5000 പേരുടെ ഇൻഷൂറൻസ്​ പദ്ധതിയുമായി ദുബൈ കെ.എം.സി.സി

ദുബൈ: കെ.എം.സി.സിയുടെ മൈ ​ഹെൽത്ത്​ ആരോഗ്യ ഇൻഷൂറൻസ്​ പദ്ധതി അഞ്ചാം വർഷത്തിലേക്ക്​. തകാഹുൽ ഇമാറാത്ത്​ ഇൻഷൂറൻസി​​െൻറ നാസ്​ നെറ്റ്​വർക്കുമായി സഹകരിച്ച്​ ഇൗ വർഷം 5000 പേരെയാണ്​ പദ്ധതിയിൽ ചേർക്കുന്നത്​. 895 ദിർഹം വാർഷിക പ്രീമിയം നൽകിയാൽ ഒന്നര ലക്ഷം ദിർഹത്തി​​െൻറ ചികിത്സ ലഭിക്കുന്ന സ്​കീമിൽ അബൂദാബി ഒഴികെയുള്ള എമിറേറ്റുകളിലെ 65 വയസിൽ താഴെ പ്രായമുള്ള താമസക്കാർക്ക്​ അംഗമാവാം. ചികിത്സാ ചെലവുകൾ വർധിക്കുകയും ആരോഗ്യ ഇൻഷൂറൻസ്​ ഇല്ലാത്തവർക്ക്​ പ്രതിമാസം 500 ദിർഹം പിഴ ഏർപ്പെടുത്തുകയും ചെയ്​ത സാഹചര്യത്തിൽ ഇൗ സ്​കീം ഏറെ പ്രസക്​തവും ഉപകാരപ്രദവുമാണെന്ന്​ ദുബൈ കെ.എം.സി.സി ഭാരവാഹികൾ വാർത്താ സമ്മേളനത്തിൽ പറഞ്ഞു. മറ്റു പല ഇൻഷുറൻസ്​ സ്​കീമുകളിലും ലഭ്യമല്ലാത്ത മുൻകാല രോഗങ്ങൾക്കുള്ള ചികിത്സയും പ്രസവ പരിരക്ഷയും ഇൗ പദ്ധതിയിലുണ്ട്​. ഡോക്​ടറുടെ നിർദേശപ്രകാരം വർഷത്തിൽ 5000 ദിർഹത്തിനു വരെ മരുന്നു വാങ്ങാനും പദ്ധതി വഴി കഴിയും.
പദ്ധതിയിൽ ചേർന്ന്​ ഹെൽത്​ കാർഡ്​ ലഭിച്ചാൽ നാസ്​ നെറ്റ്​വർക്കിനു കീഴിലെ 85 ലേറെ ക്ലിനിക്കുകളിലും ഫാർമസികളിലും ഒ.പി ചികിത്സയും ആസ്​റ്റർ, എൻ.എം.സി, തുംബൈ, ബെൽഹോൾ തുടങ്ങിയ ആശുപത്രികളിൽ കിടത്തി ചികിത്സയും ലഭിക്കും. അടിയന്തിര ഘട്ടങ്ങളിൽ സർക്കാർ ആശുപത്രികൾ ഉൾപ്പെടെ ഏത്​ ആശുപത്രിയിൽ ചികിത്സ തേടിയാലും ചികിത്സാ ചെലവ്​ തിരിച്ചു കിട്ടും. മുൻകൂട്ടി അനുമതി നേടി നാട്ടിലെ ആശുപത്രികളിൽ ചികിത്സ തേടുന്നവർക്ക്​ ബില്ലുകൾ ഹാജറാക്കുന്ന മുറക്ക്​ ചെലവായ തുകയുടെ 80 ശതമാനം ലഭിക്കും. പദ്ധതി സംബന്ധിച്ച വിവരങ്ങൾ  042727773,0524543758, 0506002355 എന്നീ നമ്പറുകളിൽ ലഭ്യമാണ്​. 
ദുബൈ കെ.എം.സി.സി പ്രസിഡൻറ്​ അൻവർ നഹ, ഭാരവാഹികളായ ഇസ്​മായിൽ അരൂക്കുറ്റി, എ.സി.ഇസ്​മായിൽ, മുസ്​തഫ തിരൂർ, മുഹമ്മദ്​ പട്ടാമ്പി, എൻ.കെ.​ ഇബ്രാഹിം, അഡ്വ.സാജിദ്​ അബൂബക്കർ, ഇസ്​മായിൽ ഏറാമല, അഷ്​റഫ്​ കൊടുങ്ങല്ലൂർ,ആർ.ഷുക്കൂർ, മൈ ഹെൽത്​ കൺവീനർ അബ്​ദുൽ ജലീൽ, തകാഫുൽ ഇമറാത്ത്​ പ്രതിനിധി ഷിബിൻ, നാസ്​ പ്രതിനിധി പ്രവീൺ കുമാർ എന്നിവർ വാർത്താ സമ്മേളനത്തിൽ സംബന്ധിച്ചു.