ഏകത നവരാത്രി സംഗീതോത്സവം ഒക്ടോബര്‍ രണ്ട് മുതല്‍
text_fieldsദുബൈ: അഞ്ചാമത് ഏകത നവരാത്രി സംഗീതോത്സവം ഒക്ടോബര്‍ രണ്ട് മുതല്‍ 10 വരെ ഷാര്‍ജ ഗോള്‍ഡ് സെന്‍ററിനടുത്തുള്ള റയാന്‍ ഹോട്ടലില്‍ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. പ്രവൃത്തിദിനങ്ങളില്‍ വൈകിട്ട് 7.30 മുതല്‍ 10.30 വരെയായിരിക്കും സംഗീതാര്‍ച്ചന. ഒക്ടോബര്‍ എട്ട്, ഒമ്പത് ദിവസങ്ങളില്‍ ഗുരുവായൂര്‍ ചെമ്പൈ സംഗീതോത്സവത്തിന്‍െറ മാതൃകയില്‍ രാവിലെ എട്ട് മുതല്‍ രാത്രി 10.30 വരെ സംഗീതാര്‍ച്ചന നടക്കും.
പ്രശസ്ത സംഗീതജ്ഞ ഡോ. കെ. ഓമനക്കുട്ടി, വയലിന്‍ വിദ്വാന്‍ പ്രഫ. ഈശ്വര വര്‍മ, മൃദംഗം വിദ്വാന്‍ പ്രഫ. പാറശ്ശാല രവി, സംഗീതജ്ഞന്‍ കൈതപ്രം വിശ്വനാഥന്‍, ഘടം വിദ്വാന്‍ തൃപ്പൂണിത്തുറ എന്‍. രാധാകൃഷ്ണന്‍, മുഖശംഖ് വിദ്വാന്‍ നെയ്യാറ്റിന്‍കര കൃഷ്ണന്‍ തുടങ്ങിയവരുടെ നേതൃത്വത്തില്‍ ഇന്ത്യയില്‍ നിന്നും ജി.സി.സി രാജ്യങ്ങളില്‍ നിന്നുമായി 250ഓളം കലാകാരന്മാര്‍ സംഗീതോത്സവത്തില്‍ പങ്കെടുക്കും. തിരുവനന്തപുരം നവരാത്രി മണ്ഡപം സംഗീതോത്സവത്തിന്‍െറ ചിട്ടവട്ടങ്ങള്‍ പാലിച്ചാണ് ഷാര്‍ജയിലും പരിപാടി നടക്കുന്നത്. ആദ്യ മൂന്നുദിവസങ്ങളില്‍ സരസ്വതി ദേവിയുടെ കീര്‍ത്തനങ്ങള്‍ക്കും രണ്ടാമത്തെ മൂന്നുദിവസങ്ങളില്‍ ലക്ഷ്മി ദേവിയുടെ കീര്‍ത്തനങ്ങള്‍ക്കും അവസാന മൂന്നുദിവസങ്ങളില്‍ ദുര്‍ഗ ദേവിയുടെ കീര്‍ത്തനങ്ങള്‍ക്കും പ്രാധാന്യം നല്‍കിവരുന്നു.
ഈവര്‍ഷത്തെ ഏകത പ്രവാസി സംഗീത ഭാരതി പുരസ്കാരം ഡോ. കെ. ഓമനക്കുട്ടിക്ക് സമ്മാനിക്കും. അരങ്ങേറ്റം മുതല്‍ കച്ചേരി വരെ നടത്താന്‍ വിദ്യാര്‍ഥികള്‍ക്കും മറ്റുള്ളവര്‍ക്കും അവസരമുണ്ടാകും. പങ്കെടുക്കാന്‍ താല്‍പര്യമുള്ളവര്‍ സെപ്റ്റംബര്‍ 15ന് മുമ്പ് അപേക്ഷ സമര്‍പ്പിക്കണം. വിജയദശമി ദിനത്തില്‍ കുട്ടികളെ എഴുത്തിനിരുത്തല്‍ ചടങ്ങും സംഗീതോത്സവ മണ്ഡപത്തില്‍ നടക്കും. അപേക്ഷാ ഫോറത്തിനും വിശദാംശങ്ങള്‍ക്കുമായി 0509498825, 0505678594, 0507860023 എന്നീ നമ്പറുകളില്‍ ബന്ധപ്പെടാം. വാര്‍ത്താസമ്മേളനത്തില്‍ ഏകത പ്രസിഡന്‍റ് ഗണേഷ് പ്രസാദ്, സംഗീതോത്സവം ജനറല്‍ കണ്‍വീനര്‍ ജി.സി. പ്രദീപ്, ജോ. കണ്‍വീനര്‍മാരായ സോംനാഥ്, ബീന വിനോദ്, യു.എ.ഇ എക്സ്ചേഞ്ച് ഇവന്‍റ്സ് ഹെഡ് വിനോദ് നമ്പ്യാര്‍, ഏകത സഹരക്ഷാധികാരി ലാല്‍ ഭാസ്കര്‍, ഉപദേശകന്‍ സജിത് കുമാര്‍ എന്നിവര്‍ പങ്കെടുത്തു.
