മൺകൂനകൾ പോലൊരു മനോഹര കെട്ടിടം

ഷാർജ: മരുഭൂമിയിൽ കാറ്റ് തീർക്കുന്ന ശിൽപങ്ങൾ നിരവധിയാണ്. വിവിധ ഭാഗങ്ങളിൽ നിന്ന് കാണാകൈയിൽ എടുത്ത് കൊണ്ട് വരുന്ന മണലുകൾ പാകി തീർക്കുന്ന പുളിനങ്ങളിൽ തെളിഞ്ഞ് കാണാം പ്രകൃതിയുടെ പ്രണയ ഭാവങ്ങൾ. സംഗീതത്തിലെ ആരോഹണവരോഹണം പോലെ പ്രവാഹത്തെ ക്രമീകരിച്ചാണ് കാറ്റി​െൻറ ശിൽപ രചന. കാറ്റ് മരുഭൂമിയിൽ എഴുതിയ ശിൽപ കാവ്യങ്ങളിലൊന്ന് കെട്ടിടമായി ഉയിർത്തെഴുന്നേൽക്കുകയാണ് ഷാർജയിൽ. മാലിന്യ നിർമാർജ രംഗത്ത് ഗൾഫ് മേഖലയിൽ തന്നെ വെന്നി കൊടി പാറിക്കുന്ന, ഷാർജ സർക്കാറി​െൻറ കീഴിൽ പ്രവർത്തിക്കുന്ന ബിയായുടെ ആസ്​ഥാന മന്ദിരമാണ് മൺകൂനയുടെ രൂപത്തിൽ ഒരുങ്ങുന്നത്. 
ഷാർജ–ദൈദ് റോഡിലെ ഏഴാം നമ്പർ പാലത്തിന് സമീപം സജ വ്യവസായ മേഖലക്കടുത്ത് 90,000 ചതുരശ്രമീറ്റർ വരുന്ന മരുപ്രദേശത്ത് 7000 ചതുരശ്ര മീറ്ററിലാണ് ഈ വിസ്​മയ കെട്ടിടത്തി​െൻറ നിർമാണം പുരോഗമിക്കുന്നത്. കെട്ടിടത്തിന് ചുറ്റും ഗാഫ് മരങ്ങളും തടാകവും ഉണ്ട്. മരുഭൂമിയിലൂടെ യാത്ര പോകുമ്പോൾ പുളിനങ്ങൾക്കിടയിലും അതിനെ ചുറ്റിയും നിൽക്കുന്ന ഗാഫ് മരങ്ങളും വിസ്​മയിച്ച് കിടക്കുന്ന കൊച്ച് തടാകങ്ങളും കണ്ടിട്ടില്ലേ, അതി​െൻറ നേർ പതിപ്പാണ് ബിയായുടെ ഈ വിസ്​മയ കെട്ടിടം. പ്രകൃതിയെ രക്ഷിക്കുക എന്നതാണ് ബിയായുടെ ലക്ഷ്യം. 
മാലിന്യ നിർമാർജന രംഗത്ത് നടപ്പിലാക്കിയ നൂതനാശയങ്ങൾ തന്നെ ഇത് വിവരിച്ച് തരും. ഖര, ദ്രവ മാലിന്യങ്ങൾ വേർതിരിച്ച് സംസ്​കരിക്കുന്ന രീതിക്ക് ആധുനിക പരിവേഷം നൽകിയത് ബിയായാണ്. കാർബൺ പ്രസരണത്തെ അടുപ്പിക്കാത്ത വിധത്തിലുള്ള സംവിധാനങ്ങളാണ് കെട്ടിടത്തിലുണ്ടാവുക. പകൽ സൂര്യവെളിച്ചത്തി​െൻറ പ്രഭയായിരിക്കും കെട്ടിടത്തിനകത്ത്. രാത്രി സൗരോർജ പാനലുകൾ വെളിച്ചം കൊളുത്തും. മരുഭൂമിയിലൂടെ കടന്ന് പോകുന്ന കാറ്റിനെ കെട്ടിടത്തിനകത്തേക്ക് സ്വാഗതം ചെയ്ത് ജൈവീകമായ സാന്നിധ്യം നിലനിറുത്തും. 
പ്രധാന ഓഫീസിന് പുറമെ, കാർ പാർക്കിങ്, വിശ്രമ മന്ദിരം, മസ്​ജിദ് എന്നിവക്കെല്ലാം തന്നെ പുളിനങ്ങളുടെ ആകൃതിയായിരിക്കും. ഷാർജ സർക്കാറി​െൻറ കെട്ടിടങ്ങളെല്ലാം തന്നെ വാസ്​തു കല കൊണ്ട് വേറിട്ട് കാഴ്ച സമ്മാനിക്കുന്നവയാണ്​ പൗരാണിക അറബ് നിർമാണ ചാരുതയും ഒട്ടോമൻ രീതിയും ആധുനികതയും സന്നിവേശിപ്പിച്ചുള്ള രീതിയാണ് ഷാർജയുടെത്. ഗൾഫ് മേഖലയിൽ വേറിട്ട് നിൽക്കുന്നതാണ് ഈ രീതികൾ. വളരുന്ന, ചിന്തിക്കുന്ന കെട്ടിടങ്ങൾ എന്ന് ഇവയെ വിളിച്ചാൽ അതിശയോക്തിയാവില്ല. അൽ ബറാശി മരുഭൂമിയിൽ ഒരുങ്ങുന്ന ബിയായുടെ വിസ്​മയ പുളിനം കൂടി വരുന്നതോടെ കെട്ടിട ചാരുതയിൽ ഷാർജയുടെ തിളക്കം കൂടും.