അബൂദബിയിൽ ടാക്​സി നിരക്ക്​ വർധിപ്പിച്ചു

അബൂദബി: അബൂദബി എമിറേറ്റിലെ ടാക്​സി നിരക്ക്​ വർധിപ്പിച്ചു. വർധന പ്രകാരം പകൽ സമയത്ത്​ അഞ്ച്​ ദിർഹവും രാത്രി അഞ്ചര ദിർഹവുമാണ്​ ഏറ്റവും കുറഞ്ഞ ചാർജ്​. ഇതിന്​ പുറമെ ഒാരോ കിലോമീറ്റർ ഒാട്ടത്തിനും 1.80 ദിർഹം വീതം നിരക്ക്​ ഇൗടാക്കും. പുതിയ നിരക്ക്​ പ്രാബല്യത്തിലാകുന്ന തീയതി വ്യക്​തമായിട്ടില്ല.
കാത്തിരിപ്പ്​ നിരക്കായി മിനിറ്റിന്​ 50 ഫിൽസ്​ നൽകണം. പകൽ സമയത്ത്​ കാർ റിസർവ്​ ചെയ്യാൻ നാല്​ ദിർഹവും വൈകുന്നേരം അഞ്ച്​ ദിർഹവുമാണെന്ന്​ ‘ഖലീജ്​ ടൈംസ്​’ റിപ്പോർട്ട്​ ചെയ്​തു. രാവിലെ ആറ്​ മുതൽ രാത്രി പത്ത്​ വരെയാണ്​ പകലിലെ ഷിഫ്​റ്റ്​. രാത്രി ഷിഫ്​റ്റ്​ രാത്രി പത്ത്​ മുതൽ രാവിലെ ആറ്​ വരെയാണ്​. വിമാനത്താവളങ്ങളിലെ വാനുകളുടെ കുറഞ്ഞ നിരക്ക്​ 25 ദിർഹവും കാറുകളുടേത്​ 20 ദിർഹവുമാണ്​.
44/2017 നമ്പർ പ്രകാരമുള്ള അബൂദബി എക്​സിക്യൂട്ടീവ്​ കൗൺസിൽ ഉത്തരവ്​ ജനറൽ സെക്രട്ടറി ഡോ. മുബാറക്​ അഹ്​മദ്​ ആൽ മുഹൈരിയാണ്​ ഇറക്കിയത്​.