അറബിക്, ഇസ്ലാമിക് കൈയെഴുത്ത് പ്രദര്‍ശനം തുടങ്ങി

ദുബൈ: ദുബൈ അന്താരാഷ്ട്ര ഖുര്‍ആന്‍ അവാര്‍ഡിനോടനുബന്ധിച്ചു സംഘടിപ്പിച്ച അറബിക്, ഇസ്ലാമിക് കൈയ്യെഴുത്ത് പ്രദര്‍ശനം ദുബൈ ഭരാണിധികാരിയുടെ സാംസ്കാരിക ഉപദേഷ്ടാവും ദുബൈ അന്താരാഷ്ട്ര ഖുര്‍ആന്‍ അവാര്‍ഡ് സംഘാടക സമിതി ചെയര്‍മാനുമായ ബൂമില്‍ഹ ഉദ്ഘാടനം ചെയ്തു. 
മത്സര വേദിയായ ദുബൈ ചേംബര്‍ ഓഫ് കൊമേഴ്സ് ആന്‍റ് ഇന്‍ഡസ്ട്രി ഹാളിലാണ് പ്രദര്‍ശനം. പ്രാദേശിക അന്തര്‍ ദേശീയ തലത്തില്‍ സമ്മാനങ്ങള്‍ നേടിയ സ്വദേശികളായ കലാകാരന്മാരുടെ രചനകള്‍ പ്രദര്‍ശനത്തിനുണ്ട്.
അതേസമയം, ഖുര്‍ആന്‍ പാരായണ മത്സരത്തിന്‍െറ നാലാം ദിവസം  മത്സരം കൂടുതല്‍ ശക്തമായി. റഷ്യയിലെ ദാഗിസ്താന്‍കാരനായ ബിലാല്‍ അബ്ദുല്‍ ഖാലികൊഫ്, നേപ്പാള്‍ സ്വദേശി ശൈഖ് മുഹമ്മദ് വസീര്‍ അഖ്തര്‍, ബ്രൂണെ പൗരന്‍ മുഹമ്മദ് ഹദരി ഹാജി മുഹമ്മദ് ഹമദാനി, മധ്യ ആഫ്രിക്കയില്‍ നിന്ന് സലാഹുദ്ദീന്‍ ആദം ഇബ്രാഹിം സ്വീഡനില്‍ നിന്ന് അഹമദ് നാസിര്‍ അബ്ദുല്‍ കാദിര്‍ മഹ്മൂദ്, റുവാണ്ടയില്‍ നിന്ന് ഹുസൈന്‍ രൂഗൂവീസി, സ്പെയിനില്‍ നിന്ന് മുഹമ്മദ് ഒ ദാവുദ് എന്നിവരായിരുന്നു മത്സരിച്ചത്.