ഗുണകരമായ മാറ്റത്തിന്​ ഡബിൾ ബെൽ;  ഷബീർ ഉമറിന്​ അംഗീകാരം

ദുബൈ: മകൻ അമിത്​ മസിനെ സ്​കൂളിലാക്കാൻ ചെല്ലു​േമ്പാഴാണ്​ സ്​കൂൾ ബസ്​ ജീവനക്കാരുടെ പെരുമാറ്റ രീതികൾ അഡ്വ. ഷബീൽ ഉമറി​​െൻറ ശ്രദ്ധയിൽപ്പെട്ടത്​. അപരിഷ്​കൃതമെന്ന്​ വിശേഷിപ്പിക്കേണ്ടി വരുന്ന ചേഷ്​ടകളും പദ പ്രയോഗങ്ങളും. ബോധപൂർവമല്ലെങ്കിലും അവ കുട്ടികളുടെ മനസിൽ ഏറെ പ്രയാസങ്ങളുമുണ്ടാക്കുന്നു. ലോകപരിചയവും വിദ്യാഭ്യാസവും കുറഞ്ഞ പല നാടുകളിൽ നിന്നുള്ള ഇൗ സാധുമനുഷ്യർക്ക്​ മാറ്റമുണ്ടാക്കാൻ തന്നാലാവത്​ ചെയ്യണമെന്നും മനസിലുറച്ചു. പതിനൊന്ന്​ വർഷമായി വിവിധ കോർപ്പറേറ്റ്​ സ്​ഥാപനങ്ങളിലെ ഉ​േദ്യാഗസ്​ഥർക്ക്​ പരിശീലനം നൽകി വരുന്ന ഷബീൽ ബസ്​ഡ്രൈവർമാരുടെയൂം മോണിറ്റർമാരുടെയും വ്യക്​തിത്വ വികസനത്തിന്​ പദ്ധതി മുന്നോട്ടുവെച്ചപ്പോൾ   ജെ.എസ്​.എസ്​ സ്​കൂൾ അധികൃതർക്ക്​ നൂറുവട്ടം സമ്മതം.  തജ്​നീദ്​^ഗുണകരമായ മാറ്റം എന്നു പേരിട്ട ക്ലാസ്​ 2016 സെപ്​റ്റംബർ മുതൽ എല്ലാ വ്യാഴാഴ്​ചകളിലും 15 മിനിറ്റു വീതമാണ്​ നടത്തിയത്​. ഏതാനും ആഴ്​ചകൾ കൊണ്ടു തന്നെ ജീവനക്കാരിൽ ഗുണകരമായ മാറ്റം ​പ്രകടമായി. അവരുടെ വ്യക്​തിത്വവും പെരുമാറ്റരീതിയും ഉയർന്നത്​ ​ഒാരോ കുട്ടിയുടെയും സുരക്ഷക്കും സന്തോഷത്തിനും കൂടുതൽ കരുത്തായി എന്ന്​ സ്​കൂൾ അധികൃതരും സമ്മതിക്കുന്നു. ഒടുവിൽ ഇൗ മാറ്റത്തിന്​ ഉൽകൃഷ്​ഠതക്കുള്ള ശൈഖ്​ ഹംദാൻ എജ്യൂകേഷനൽ എക്​സലൻസ്​ അവാർഡും. 
ദാന വർഷത്തി​​െൻറ ഭാഗമായി ഏർ​െപ്പടുത്തിയ ഗുഡ്​ ഇനീഷ്യേറ്റീവ്​സ്​ പുരസ്​കാര വിഭാഗത്തിലാണ്​ താഴ്​ന്ന വരുമാനക്കാരും അരികുവൽക്കരിക്കപ്പെട്ടവരുമായ ജീവനക്കാർക്കായി സൗജന്യമായി നടത്തിവരുന്ന ഇൗ സേവനം തെരഞ്ഞെടുക്കപ്പെട്ടത്​.
 ദുബൈ ഉപഭരണാധികാരിയും ധനകാര്യ മന്ത്രിയുമായ ശൈഖ്​ ഹംദാൻ ബിൻ റാശിദ്​ ആൽ മക്​തൂമിൽ നിന്ന്​ പുരസ്​കാരം ഏറ്റുവാങ്ങിയ ഷബീൽ പദ്ധതി കൂടുതൽ സ്​കൂളുകളിലേക്ക്​ വ്യാപിപ്പിക്കുന്നതിന്​ റോഡ്​ ഗതാഗത അതോറിറ്റി (ആർ.ടി.എ)ക്ക്​ മുന്നിൽ നിർദേശം സമർപ്പിക്കാൻ തയ്യാറെടുക്കുകയാണ്​. മലപ്പുറം എരമംഗലം സ്വദേശിയാണ്​ ഇദ്ദേഹം. ഭാര്യ: ഡോ. സുമയ്യ