം കഴിഞ്ഞിട്ടും കമ്പനി എന്തെങ്കിലും ആനുകൂല്യങ്ങൾ നൽകാനോ, ബാല​​​െൻറ ശാരീരിക അവസ്​ഥ മനസ്സിലാക്കാനോ  താൽപര്യം കാണിച്ചില്ല. ആ സാഹചര്യത്തിൽ​ ബാലൻ അംഗവൈകല്യവും വേദനകളും മറന്ന്​​ വീണ്ട്​ ഷാർജയിലെത്തി​.  പൊലീസിൽ ബന്ധപ്പെട്ടപ്പോൾ കേസ്​ ഒന്നും നിലവിലില്ല എന്നറിഞ്ഞു. തുടർന്ന്​ ദുബൈ അൽകബ്ബാൻ അസോസിയേറ്റ്​സിലെ സീനിയർ ലീഗൽ കൺസൾട്ടൻറ്​ അഡ്വ. ഷംസുദ്ദീൻ കരുനാഗപള്ളിയെ ബ​ന്ധപ്പെട്ടു. 
തുടർന്ന്​ അപകടത്തിന്​ കാരണക്കാരാനായ തൊഴിലാളികൾക്കും കമ്പനിക്കും എതിരെ ക്രിമിനൽ കേസിൽ വിധിയുണ്ടായി. പിന്നീട്​  20 ലക്ഷം ദിർഹം നഷ്​ടപരിഹാരം ആവശ്യപ്പെട്ട്​ കമ്പനിക്കെതിരെ അൽക്കബ്ബാൻ അസോസിയേറ്റ്​സ്​ മുഖേന സിവിൽ കേസ്​ ഫയൽ ചെയ്​തു.
ഇൗ കേസിലാണ്​ ഷാർജ കോടതി 10,05,000 ദിർഹം അഞ്ച്​ ശതമാനം പലിശയടക്കം നൽകാൻ വിധിച്ചത്​. ഇൗ കേസ്​ നടക്കുന്ന കാലയളവിൽ  ബാലൻ കമ്പനിക്കെതിരെ അഡ്വ. ഷംസുദ്ദീൻ മുഖേന ലേബർ കേസ്​ ഫയൽ ചെയ്യുകയും  അനുകൂല വിധി സമ്പാദിക്കുകയും  ചെയ്​തിരുന്നു. ഇൗ കാലയളവിൽ ഒട്ടനവധി സുമനസുകളുടെ സഹായത്തോടെയാണ്​ ബാലൻ സാമ്പത്തികവും ശരീരികവുമായുമുള്ള ബുദ്ധിമുട്ടുകളെ അതീജീവിച്ചത്​. 10 ലക്ഷം ദിർഹം മതിയായ നഷ്​ട പരിഹാരമല്ലെന്ന്​ കാണിച്ച്​​ അപ്പീൽ ഫയൽ ചെയ്യുമെന്ന്​ അഡ്വ. ഷംസുദ്ദീൻ അറിയിച്ചു.