വേരിലും കായ്ച്ച് അബൂദബിയില്‍ പ്ളാവ്

അബൂദബി: തലസ്ഥാന നഗരിയിലെ മലയാളികള്‍ അടക്കമുള്ളവര്‍ക്ക് കൗതുകം പകര്‍ന്ന് നിറയെ ചക്കകളുമായി നില്‍ക്കുന്ന പ്ളാവ്. മുറൂര്‍ റോഡില്‍ പൊലീസ് കോളജിന് സമീപത്തെ വളപ്പിലാണ് താഴെ മുതല്‍ മുകള്‍ വരെ ചക്കകളുമായി നില്‍ക്കുന്ന പ്ളാവ് വേറിട്ട കാഴ്ചയാകുന്നത്. ശക്തമായ ചൂടിലും നിരവധി ചക്കകളാണ് ഈ പ്ളാവിലുള്ളത്. മുമ്പെങ്ങോ ബംഗ്ളാദേശ് സ്വദേശി നട്ടതാണ് ഈ പ്ളാവെന്നാണ് മലയാളിയായ മുഹമ്മദ് നന്നംമുക്ക് പറയുന്നത്. താഴെയുള്ള ചക്കകള്‍ ആളുകള്‍ പറിച്ചുകൊണ്ടുപോകുന്നത് തടയുന്നതിന് വലയുപയോഗിച്ച് സംരക്ഷിച്ചിട്ടുണ്ട്. പാകമാകാറായ ചക്കകളാണ് ഈ പ്ളാവിലുള്ളത്. നിരവധി പേര്‍ ഇപ്പോള്‍ അബൂദബിയിലെ ചക്കകള്‍ കാണാന്‍ എത്തുന്നുണ്ട്.